ସମ୍ବଲପୁର : ସମ୍ବଲପୁରରେ ଟ୍ରକକୁ ଧକ୍କା ଦେଲା ଆମ୍ବୁଲାନ୍ସ । ଜଣେ ମୃତ, ୫ ଗୁରୁତର । ବୌଦ୍ଧରୁ ୧୦୮ ଆମ୍ବୁଲାନ୍ସଟି ରୋଗୀ ନେଇ ବୁର୍ଲା ଭୀମସାର ଯିବା ସମୟରେ ଅଘଟଣ । ଫୁଲଝରଣ ନିକଟରେ ବାଲି ବୋଝେଇ ହାଇୱା ପଛପଟୁ ଆମ୍ବୁଲାନ୍ସଟି ଧକ୍କା ଦେବାରୁ ଆମ୍ବୁଲାନ୍ସ କର୍ମଚାରୀ ମାନ ଭଞ୍ଜନ ସାହୁଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି । ଡ୍ରାଇଭର ସମେତ ୫ ଜଣ ଆହତ ହୋଇଛନ୍ତି । ସମସ୍ତ ଗୁରୁତରଙ୍କୁ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି । ମୃତକ ମାନ ଭଞ୍ଜନଙ୍କ ୬ ମାସ ତଳେ ବିବାହ ହୋଇଥିଲ ।
୨୬ ତାରିଖ ବେଳକୁ ବାତ୍ୟା ନେଇ ବିଭିନ୍ନ ମଡେଲର ଆକଳନ…
ଭୁବନେଶ୍ବର : ଆଜି ଲଘୁଚାପର ରୂପ ନେବ ଘୁର୍ଣ୍ଣିବଳୟ। ୨୪ ତାରିଖ ବେଳକୁ ଦକ୍ଷିଣ ବଙ୍ଗୋପସାଗରର କେନ୍ଦ୍ରୀୟ ଅଞ୍ଚଳରେ ଅବପାତର ରୂପ ନେବାର ସମ୍ଭାବନା। ପରବର୍ତ୍ତୀ ୪୮ ଘଣ୍ଟାରେ ଆହୁରି ଘନୀଭୂତ ହୋଇପାରେ। ତେବେ ଆସନ୍ତା ୨୬ ତାରିଖ ବେଳକୁ ବଙ୍ଗୋପସାଗରରେ ବାତ୍ୟା ନେଇ ପୂର୍ବାନୁମାନ କରିଛନ୍ତି ବିଭିନ୍ନ ଆନ୍ତର୍ଜାତୀୟ ମଡେଲ । ତେବେ ମାଲାକ୍କା ସମୁଦ୍ର ସନ୍ଧି ନିକଟବର୍ତ୍ତୀ ଅଞ୍ଚଳରେ ସକ୍ରିୟ ଥିବା ଘୁର୍ଣ୍ଣିବଳୟ ଟି ଆଜି ସୁଦ୍ଧା ଲଘୁଚାପର ରୂପ ନେଇ ପାରେ ବୋଲି କହିଛି ଆଞ୍ଚଳିକ ପାଣିପାଗ କେନ୍ଦ୍ର I ତାହା ପରବର୍ତ୍ତୀ ସମୟରେ ବାତ୍ୟାରେ ପରିଣତ ହୋଇପାରେ। ଲଘୁଚାପ ସୃଷ୍ଟି ହେବା ପରେ ଅଧିକ ସ୍ପଷ୍ଟତା ଆସିପାରେ ବୋଲି କହିଛି ପାଣିପାଗ କେନ୍ଦ୍ର I ସେପଟେ ରାଜ୍ୟରେ ଆହୁରି ୫ ଦିନ ପର୍ଯ୍ୟନ୍ତ ପାଗ ଶୁଖିଲା ରହିବ I ତାପମାତ୍ରାରେ ଆଉ ୨ ରୁ 3 ଡିଗ୍ରୀ ବୃଦ୍ଧି ହେବାର ସମ୍ଭାବନା ଥିବା ବେଳେ ଆସନ୍ତା ସପ୍ତାହରେ ପାଗ ବଦଳି ପାରେ। ଉପକୁଳ ଜିଲ୍ଲା ମାନଙ୍କରେ ମେଘୁଆ ପାଗ ସହିତ ବର୍ଷା ସମ୍ଭାବନା ରହିଛି।
ଆଜିଠାରୁ ଆରମ୍ଭ ହେବ ଭାରତ ବନାମ ଦକ୍ଷିଣ ଆଫ୍ରିକା ଦ୍ୱିତୀୟ ଟେଷ୍ଟ୍ ମ୍ୟାଚ
ନନ୍ଦିଘୋଷ ବ୍ୟୁରୋ : ଆଜିଠାରୁ ଆରମ୍ଭ ହେବ ଭାରତ ବନାମ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ୍ ମ୍ୟାଚ। ଭାରତୀୟ ଅଧିନାୟକ ଭାବରେ ରିଷଭ ପନ୍ତଙ୍କର ଏହା ପ୍ରଥମ ଟେଷ୍ଟ୍ ହେବ। ଭାରତ ସିରିଜ୍ ରେ ୦-୧ ପଛରେ ଅଛି।ତେଣୁ ସିରିଜ୍ ଡ୍ରରେ ଶେଷ କରିବାକୁ ହେଲେ ଯେକୌଣସି ଭାବେ ଏହି ଟେଷ୍ଟ୍ ଜିତିବାକୁ ପଡିବ। ଦକ୍ଷିଣ ଆଫ୍ରିକାର ବାଭୁମା ପୁଣି ଥରେ ଟେଷ୍ଟ୍ ଅଧିନାୟକ ଭାବରେ ପଡିଆକୁ ଓହ୍ଲାଇବେ। ଗୌହାଟୀ ବରସାପାରା କ୍ରିକେଟ ଷ୍ଟାଡିୟମରେ ହେବାକୁ ଥିବା ଏହି ଟେଷ୍ଟ୍ ର ସମୟ ପ୍ରଥମ ମ୍ୟାଚ୍ ଠାରୁ ଭିନ୍ନ । ଗୌହାଟି ପ୍ରଥମ ଥର ପାଇଁ ଏହି ଟେଷ୍ଟ ମ୍ୟାଚ୍ ଆୟୋଜନ କରିଛି । ରିଷଭ ପନ୍ତ ପ୍ରଥମ ଥର ପାଇଁ ପୂର୍ଣ୍ଣକାଳୀନ ଟେଷ୍ଟ ଅଧିନାୟକ ଭାବରେ କାର୍ଯ୍ୟ କରିବେ।ଦଳର ଅଧିନାୟକତ୍ୱ କରିବାରେ ୩୮ ତମ ଭାରତୀୟ ହେବେ ରିଷଭ। ଶୁଭମନ ଗିଲ ଦ୍ୱିତୀୟ ଟେଷ୍ଟରୁ ବାଦ ପଡ଼ିଛନ୍ତି। ଦକ୍ଷିଣ ଆଫ୍ରିକାର ଦ୍ରୁତ ବୋଲର କାଗିସୋ ରାବାଡା ମଧ୍ୟ ଆଘାତ ଯୋଗୁଁ ମ୍ୟାଚ୍ ଖେଳିବେ ନାହିଁ ବୋଲି ସୂଚନା ରହିଛି।
କଟକରେ ଡବଲ ମର୍ଡର : ବାପା ଓ ସାବତ ମାଆକୁ ହତ୍ୟା କଲା ପୁଅ
କଟକ : କଟକରେ ଡବଲ ମର୍ଡର। କଟକ ଦରଘାବଜାର ଓଲ୍ଡ ଜେଲ୍ କଲୋନୀରେ ବାପା ଓ ସାବତ ମାଆକୁ ଅତି ନିର୍ମମ ଭାବେ ହତ୍ୟା କଲା ପୁଅ। ବାପା ମାଆଙ୍କୁ ହତ୍ୟା କରିବା ପରେ ସ୍ତ୍ରୀକୁ କଲ୍ କରି କହିଲା ସବୁକଥା। କଟକ ଓଲ୍ଡ ଜେଲ୍ କଲୋନୀରେ ଦୀପକ କୁମାର ଦାସ ଓ ତାଙ୍କ ପତ୍ନୀ ରିତାରାଣୀ ଦାସ ରହିଆସୁଥିଲେ। ଜମିବାଡିକୁ ନେଇ ପୁଅ ଆଲୋକ କୁମାର ଦାସଙ୍କ ସହ ବିବାଦ ଲାଗି ରହିଥିଲା। ଆଉ ଏହି ବିବାଦ ଗତକାଲି ରାତିରେ ନେଇଥିଲା ଉଗ୍ରରୂପ। ଧାରୁଆ ଛୁରୀରେ ପ୍ରଥମେ ସାବତ ମାଆକୁ ହାଣି ହତ୍ୟା କରିବା ପରେ ବାପା ଯେତେବେଳେ ଆସି ପହଞ୍ଚିଥିଲେ ତାଙ୍କୁ ଅତର୍କିତ ଭାବେ ଆକ୍ରମଣ କରି ନୃଶଂସ ଭାବେ ହତ୍ୟା କରିଥିଲା। ଘଟଣାସ୍ଥଳରେ ଦରଘାବଜାର ପୋଲିସ ଓ ସାଇଣ୍ଟିଫିକ୍ ପହଞ୍ଚି ତଦନ୍ତ ଜାରି ରଖିଛନ୍ତି। ଦୁଇ ମରଶରୀରକୁ ବ୍ୟବଚ୍ଛେଦ ପାଇଁ ଏସସିବି ମେଡିକାଲକୁ ପଠାଇଛି ପୋଲିସ। ହତ୍ୟାକାରୀ ପୁଅକୁ ଅଟକ ରଖି ପଚରାଉଚରା କରୁଛି ପୋଲିସ।
ରାଜ୍ୟ କ୍ୟାବିନେଟର ବଡ଼ ନିଷ୍ପତ୍ତି: ୟୁନିଫର୍ମ କର୍ମଚାରୀ ଚୟନ ପାଇଁ ନୂଆ ଆୟୋଗ
ରାଜ୍ୟରେ ଗଠନ ହେଲା ୟୁନିଫର୍ମ ସେବା କର୍ମଚାରୀ ଚୟନ ଆୟୋଗ। ପୋଲିସ, ଜଙ୍ଗଲ, ଅବକାରୀ, ଅଗ୍ନିଶମ ଓ ବାଣିଜ୍ୟ ପରିବହନ ବିଭାଗରେ ୟୁନିଫର୍ମ କର୍ମଚାରୀ ଚୟନ ପାଇଁ ଏହି ଆୟୋଗ କାମ କରିବ। ନିଯୁକ୍ତିରେ ଅନିୟମିତତା ଓ ଅହେତୁକ ବିଳମ୍ବ ଯୋଗୁଁ ସରକାର ସମାଲୋଚିତ ହେବା ପରେ ନୂଆ ଆୟୋଗ ଗଠନ କରିଛନ୍ତି। ଏଥିରେ ଜଣେ ଅଧ୍ୟକ୍ଷ ଓ ଦୁଇ ଜଣ ସଦସ୍ୟ ରହିବେ। ରାଜ୍ୟ କ୍ୟାବିନେଟରେ ଏହି ପ୍ରସ୍ତାବ ଅନୁମୋଦନ ହୋଇଛି। ଏହା ସହ ଓଡ଼ିଶାରେ ଶାଖା ଖୋଲିବାକୁ ବିଶ୍ବର ବଡ଼ ବଡ଼ ଆଇଟି କମ୍ପାନୀଙ୍କୁ ପ୍ରୋତ୍ସାହନ ଦେଇଛନ୍ତି ସରକାର। ଗ୍ଲୋବାଲ କାପାବିଲିଟି ସେଣ୍ଟର ନୀତି ୨୦୨୫ ଜରିଆରେ ଅନ୍ୟ ୭ ରାଜ୍ୟ ଭଳି ଓଡ଼ିଶା ସରକାର ପ୍ରୋତ୍ସାହନ ବ୍ୟବସ୍ଥା କରିଛନ୍ତି। ଏହାଦ୍ବାରା ହଜାରେ କୋଟି ଟଙ୍କାର ପୁଞ୍ଜିନିବେଶ ସହ ୫୦ ହଜାର ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତିର ସମ୍ଭାବନା ରହିଛି। କଟକ-ପୁରୀ-ଭୁବନେଶ୍ବର ସହ ବରଗଡ଼-ଝାରୁସୁଗୁଡ଼ା-ସମ୍ବଲପୁର ଭଳି ଅଞ୍ଚଳର ଅର୍ଥନୈତିକ ଅଭିବୃଦ୍ଧି ଦିଗରେ ଏହି ନୀତି ସହାୟକ ହେବ।
ଚୋରା ବାଲି କାରବାର ରୋକିବାକୁ ମୁଖ୍ୟମନ୍ତ୍ରୀଙ୍କ ଆହ୍ବାନ ପରେ କ୍ୟାବିନେଟରେ ଲଘୁ ଖଣିଜ କାରବାରକୁ ନିଲାମୀ ବଦଳରେ ଲଟେରୀ ଜରିଆରେ କରିବାକୁ ନିଷ୍ପତ୍ତି ନେଇଛନ୍ତି। ଏହାଦ୍ବାରା ଲଘୁ ଖଣିଜ ଆବଣ୍ଟନରେ ସ୍ବଚ୍ଛତା ସହ ଉପଯୁକ୍ତ ଭାବେ ମନିଟରିଂ କରାଯାଇପାରିବ ବୋଲି ସରକାର ଆଶା ରଖିଛନ୍ତି। ଏଥିପାଇଁ ଲଘୁ ଖଣିଜ ରିହାତି ନିୟମ, ୨୦୧୬ରେ ସଂଶୋଧନ କରାଯାଇଛି। ସେହିପରି ୨୦୦୭ରୁ ଥିବା ବେଆଇନ ଖଣି ଖନନ ନିବାରଣ, ପରିବହନ ଓ ସଂରକ୍ଷଣ ନିୟମ ପରିବର୍ତ୍ତନ କରି ନୂଆ ନିୟମ ଆଣିବା ପ୍ରସ୍ତାବ କ୍ୟାବିନେଟରେ ଅନୁମୋଦିତ ହୋଇଛି। ଏହାଦ୍ବାରା ବାଲି, ଗୋଡ଼ି ଭଳି ଦ୍ରବ୍ୟର ଚୋରା କାରବାରକୁ ରୋକାଯିବ। ଏହାସହ ହଷ୍ଟେଲରେ ରହି ପଢୁଥିବା ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ପାଇଁ ମୁଖ୍ୟମନ୍ତ୍ରୀ ମେଧାବୀ ଛାତ୍ର ପ୍ରୋତ୍ସାହନ ଯୋଜନାରେ ମେସ୍ ବାବଦକୁ ଛାତ୍ର ବୃତ୍ତିରେ ବୃଦ୍ଧି କରାଯାଇଛି। ଛାତ୍ରଙ୍କ ପାଇଁ ବର୍ଷକୁ ୧୦ ହଜାର ବଦଳରେ ୧୬ ହଜାର ଏବଂ ଛାତ୍ରୀଙ୍କ ପାଇଁ ୧୭ ହଜାର ଟଙ୍କାର ବ୍ୟବସ୍ଥା ହୋଇଛି।
ଜଳ ଜନିତ ପରିବେଶ ପ୍ରଦୂଷଣ ଆଇନରେ ସଂଶୋଧନ କରିଛନ୍ତି ସରକାର। ୧୯୮୦ ମସିହାରେ ଶ୍ରମ ଓ ନିଯୁକ୍ତି ବିଭାଗରେ କାର୍ଯ୍ୟରତ କର୍ମଚାରୀଙ୍କୁ ମିଳିଥିବା ଏଲଆଇଜି ଘର, ବିଭାଗ ପରିବର୍ତ୍ତନ ପରେ ନିଜ ନାମରେ କରିବା ସମ୍ଭବପର ହେଉନଥିଲା। ଏବେ ଏସବୁ ବିବାଦର ସମାଧାନ ପାଇଁ ସାଧାରଣ ପ୍ରଶାସନ ବିଭାଗ ଦାୟିତ୍ବ ନେବ। ରାଜ୍ୟ କ୍ୟାବିନେଟରେ ୯ଟି ବିଭାଗର ୧୨ଟି ପ୍ରସ୍ତାବକୁ ମଞ୍ଜୁରୀ ମିଳିଛି।
ବିହାର ବିଧାନସଭା ନିର୍ବାଚନର ବିନ୍ଧାଣି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବିମାନବନ୍ଦରରେ ଭବ୍ୟ ସ୍ବାଗତ
ବିହାର ବିଧାନସଭା ନିର୍ବାଚନର ବିନ୍ଧାଣି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ଦୁଇଦିନିଆ ଓଡ଼ିଶା ଗସ୍ତରେ ଆସି ଭୁବନେଶ୍ଵରରେ ପହଞ୍ଚିଛନ୍ତି । ବିହାରରେ NDAର ଚମତ୍କାର ପ୍ରଦର୍ଶନ ପରେ ସେ ଓଡ଼ିଶା ଆସିଥିବାରୁ ତାଙ୍କୁ ଭୁବନେଶ୍ଵର ବିମାନବନ୍ଦରରେ ଭବ୍ୟ ସ୍ଵାଗତ କରାଯାଇଛି । ହଜାର ହଜାର ବିଜେପି କର୍ମୀ ଓ ନେତା ତାଙ୍କୁ ଭବ୍ୟ ସ୍ଵାଗତ କରିଛନ୍ତି । ପାରମ୍ପରିକ ନୃତ୍ୟବାଦ୍ୟରେ ତାଙ୍କୁ ସ୍ଵାଗତ କରିଛନ୍ତି ଦଳୀୟ ନେତା । ବିମାନବନ୍ଦରରେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ସାଂସଦ ବିଭୁ ପ୍ରସାଦ ତରାଇ, ବିଧାୟକ ଟଙ୍କଧର ତ୍ରିପାଠୀ, ଗୋଲକ ମହାପାତ୍ର, ପିଙ୍କି ପ୍ରଧାନ, ତେଜେଶ୍ଵର ପରିଡ଼ା, ପୂର୍ବତନ ରାଜ୍ୟ ସଭାପତି ସମୀର ମହାନ୍ତି ପ୍ରମୁଖଙ୍କୁ ଦେଖିବାକୁ ମିଳିଥିଲା । ଭୁବନେଶ୍ବରରେ ପହଞ୍ଚିବା ପରେ ଧର୍ମେନ୍ଦ୍ର କହିଛନ୍ତି, ବିହାରରେ NDAର ବିପୁଳ ବିଜୟ ପାଇଁ ଅଗଣିତ ଜନତାଙ୍କୁ ଧନ୍ୟବାଦ ।
ପ୍ରଧାନମନ୍ତ୍ରୀଙ୍କ ଦିଗ୍ଦର୍ଶନରେ ବିହାରରେ NDA ସଫଳତା ପାଇଛି । ବିହାର ବିଜୟ ପ୍ରଧାନମନ୍ତ୍ରୀଙ୍କ ଦୃଢ଼ ନେତୃତ୍ଵକୁ ବଡ଼ ସ୍ଵୀକୃତି ଦେଇଛି । ନୀତୀଶ କୁମାରଙ୍କ ନେତୃତ୍ଵକୁ ପୁଣି ସ୍ଵୀକୃତି ଦେଇଥିବାରୁ ଲୋକଙ୍କୁ ସେ କୃତଜ୍ଞତା ଜଣାଇଛନ୍ତି । ଉତ୍ତମ ଶାସନକୁ ବିହାରବାସୀ ପୁଣି ପସନ୍ଦ କରିଛନ୍ତି ବୋଲି ସେ କହିଛନ୍ତି । ଖାଲି ସେତିକି ନୁହେଁ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଭୂମିକାକୁ ମଧ୍ୟ ସେ ପ୍ରଶଂସା କରିଛନ୍ତି । ଦେଶ ବିଭାଜନ ମାନସିକତା ରଖୁଥିବା କଂଗ୍ରେସକୁ ଜନତା ପ୍ରତ୍ୟାଖ୍ୟାନ କରିଛନ୍ତି । କଂଗ୍ରେସର ନକାରାତ୍ମକ ରାଜନୀତିକୁ ଜନତା ପ୍ରତ୍ୟାଖ୍ୟାନ କରିଛନ୍ତି । ନୂଆପଡ଼ାରେ BJP ବିପୁଳ ଭୋଟ୍ରେ ଜିତିଛି । ସେଥିପାଇଁ ସେ ନୂଆପଡ଼ାବାସୀଙ୍କୁ ଧନ୍ୟବାଦ ଦେଇଛନ୍ତି । ବିହାର ନିର୍ବାଚନ ପ୍ରଭାରୀ ଦାୟିତ୍ଵରେ ଥିଲେ ଧର୍ମେନ୍ଦ୍ର ପ୍ରଧାନ ।
କଂଗ୍ରେସରେ ବିଦ୍ରୋହର ନିଆଁ: ଭକ୍ତଙ୍କ ବିଭୀଷଣ ବୟାନ ପରେ ନିରଂଜନଙ୍କ ରାବଣ ବାଣ
କଂଗ୍ରେସରେ ବିଦ୍ରୋହର ନିଆଁ । ଭକ୍ତଙ୍କ ବିଭୀଷଣ ବୟାନ ପରେ ନିରଂଜନଙ୍କ ରାବଣ ବାଣ । ମୋକିମଙ୍କ ସପକ୍ଷରେ ବାହାରିଲେ ଜୟଦେବ ଜେନା । ୨୩ରେ ବସିବ ପରାଜୟ ସମୀକ୍ଷା ବୈଠକ । କଂଗ୍ରେସରେ ରାବଣ କିଏ ? କିଏ ଚାହୁଁଛି କଂଗ୍ରେସ ଭଳି ସୁନାର ଲଙ୍କାକୁ ଜାଳିପୋଡି ଛାରଖାର କରିବାକୁ ? ନୂଆପଡା ନିର୍ବାଚନରେ କଂଗ୍ରେସର ପରାଜୟ ପରେ ପିସିସି ସଭାପତିଙ୍କ ବିଭୀଷଣ ମନ୍ତବ୍ୟ ଏବେ ଦଳରେ ହଇଚଇ ସୃଷ୍ଟି କରିଥିବାବେଳେ ପୂର୍ବତନ ପିସିସି ସଭାପତି ନିରଂଜନ ପଟ୍ଟନାୟକ ରାବଣ ଉପାଖ୍ୟାନ ଏବେ ରାଜ୍ୟ କଂଗ୍ରେସ ରାଜନୀତିକୁ ହଲଚଲ କରିଛି । ନିରଂଜନଙ୍କ ଯୁକ୍ତି ହେଉଛି କଂଗ୍ରେସରେ ଯଦି ବିଭୀଷଣ ଅଛନ୍ତି, ତାହାଲେ ରାବଣ କିଏ ? ବିଭୀଷଣ ଯଦି ଚିହ୍ନଟ ହେବେ ତେବେ ରାବଣ କିଏ ତାହା ବି ଚିହ୍ନଟ ହେବା ଦରକାର। ବିଭୀଷଣ ଯଦି ଅଛନ୍ତି ତାହାଲେ ରାବଣ ବି ଦଳରେ ଅଛନ୍ତି । ସିଧାସଳଖ ନହେଲେ ବି ପରୋକ୍ଷରେ ସେ ପିସିସି ସଭାପତିଙ୍କୁ ତେରେଛା ବାଣ ମାରିଛନ୍ତି ନିରଂଜନ । ନିଜ ଘର ନସଜାଡି ବାହାର ଲୋକଙ୍କୁ ଦାୟୀ କରିବା ଠିକ୍ ନୁହେଁ । ଆମର ନେତାଙ୍କ କଣ ଭୁଲ ଅଛି ତାହା ଆଗେ ଜାଣିବା କଥା। ବଡ ଠାରୁ ଛୋଟ ନେତା ସମସ୍ତେ ଜାଣିବା ଦରକାର । ସଭାପତି କଂଗ୍ରେସକୁ ମଜଭୁତ କରିବା ପାଇଁ ଉଦ୍ୟମ କରି ସଫଳ ହୋଇନାହାଁନ୍ତି । କଂଗ୍ରେସ ସଂଗଠନ ତୃଣମୂଳ ସ୍ତରରୁ ଦୁର୍ବଳ ଅଛି ବୋଲି ତାହାର ପରିଣାମ ଦଳ ଭୋଗିଲା ବୋଲି ନିରଂଜନ କହିଛନ୍ତି ।
ପିସିସି ସଭାପତି ଭକ୍ତ ଦାସ ଓ ମହମ୍ମଦ ମୋକିମଙ୍କ କଳି ନେଇ ନିଆଁରେ ଘିଅ ଢାଳିଛନ୍ତି ପୂର୍ବତନ ପିସିସି ସଭାପତି ଜୟଦେବ ଜେନା। ତାଙ୍କ ଯୁକ୍ତି ହେଉଛି ମହମ୍ମଦ ମୋକିମ ଭାଇଚାରରେ ବିଶ୍ବାସ ରଖି ରାଜନୀତି କରୁଛନ୍ତି । ହିଂସା ପାଇଁ ମୋକିମ ନୂଆପଡ଼ା ନଯିବା କଥା ଠିକ୍ ନୁହେଁ । ମୋକିମ ସବୁବେଳେ କଂଗ୍ରେସକୁ ଏକଜୁଟ କରିବା ଓ ଆଗକୁ ନେବା ପାଇଁ ଚେଷ୍ଠା କରନ୍ତି । ଭକ୍ତ ମୋକିମ ବିବାଦ ନେଇ ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟ କହିଛନ୍ତି ପିସିସି ସଭାପତି ତାଙ୍କ ହୃଦୟର କଥା କହିଛନ୍ତି । କିଏ ଆମ ଭିତରେ ବିଭୀଷଣ ? ମୋକିମ ହେଉଛନ୍ତି କଂଗ୍ରେସ ପିଲର । ତାଙ୍କ ଝିଅ ସୋଫିଆ ଫିର୍ଦ୍ଦୋସ ବି ଦଳର ଶକ୍ତି । ପିସିସି ସଭାପତି କହିଛନ୍ତି ସମସ୍ତଙ୍କୁ ସାଙ୍ଗରେ ନେଇ କଂଗ୍ରେସକୁ ମଜଭୁତ କରାଯିବ। ଖୁବଶୀଘ୍ର କଂଗ୍ରେସର ବରିଷ୍ଠ ନେତାମାନେ ଏକାଠି ହୋଇ ବୈଠକ କରିବେ । ସବୁ ସମସ୍ୟାର ସମାଧାନ କରାଯିବ ।
ନୂଆପଡା ପରାଜୟ ପରେ କଂଗ୍ରେସ କଳି ବଢୁଥିବାରୁ ଆସନ୍ତା ୨୩ ତାରିଖରେ ପରାଜୟର ସମୀକ୍ଷା କରିବ ଦଳ । ଦୁଇଟି ପର୍ଯ୍ୟାୟରେ ଦଳର ମଙ୍ଗୁଆଳମାନେ ମାନସମନ୍ଥନ କରିବେ । ୧୪୦ ବର୍ଷର ପୁରୁଣା ଦଳରେ ପୌରାଣିକ ଚରିତ୍ରକୁ ନେଇ ନେତାଙ୍କ ମଧ୍ୟରେ ଆରମ୍ଭ ହୋଇଥିବା ବାକଯୁଦ୍ଧ ଆଗକୁ ଥମିବ ନା ବଢିବ ତାହା ଉପରେ ରହିଛି ନଜର ।
ସରକାରୀ କ୍ୱାର୍ଟରରେ ବେଆଇନ ନିର୍ମାଣ: ଭଡାରେ ଲାଗୁଛି ପରିସରରେ ନିର୍ମାଣ ଗୃହ
ସରକାରୀ କ୍ୱାର୍ଟରରେ ବେଆଇନ ନିର୍ମାଣ। ଭଡାରେ ଲାଗୁଛି ପରିସରରେ ନିର୍ମାଣ ଗୃହ । ଭୁବନେଶ୍ୱର ଖାରବେଳ ନଗର ସ୍ଥିତ ଟେକ୍ସଟ ବୁକ ପ୍ରଡ଼କସନ ଓ ମାର୍କେଟିଂ ର କ୍ୱାର୍ଟର ଗୁଡିକରେ ବେଆଇନ ନିର୍ମାଣ କରାଯାଉଥିବା ବଡ଼ ଅଭିଯୋଗ ହୋଇଛି । କ୍ୱାର୍ଟର ଗୁଡିକରେ କର୍ମଚାରୀ ମାନେ ବେଆଇନ ନିର୍ମାଣ କରିବା ସହ ଦୋକାନ ଘର ମଧ୍ୟ ନିର୍ମାଣ କରି ଭଡ଼ାରେ ଲଗାଇଥିବା ଅଭିଯୋଗ ହୋଇଛି । କିଛି କ୍ୱାଟରରେ କର୍ମଚାରୀ ମାନେ ଅଧା ଘରେ ରହି ଆଉ ଅଧା ଘର ଭଡ଼ାରେ ଲଗାଇଛନ୍ତି। ଭଡା ଆକାରରେ ଲୋକଙ୍କ ଠାରୁ ହଜାର ହଜାର ଟଙ୍କା ଆଦାୟ ହେଉଥିବା ବେଳେ ସିକ୍ୟୁରିଟି ଡିପୋଜିଟ ଭାବେ ମଧ୍ୟ ଲକ୍ଷାଧିକ ଟଙ୍କା ନିଆଯାଉଛି । ଏସବୁ କାର୍ଯ୍ୟରେ କାର୍ଯ୍ୟାଳୟର ଅଧିକାରୀଙ୍କ ସଂପୃକ୍ତିର ବଡ଼ ଅଭିଯୋଗ ହୋଇଛି । ତେଣୁ ତୁରନ୍ତ ଏ ଦିଗରେ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି।
କେବଳ ଟେକ୍ସଟ ବୁକ ପ୍ରେସ କ୍ୱାର୍ଟର ନୁହେଁ ବରଂ ଅନ୍ୟାନ୍ୟ ସରକାରୀ କ୍ୱାର୍ଟରର ମଧ୍ୟ ସମାନ ଅବସ୍ଥା ବୋଲି ଅଭିଯୋଗ ହୋଇଛି। ବହୁ କ୍ୱାର୍ଟର ସରକାରୀ କର୍ମଚାରୀଙ୍କୁ ଆଲର୍ଟ ହୋଇଥିବା ବେଳେ ସେମାନେ ଏହାକୁ ଭଡାରେ ଲଗାଇଛନ୍ତି। ଏପରିକି କ୍ୱାଟର ପରିସରରେ ଥିବା ଫାଙ୍କା ସ୍ଥାନରେ ବେଆଇନ ନିର୍ମାଣ ହେବା ସହ ଆଖପାଖରେ ମଧ୍ୟ ବାହାର ଲୋକେ ଗୃହ ନିର୍ମାଣ କରି ଭଡା ଲଗାଉଥିବା ଅଭିଯୋଗ କରିଛି ସିଟିଜେନ୍ସ ଫୋରମ। ସେପଟେ ଟେକ୍ସଟ ବୁକ ପ୍ରେସ କ୍ବାର୍ଟରରେ ଯଦି ବେଆଇନ ଭାବେ କିଛି ନିର୍ମାଣ ହୋଇଥାଏ ତାହେଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ନିର୍ଦେଶକ କହିଛନ୍ତି। ଏପରିକି କ୍ୱାଟର ସବୁ ପୁରୁଣା ହୋଇଯାଇ ଥିବାରୁ ନୂତନ ଭାବେ ମଲ୍ଟିଷ୍ଟୋରେଡ଼ ବିଲ୍ଡିଂ କରି କ୍ବାର୍ଟର କରିବାକୁ ବିଭାଗକୁ ଅବଗତ କରାଯାଇଥିବା କହିଛନ୍ତି ଟେକ୍ସଟ ବୁକ ପ୍ରେସ ନିର୍ଦେଶକ। ଏସବୁ କ୍ବାର୍ଟର ଗୁଡିକ ବେଆଇନ ଭାବେ ନିର୍ମାଣ ହେବା ସହ ସେଠାରେ ବେଆଇନ କାର୍ଯ୍ୟ ମଧ୍ୟ ଚାଲୁଥିବା ଅଭିଯୋଗ ହୋଇଛି। ତେଣୁ ତୁରନ୍ତ ଏ ନେଇ କାର୍ଯ୍ୟାନୁଷ୍ଠାନ ନେବାକୁ ସରକାରଙ୍କ ନିକଟରେ ଲିଖିତ ଭାବେ ଦାବି କରାଯାଇଛି।
ଭାରତ-ଦକ୍ଷିଣ ଆଫ୍ରିକା ଟି-୨୦ ମ୍ୟାଚ ପାଇଁ ସଜେଇ ହେଲାଣି କଟକ ବାରବାଟୀ ଷ୍ଟାଡିୟମ
ସଜେଇ ହେଲାଣି କଟକ ବାରବାଟୀ ଷ୍ଟାଡିୟମ । ଡିସେମ୍ବର ୯ ତାରିଖରେ ଖେଳାଯିବ ଭାରତ-ଦକ୍ଷିଣ ଆଫ୍ରିକା ଅନ୍ତର୍ଜାତିକ ଟି-ଟ୍ବେଣ୍ଟି କ୍ରିକେଟ । ଏଥିପାଇଁ ଷ୍ଟାଡିୟମର ସୁରକ୍ଷା ଓ ଭିତ୍ତିଭୂମି ପରଖିବା ପାଇଁ ଆଜି IIT ଭୁବନେଶ୍ଵରର ଏକ ବୈଷୟିକ ଟିମ ବାରବାଟୀ ପରିଦର୍ଶନ କରିଛନ୍ତି । ୭ଟି ଯାକ ଗ୍ୟାଲେରୀ, ପୁରୁଣା ପାଭିଲିୟନ, କର୍ପୋରେଟ ବକ୍ସ, ଓସିଏ ବିଲଡିଂ ବୁଲି ଭିତ୍ତିଭୂମୀ ଉପରେ ଏକ ସାର୍ଟିଫିକେଟ ୬ ତାରିଖରେ ସରକାରଙ୍କୁ ଦେବେ । ବିଶେଷ କରି ୬ ଓ ୭ ଗ୍ୟାଲେରୀ ଦୁଇଟି ଟିକେ ବିପଦସଂକୁଳ ଥିଲା। ତାର ନବୀ କରଣ କରାଯାଇଥିବାବେଳେ ଏହାକୁ ପରୀକ୍ଷା କରିଛନ୍ତି ଟିମ୍ । ଥାଇଲାଣ୍ଡ ଓ କାନାଡାର ବୈଷୟିକ ସହାୟତାରେ ୨୦୧୯ ମସିହାରେ ୭ ନମ୍ବର ଗ୍ୟାଲେରୀ କାମ ଆରମ ହୋଇଥିଲା । ୨୦୨୨ ରେ ଏହା ସରିବା ପରେ ଆଉ ଦର୍ଶକଙ୍କ ବସିବା ନେଇ କିଛି ଅସୁବିଧା ନାହିଁ । ସେପଟେ ଦୀର୍ଘଦିନ ପରେ ପୁଣି ଥରେ ଅନ୍ତର୍ଜାତୀୟ ଖେଳ ହେଉଥିବାରୁ କ୍ରୀଡ଼ାପ୍ରେମୀଙ୍କ ମଧ୍ଯରେ ଉତ୍ସାହ ପ୍ରକାଶ ପାଇଛି ।
ଖୁବଶୀଘ୍ର ଶ୍ରୀମନ୍ଦିର ରତ୍ନ ଭଣ୍ଡାରର ହେବ ଗଣତି ମଣତି: ଦିବ୍ୟାଙ୍ଗ ଦର୍ଶନ ପାଇଁ ହେବ ସ୍ବତନ୍ତ୍ର ବ୍ୟବସ୍ଥା
ଖୁବଶୀଙ୍କ ଶ୍ରୀମନ୍ଦିର ରତ୍ନ ଭଣ୍ଡାରର ହେବ ଗଣତି ମଣତି । ଦିବ୍ୟାଙ୍ଗ ଦର୍ଶନ ପାଇଁ ହେବ ସ୍ବତନ୍ତ୍ର ବ୍ୟବସ୍ଥା । ଇସ୍କନ ଅଦିନିଆ ରଥଯାତ୍ରାକୁ ବିରୋଧ । ଶ୍ରୀମନ୍ଦିର ପରିଚାଳନା କମିଟି ବୈଠକରେ ୫ଟି ବିଶୟ ନେଇ ହୋଇଛି ଗୁରୁତ୍ବପୂର୍ଣ୍ଣ ଆଲୋଚନା । ନୀତି ବହୁଳ ନଥିବା ସମୟରେ ରତ୍ନଭଣ୍ଡାର ଅଳଙ୍କାର ଗଣତି ମଣତି କରାଯିବ l ଗଣତି ମଣତି ପୂର୍ବରୁ ବୈଠକ ବସି ନିଆଯିବ ନିଷ୍ପତ୍ତି l ବିଭିନ୍ନ ପର୍ଯ୍ୟାୟରେ ହେବ ରତ୍ନ ଅଳଙ୍କାରର ଗଣତି ମଣତି କରାଯିବ l ଅକ୍ଷୟ ତୃତୀୟା ପୂର୍ବରୁ ଗଣତି ମଣତି ଲାଗି ସେବାୟତ ମନେ ପ୍ରସ୍ତାବ ଦେଇଛନ୍ତି l ସୁନାବେଶ ପାଇଁ ସ୍ଵର୍ଣ୍ଣ ଅଳଙ୍କାରର ଏକ ନୂତନ ସେଟ ନିର୍ମାଣ ପାଇଁ ବୈଠକରେ ଆଲୋଚନା କରାଯାଇଛି l ଅଭଡ଼ା ଯୋଜନାରେ ଖ୍ୟାତି ସମ୍ପର୍ଣ୍ଣ ଅନୁଷ୍ଠାନ ପକ୍ଷରୁ ପରାମର୍ଶ ନିଆଯାଇ କାଠ ରାମ୍ପ ତିଆରି କରାଯାଇଛି । ଏମାର ମଠର ରୁପା ଇଟା ସବୁ ଶ୍ରୀଜଗନ୍ନାଥ ମନ୍ଦିର ଅଧୀନକୁ ଅଣାଯିବାକୁ ଯୋଜନା ପ୍ରସ୍ତୁତ କରାଯାଇଛି ।
ଅର୍ଥ ସବ-କମିଟିରେ ପାସ ହୋଇଛି ବଜେଟ l ୨୦୨୪- ୨୦୨୫ ଆର୍ଥିକ ବର୍ଷର ୧୦୪ କୋଟିର ବଳକା ବଜେଟ ହୋଇଛି l ବାହାର ରତ୍ନ ଭଣ୍ଡାର ଦ୍ଵାର ରୁପା ଛାଉଣୀ ପାଇଁ ଆରମ୍ଭ ହୋଇଛି ପ୍ରକ୍ରିୟା l ପୁରୀର ବିଭିନ୍ନ ATMରେ ଭକ୍ତଙ୍କୁ ମନ୍ଦିରକୁ ଦାନ କରିବା ଲାଗି ମେସେଜ ରହିବ l ଖୁବଶୀଘ୍ର ଶ୍ରଦ୍ଧାଳୁଙ୍କ ପାଇଁ ଖୋଲିବ ଶ୍ରୀଗୁଣ୍ଡିଚା ମନ୍ଦିର । ଶ୍ରୀଜଗନ୍ନାଥ ମନ୍ଦିର ଆଇନକୁ କଡାକଡି କରାଯିବ l ଦିବ୍ୟାଙ୍ଗ ମାନଙ୍କ ଦର୍ଶନ ଲାଗି ହୋଇଛି ଆଲୋଚନା l ଅଦିନିଆ ରଥଯାତ୍ରା ନେଇ କ୍ଷୋଭ ପ୍ରକାଶ କରି ଇସ୍କନ କର୍ତ୍ତୃପକ୍ଷଙ୍କ ଚିଠି ଲେଖିଛନ୍ତି ଗଜପତି ମହାରାଜା । ସେବାୟତ କଲ୍ୟାଣ ପାଣ୍ଠି ନେଇ ପେନସନ ରାଶି ବୃଦ୍ଧି କରାଯାଇଛି l ବରିଷ୍ଠ ସେବାୟତଙ୍କୁ ୪ହଜାର ପରିବର୍ତ୍ତେ ୫ହଜାର ଦିଆଯିବ l ସେବାୟତଙ୍କ ଝିଅ ବିବାହ ଲାଗି ସହାୟତା ରାଶି ୫୦ ହଜାରୁ ୧ ଲକ୍ଷ କରାଯାଇଛି l ପୁରୀବାସୀଙ୍କ ଶୃଙ୍ଖଳିତ ଦର୍ଶନ ଲାଗି ସ୍ୱତନ୍ତ୍ର ଗାଇଡ଼ ଲାଇନ ପ୍ରସ୍ତୁତ କରାଯିବ l ଗଜପତି ମହାରାଜାଙ୍କ ଅଧ୍ୟକ୍ଷତାରେ ଏହି ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ସୁରକ୍ଷା ସବକମିଟି ମୁଖ୍ୟ, ଜିଲ୍ଲାପାଳ, ଏସପିଙ୍କ ସମେତ କମିଟିର ସଦସ୍ୟ ଉପସ୍ଥିତ ଥିଲେ ।