ନୂଆଦିଲ୍ଲୀ: ଆସନ୍ତାକାଲିଠାରୁ ଆରମ୍ଭ ବଜେଟ ଅଧିବେଶନ । ସଂସଦର ଉଭୟ ଗୃହକୁ ସମ୍ବୋଧିତ କରିବେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଆସନ୍ତା ୧ ତାରିଖରେ ୨୦୨୫-୨୬ କେନ୍ଦ୍ର ବଜେଟ ଆଗତ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ଆସନ୍ତାକାଲି ବି ଗୃହରେ ଉପସ୍ଥାପନ ହେବ ଅର୍ଥନୈତିକ ସର୍ଭେ ରିପୋର୍ଟ । ଏହି ଅଧିବେଶନର ପ୍ରଥମ ପର୍ଯ୍ୟାୟ ଫେବୃଆରୀ ୧୩ ଯାଏଁ ଚାଲିବ । ଦ୍ବିତୀୟ ପର୍ଯ୍ୟାୟ ଅଧିବେଶନ ୧୦ ମାର୍ଚ୍ଚରୁ ୪ ଏପ୍ରିଲ ଯାଏଁ ଚାଲିବ ।
ଫେବୃଆରୀ ୩ରୁ ୫ ଯାଏଁ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ଯବାଦ ପ୍ରସ୍ତାବ ଉପରେ ଆଲୋଚନା ହେବ । ରାଷ୍ଟ୍ରପତିଙ୍କ ଅଭିଭାଷଣ ପରେ ଅଧ ଘଣ୍ଟା ଲାଗି ଏକ ସ୍ବତନ୍ତ୍ର ସିଟିଂ ବସିବ । ଆସନ୍ତା ଫେବୃଆରୀ ୬ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟସଭାରେ ଉତ୍ତର ରଖିବେ । ଚଳିତ ଅଧିବେଶନରେ ମୋଟ ୨୭ଟି ସିଟିଂ ଧାର୍ଯ୍ୟ କରାଯାଇଛି । ଗତ ସଂସଦ ଅଧିବେଶନରେ ଆଦାନୀ, ସମ୍ବିଧାନ ସୁରକ୍ଷା, ଚାଷୀ ସମସ୍ଯା ସମେତ ଅନ୍ଯାନ୍ଯ ବହୁ ପ୍ରସଙ୍ଗରେ ବିରୋଧୀଙ୍କ ନାରାବାଜି ଯୋଗୁଁ ଉଭୟ ଗୃହର କାର୍ଯ୍ଯ ଗୁରୁତର ପ୍ରଭାବିତ ହୋଇଥିଲା । ତେବେ ବଜେଟ ଅଧିବେଶନରେ କିପରି ଶାନ୍ତିଶୃଙ୍ଖଳାରେ ଗୃହ ସୁରୁଖୁରୁରେ ଚାଲିପାରିବ ସେଥିପାଇଁ ସରକାର ବିରୋଧୀଙ୍କ ସହଯୋଗ ଲୋଡିଥିଲେ ।
ଗୃହକୁ ଶାନ୍ତିଶୃଙ୍ଖଳାରେ ପରିଚାଳନା କରିବା ଲାଗି ଆଜି ବସିଥିବା ସର୍ବଦଳୀୟ ବୈଠକରେ ହୋଇଛି ଆଲୋଚନା । ବୈଠକରେ ବିଭିନ୍ନ ଦଳର ପ୍ରତିନିଧିମାନେ ଉପସ୍ଥିତ ଥିଲେ । ଏଥିରେ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅଧ୍ୟକ୍ଷତା କରିଥିବାବେଳେ ସାମିଲ ହୋଇଥିଲେ କେନ୍ଦ୍ରମନ୍ତ୍ରୀ କିରଣ ରିଜିଜୁ, ଜେ.ପି. ନଡ୍ଡା, ଅର୍ଜୁନରାମ ମେଘୱାଲ ଓ ଏଲ. ମୁରୁଗାନଙ୍କ ସମେତ ଅନ୍ଯାନ୍ଯ ନେତା । ଏହାସହ କଂଗ୍ରେସର ଜୟରାମ ରମେଶ, କେ. ସୁରେଶ, ଗୌରବ ଗୋଗଇ, ଟିଏମସି ଏମପି ସୁଦୀପ ବନ୍ଦୋପାଧ୍ଯାୟ, ଡେରେକ ଓବ୍ରିୟେନ, ବିଜେଡିର ସସ୍ମିତ ପାତ୍ରଙ୍କ ସମେତ ଅନ୍ଯାନ୍ଯ ଦଳର ନେତା ସାମିଲ ହୋଇଥିଲେ । ସେହିପରି ଡିଏମକେର ଟିଆର ବାଲୁ, ସମାଜବାଦୀ ପାର୍ଟିର ରାମଗୋପାଳ ଯାଦବ, ଜେଏମଏମର ମହୁଆ ମାଝି ବି ବୈଠକରେ ଯୋଗ ଦେଇଥିଲେ ।
ଗର୍ଜିବ ବିଜେଡି
ସେପଟେ ଓଡ଼ିଶାକୁ ସ୍ବତନ୍ତ୍ର ପାହ୍ଯା ପ୍ରଦାନ, ମୁଦ୍ରାସ୍ଫୀତି ଓ ଦରବୃଦ୍ଧି, ଉତ୍କଟ ବେକାରୀ, ଚାଷୀଙ୍କୁ ଏମଏସପି ଦୁଇଗୁଣ କରିବା, ପୋଲାଭରମ ଓ ମହାନଦୀ ବିବାଦ, କୋଇଲା ରୟାଲଟି, ଗ୍ରୀନ ଟାକ୍ସ, ଜାତୀୟ ରାଜପଥ, ସମ୍ବଲପୁର-କୋରାପୁଟ-ବାଲେଶ୍ବରରେ ପୂର୍ଣ୍ଣକାଳୀନ ଏମସ ହସ୍ପିଟାଲ ପ୍ରତିଷ୍ଠା, ଆଦିବାସୀ ବିକାଶ ଆଦି ପ୍ରସଙ୍ଗ ସଂସଦରେ ଉଠିବ ବୋଲି କହିଛି ବିଜେଡି । ଏହାସହ ହୋ, ମୁଣ୍ଡାରି, ଭୂମିଜ ଓ କୁଇ ଭାଷାକୁ ଅଷ୍ଟମ ପରିଚ୍ଛେଦରେ ସ୍ଥାନୀତ କରିବା, କେନ୍ଦୁପତ୍ର ଉପରୁ ଜିଏସଟି ପ୍ରତ୍ୟାହାର, ରେଳବାଇ ଆଦି ପ୍ରସଙ୍ଗରେ ବି ଦଳୀୟ ସାଂସଦ ଜୋରଦାର ସ୍ବର ଉତ୍ତୋଳନ କରିବ ବୋଲି କହିଛି ବିଜେଡି ।
ଓଡ଼ିଶା ପାଇଁ କ’ଣ ରହିବ ?
ବଜେଟର ପେଡ଼ି ଖୋଲିବେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । କେନ୍ଦ୍ର ବିଜେଟରେ ଓଡ଼ିଶା ପାଇଁ କ’ଣ ରହିଛି ତାହାକୁ ନେଇ ରାଜ୍ୟର ପ୍ରମୁଖ ରାଜନୈତିକ ଦଳ ଗୁଡ଼ିକ ଆକଳନ ଆରମ୍ଭ କରିଛନ୍ତି । ସ୍ବତନ୍ତ୍ର ରାଜ୍ୟପାହ୍ୟା, ସ୍ବତନ୍ତ୍ର ଆର୍ଥିକ ଅନୁଦାନ, ରେଳବାଇ କ୍ଷେତ୍ରରେ ଓଡ଼ିଶା କ’ଣ ପାଇବ ତାହା ଉପରେ ସମସ୍ତଙ୍କ ନଜର ରହିଛି । କେନ୍ଦ୍ରର ବଜେଟ ପେଡ଼ିରେ ଓଡ଼ିଶାର ହକ ମିଳବ ନାଁ ପୁଣି ଓଡ଼ିଶା ନିରାଶ ହେବ ତାହାକୁ ନେଇ ନେତାଏ ମତାମତ ରଖିଛନ୍ତି ।
ଡବଲ ଇଞ୍ଜିନ ସରକାରରେ ଓଡ଼ିଶାକୁ ସବୁ କ୍ଷେତ୍ରରେ ଡବଲ ଲାଭ ମିଳିବା ଦରକାର ବୋଲି ବିଜେଡି ବିଧାୟକ ଗଣେଶ୍ବର ବେହେରା କହିଛନ୍ତି । ସେହିପରି ପୋଲାଭରମ, ମହାନଦୀ ସହ କୋଇଲା ରୟାଲିଟି ସଂଶୋଧନ ପରି ଦୀର୍ଘଦିନର ସମସ୍ୟାର ସମାଧାନ ବାଟ ବାହାରିବା ଦରକାର । କଂଗ୍ରେସ କହିଛି ବିଜେପି ସରକାରର ବଜେଟ ଲୋକଙ୍କ ପାଇଁ ହେବା ଆବଶ୍ୟକ । ଦରଦାମ କେମିତି ନିୟମନ୍ତ୍ରଣକୁ ଆସିବ ତାହା ଉପରେ କେନ୍ଦ୍ର ସରକାର ବଜେଟରେ ସ୍ବତନ୍ତ୍ର ବ୍ୟବସ୍ଥା କରିବା ଦରକାର ।
ସିପିଆଇ ନେତା ରାମକୃଷ୍ଣ ପଣ୍ଡା କହିଛନ୍ତି, କେନ୍ଦ୍ରରେ ବିଜେପି ସରକାର ଆସିବା ପରେ ଦେଶର ଅର୍ଥନୀତି ଭୁଷୁଡ଼ି ପଡ଼ିଛି । ଦରଦାମ ନିୟନ୍ତ୍ରଣ ବାହାରକୁ ଯିବା ସହ ନିଯୁକ୍ତି ସାତସପନ ହୋଇଛି । ଅନ୍ୟପଟେ ରାଜସ୍ବ ମନ୍ତ୍ରୀ କହିଛନ୍ତି କେନ୍ଦ୍ର ବଜେଟରେ ବିକଶିତ ଭାରତ ଓ ବିକଶିତ ଓଡ଼ିଶା ପ୍ରତିଫଳିତ ହେବ । ସମସ୍ତେ ଅପେକ୍ଷା କରନ୍ତୁ ।
