ନନ୍ଦିଘୋଷ ବ୍ୟୁରୋ : ଦିଲ୍ଲୀ କର୍ଦମପୁରୀ ଅଞ୍ଚଳରେ ରକ୍ତପାତ। କର୍ଦମପୁରୀ ଅନ୍ତର୍ଗତ ଜ୍ୟୋତି ନଗରରେ ଜଣେ ୧୫ ବର୍ଷ ବାଳକକୁ ଛୁରୀ ଭୁସି କରାଯାଇଛି ହତ୍ୟା। ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳକୁ କେନ୍ଦ୍ର କରି ବାଳକର ଯାଇଛି ପ୍ରାଣ। ଏହି ଘଟଣାରେ ପୋଲିସ ୨ ଜଣଙ୍କୁ ଗିରଫ କରିଛି। ଗତରାତିରେ ସେ ଘରେ ଖାଇବସିଥିବାବେଳେ ତାକୁ ଜଣେ ସାଂଗ ବାହାରକୁ ଡାକିଥିଲା। ପରେ ତାକୁ ଘରେ ବାହାରେ ଛୁରୀ ଭୁସାଯାଇଥିଲା। ଗୁରୁତର ଅବସ୍ଥାରେ ତାକୁ ଜିଟିବି ହସ୍ପିଟାଲକୁ ନିଆଯାଇଥିଲା। ମାତ୍ର ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ। କର୍ଦମପୁରୀର ଆମ୍ବେଦକର କଲେଜ ପଛପଟେ ଘଟିଛି ଘଟଣା। ଏହି ଘଟଣାରେ ଜଣେ ଅଭିଯୁକ୍ତ ନାବାଳକ ବୋଲି ପୋଲିସ ସୂଚନା ଦେଇଛି।
ଦିଲ୍ଲୀ କାର ବିସ୍ଫୋରଣ ଘଟଣା ; ଗିରଫ ଡାକ୍ତର ଆଦିଲ ଅହମ୍ମଦ ରାଥେରର ଭାଇ ମୁଜାଫର ରାଥେରକୁ ଧରିବା ଲାଗି ରେଡ
ନନ୍ଦିଘୋଷ ବ୍ୟୁରୋ : ଦିଲ୍ଲୀ କାର ବିସ୍ଫୋରଣ ଘଟଣା। ଗିରଫ ଡାକ୍ତର ଆଦିଲ ଅହମ୍ମଦ ରାଥେରର ଭାଇ ମୁଜାଫର ଅହମ୍ମଦ ରାଥେରକୁ ଧରିବା ଲାଗି ରେଡ। ମୁଜାଫର ବି ହ୍ବାଇଟ କୋଲାର ଟେରର ମଡ୍ୟୁଲରେ ସାମିଲ ଥିବା ଜଣାପଡିବା ପରେ ଜାମ୍ମୁ ଓ କାଶ୍ମୀର କାଜିଗଣ୍ଡ କୁଲଗାମରେ ରେଡ କରିଛି ଏସଆଇଏ ଓ ଜେକେପି। ମୁଜାଫର ଅହମ୍ମଦ ଜଣେ ଶିଶୁ ବିଭାଗ ଡାକ୍ତର ବୋଲି ସୂଚନା ମିଳିଛି। ସେ ଜୈସ ସଂଗଠନ ଲାଗି କାମ କରୁଥିଲା।ସେ ଆତଙ୍କ କାର୍ଯ୍ୟକଳାପ ଲାଗି ପାଣ୍ଠି ଯୋଗାଡଠାରୁ ଆରମ୍ଭ କରି ବିଭିନ୍ନ ସହଯୋଗ କରିଆସୁଥିଲା। ସେ ଟେଲିଗ୍ରାମ ଜରିଆରେ ଅନ୍ୟ ଆତଙ୍କୀଙ୍କ ସହ ସମ୍ପର୍କ ରକ୍ଷା କରିଆସୁଥିଲା। ଗତ ଅଗଷ୍ଟରେ ସେ ଦୁବାଇ ଚାଲିଯାଇ ସେଠାରୁ ଆଫଗାନିସ୍ତାନକୁ ଚାଲି ଯାଇଥିବା କୁହାଯାଉଛି। ତା ଘର ଦକ୍ଷିଣ କାଶ୍ମୀରର କାଜିଗଣ୍ଡ ଅଞ୍ଚଳରେ। ଜାମ୍ମୁ ଓ କାଶ୍ମୀର ପୋଲିସର ଷ୍ଟେଟ ଇନଭେଷ୍ଟିଗେସନ ଏଜେନ୍ସି ବା ଏସଆଇଏ ପକ୍ଷରୁ ଏହି ରେଡ ହୋଇଛି। ତା ବିରୋଧରେ ରେଡ କର୍ଣ୍ଣର ନୋଟିସ ଜାରି ହୋଇଥିବାବେଳେ ତାର ନାଁକୁ ନ୍ୟାସନାଲ ମେଡିକାଲ କମିଶନରୁ ବାଦ୍ ଦିଆଯାଇଛି। କିଛି ଦିନ ତଳେ ତାର ଭାଇ ଡାକ୍ତର ଆଦିଲ ଅହମ୍ମଦ ରାଥେରକୁ ଉତ୍ତରପ୍ରଦେଶ ଶାହାରନପୁରରୁ ଗିରଫ କରାଯାଇସାରିଛି।
ନେପାଳରେ ସ୍ଥିତି ସ୍ବାଭାବିକ ; ନେପାଳ ବାରା ଜିଲ୍ଲାରେ ଫେରିଛି ସ୍ବାଭାବିକ ସ୍ଥିତି
ନନ୍ଦିଘୋଷ ବ୍ୟୁରୋ : ନେପାଳ ବାରା ଜିଲ୍ଲାରେ ଫେରିଛି ସ୍ବାଭାବିକ ସ୍ଥିତି। ଜେନ ଜେଡ ଆନ୍ଦୋଳନକାରୀ ଓ କମ୍ୟୁନିଷ୍ଟ ପାର୍ଟି ଅଫ ନେପାଳ(ୟୁଏମଏଲ) ମଧ୍ଯରେ ହିଂସା ସୃଷ୍ଟି ହେବା ପରେ ବାରା ଜିଲ୍ଲାରେ ଜାରି ହୋଇଥିବା କର୍ଫ୍ୟୁ ପ୍ରତ୍ୟାହାର କରିନିଆଯାଇଛି। ଫଳରେ ସିମରା ବଜାର ସମେତ ଅନ୍ୟାନ୍ୟ ଅଞ୍ଚଳରେ ସ୍ବାଭାବିକ ଅବସ୍ଥା ଫେରିଛି। ଗତ ଦୁଇ ଦିନ ଧରି ଚାଲିଥିବା ହିଂସା ଯୋଗୁ ବାରା ଜିଲ୍ଲାରେ ଅସ୍ଥିରତା ସୃଷ୍ଟି ହୋଇଥିଲା। ସିମରା ସମେତ ଅନେକ ସ୍ଥାନରେ ପ୍ରଶାସନ ପକ୍ଷରୁ କର୍ଫ୍ୟୁ ଲାଗୁ କରାଯାଇଥିଲା। ସିମରା ଚୌକ ସମେତ ଅନ୍ୟାନ୍ୟ ସ୍ଥାନରେ ପୋଲିସ ମୁତୟନ କରାଯାଇଛି। ଗତ ବୁଧବାର ହୋଇଥିବା ସଂଘର୍ଷରେ ଜଡିତ ଅଭିଯୁକ୍ତମାନଙ୍କୁ ଗିରଫ କରିବାରେ ପୋଲିସ ବିଫଳ ହେବା ଯୋଗୁ ଜେନ ଜେଡ ଆନ୍ଦୋଳନ ଆରମ୍ଭ ହୋଇଥିଲା। ପରେ ୨ ଅଭିଯୁକ୍ତଙ୍କୁ ଗିରଫ କରିଥିଲା ପୋଲିସ। ଗତ ବୁଧବାର ହିଂସାରେ ଜେନ ଜେଡର ୬ ଆନ୍ଦୋଳନକାରୀ ଆହତ ହେବା ପରେ ଉତ୍ତେଜନା ପ୍ରକାଶ ପାଇଥିଲା। କମ୍ୟୁନିଷ୍ଟ ପାର୍ଟି ଅଫ ନେପାଳ(ୟୁଏମଏଲ) ପକ୍ଷରୁ ଏକ ଯୁବ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ ହେବାକୁ ଯାଉଥିବାବେଳେ ଏହାକୁ ନେଇ ଗତ ବୁଧବାର ହିଂସାକାଣ୍ଡ ସୃଷ୍ଟି ହୋଇଥିଲା। ପରେ ଗତ ୨୦ ତାରିଖରେ ଜେନ ଜେଡ ଆନ୍ଦୋଳକାରୀ ରାସ୍ତାକୁ ଓହ୍ଲାଇବା ଯୋଗୁ ସ୍ଥିତି ବେହାଲ ହୋଇଥିଲା।
କଟକରେ ଡବଲ ମର୍ଡର ; ଦରଘାବଜାର ଓଲ୍ଡ ଜେଲ୍ କଲୋନୀରେ ହତ୍ୟାକାଣ୍ଡ
ନନ୍ଦିଘୋଷ ବ୍ୟୁରୋ : ପାରିବାରିକ ବିବାଦରୁ ବାପା ଓ ମାଆଙ୍କୁ ହତ୍ୟା। କଟକ ଡବଲ ମର୍ଡର ଘଟଣାରେ ପ୍ରତିକ୍ରିୟା ରଖିଛନ୍ତି କଟକ ଡିସିପି। କଟକ ଦରଘାବଜାର ଓଲ୍ଡ ଜେଲ୍ କଲୋନୀରେ ବାପା ଓ ସାବତ ମାଆକୁ ଅତି ନିର୍ମମ ଭାବେ ହତ୍ୟା କରିଥିଲା ପୁଅ। ବାପା ମାଆଙ୍କୁ ହତ୍ୟା କରିବା ପରେ ସ୍ତ୍ରୀକୁ କଲ୍ କରି କହିଲା ସବୁକଥା। କଟକ ଓଲ୍ଡ ଜେଲ୍ କଲୋନୀରେ ଦୀପକ କୁମାର ଦାସ ଓ ତାଙ୍କ ପତ୍ନୀ ରିତାରାଣୀ ଦାସ ରହିଆସୁଥିଲେ। ଜମିବାଡିକୁ ନେଇ ପୁଅ ଆଲୋକ କୁମାର ଦାସଙ୍କ ସହ ବିବାଦ ଲାଗି ରହିଥିଲା। ଆଉ ଏହି ବିବାଦ ଗତକାଲି ରାତିରେ ନେଇଥିଲା ଉଗ୍ରରୂପ। ଧାରୁଆ ଛୁରୀରେ ପ୍ରଥମେ ସାବତ ମାଆକୁ ହାଣି ହତ୍ୟା କରିବା ପରେ ବାପା ଯେତେବେଳେ ଆସି ପହଞ୍ଚିଥିଲେ ତାଙ୍କୁ ଅତର୍କିତ ଭାବେ ଆକ୍ରମଣ କରି ନୃଶଂସ ଭାବେ ହତ୍ୟା କରିଥିଲା। ଦୁଇ ମରଶରୀରକୁ ବ୍ୟବଚ୍ଛେଦ ପାଇଁ ଏସସିବି ମେଡିକାଲକୁ ପଠାଇଛି ପୋଲିସ। ହତ୍ୟାକାରୀ ପୁଅକୁ ଅଟକ ରଖି ପଚରାଉଚରା କରୁଛି ପୋଲିସ। ଏହାଛଡ଼ା ଅଭିଯୁକ୍ତଙ୍କ ଠାରୁ ତାଙ୍କ ବାପା କିଛି ଟଙ୍କା ନେଇଥିଲେ । ଯେଉଁଥିପାଇଁ ଏ ଅମାନବୀୟ ଘଟଣା ଘଟିଛି। ହତ୍ୟାରେ ବ୍ୟବହୃତ ଧାରୁଆ ଛୁରୀ ଜବତ୍ ହୋଇଛି। ଏହା ସମ୍ପୂର୍ଣ ଏକ ସୁଚିନ୍ତିତ ହତ୍ୟାକାଣ୍ଡ ।ହତ୍ୟାକାଣ୍ଡରେ କେବଳ ପୁଅ ଆଲୋକ ଦାସ ଥିଲା ନା ଆଉ କାହାରି ହାତ ରହିଛି ଏନେଇ ସିସିଟିଭି ଫୁଟେଜ ଯାଞ୍ଚ କରୁଛି ପୋଲିସ।
ସତ ମାନୁଛି ମୁଜାମିଲ ସକିଲ ; ୧୦/୧୧ ବ୍ଲାଷ୍ଟ ଲାଗି ୨୦୨୩ରୁ ହୋଇଥିଲା ଯୋଜନା
ନନ୍ଦିଘୋଷ ବ୍ୟୁରୋ : ୧୦/୧୧ ବ୍ଲାଷ୍ଟ ଲାଗି ୨୦୨୩ରୁ ହୋଇଥିଲା ଯୋଜନା। କେବଳ ଦିଲ୍ଲୀ ନୁହେଁ ଦେଶର ବିଭିନ୍ନ ଭାଗରେ ବିସ୍ଫୋରଣ ଲାଗି ଜୈସ-ଏ-ମହମ୍ମଦ ସଂଗଠନ ପକ୍ଷରୁ ହୋଇଥିଲା ବ୍ଲୁପ୍ରିଣ୍ଟ। ଜେରା ବେଳେ ଏହା ସ୍ବୀକାର କରିଛନ୍ତି ଜଣେ ଅଭିଯୁକ୍ତ। ଏନଆଇଏ ହେପାଜତରେ ଥିବା ଡାକ୍ତର ମୁଜାମିଲ ସକିଲ ଜେରା ବେଳେ କହିଛି- ବିସ୍ଫୋରଣ ଲାଗି ଗତ ୨ ବର୍ଷ ଧରି ସେ ଯୋଜନା କରିଆସୁଥିଲା। ଏହି ୨ ବର୍ଷରେ ସେ ବିସ୍ଫୋରକ, ରିମୋଟ ଓ ବୋମା ତିଆରି ସାମଗ୍ରୀ ସଂଗ୍ରହ କରୁଥିଲା। ଏପରିକି ୟୁରିଆ ଓ ଆମୋନିୟମ ନାଇଟ୍ରେଟ କିଣିବା ଲାଗି ନିର୍ଦ୍ଦେଶ ଦିଆଯାଇଥିଲା। ନିର୍ଦ୍ଦେଶ ଅନୁସାରେ ମୁଜାମିଲ ୨୬ କୁଇଣ୍ଟାଲ ଏନପିକେ ଫର୍ଟିଲାଇଜର ୩ ଲକ୍ଷ ଟଙ୍କା ଦେଇ ଗୁରୁଗ୍ରାମ ଓ ହରିଆଣା ନୁହରୁ କ୍ରୟ କରିଥିଲା। ଫରିଦାବାଦରୁ ଇଲେକ୍ଟ୍ରୋନିକ ସାମଗ୍ରୀ ସେ କିଣିଥିଲା। ରାସାୟନିକ ପଦାର୍ଥ ସଞ୍ଚିତ କରି ରଖିବା ଲାଗି ସେ ଡିପ ଫ୍ରିଜ ବି କିଣିଥିଲା। ବିଭିନ୍ନ ସାମଗ୍ରୀକୁ ମିଶାଇବା ଲାଗି ସେ ଯେଉଁ ଫ୍ଲୋର ମିଲ ବ୍ୟବହାର କରୁଥିଲା ତାହାକୁ ବି ଜବତ କରାଯାଇଛି। ବିସ୍ଫୋରକ କ୍ରୟ ଲାଗି ୨୬ ଲକ୍ଷ ଟଙ୍କା ଯୋଗାଡ଼ କରାଯାଇଥିଲା। ଏହି ଟଙ୍କାକୁ ପରେ ଉମର ନବିକୁ ଦିଆଯାଇଥିଲା। ବିସ୍ଫୋରଣ ଯୋଜନା ଲାଗି ନିଜେ ଉମର ବି ୨ ଲକ୍ଷ ଟଙ୍କା ଦେଇଥିଲା। ମୁଜାମିଲ ସକିଲ ୫ ଲକ୍ଷ ଟଙ୍କା ଦେଇଥିବାବେଳେ ଆଦିଲ ରାଥେର ୮ ଲକ୍ଷ ଟଙ୍କା ଓ ମୁଜାଫର ରାଥରେ ୬ ଲକ୍ଷ ଟଙ୍କା ଦେଇଥିଲା। ସାହିନ ସକିଲ ଦେଇଥିଲା ୫ ଲକ୍ଷ ଟଙ୍କା। ସାଢ଼େ ୬ ଲକ୍ଷ ଟଙ୍କା ଦେଇ ମୁଜାମିଲ ଏକ AK-47 ରାଇଫଲ କ୍ରୟ କରିଥିଲା ଯାହାକୁ ଆଦିଲ ରାଥେରର ଲକରରୁ ଜବତ କରାଯାଇଛି। ତେହରିକ-ଇ-ତାଲିବାନ ପାକିସ୍ତାନ ସହ ସମ୍ପର୍କିତ ଓକାସାର ନିର୍ଦ୍ଦେଶ କ୍ରମେ ମୁଜାମିଲ, ଆଦିଲ ଓ ମୁଜାଫର ତୁର୍କୀ ଯାଇଥିଲେ। ଟେଲିଗ୍ରାମ ଜରିଆରେ ମୁଜାମିଲକୁ ଯୋଗାଯୋଗ କରିଥିଲା ଓକାସା। ଗତ ୧୦ ତାରିଖ ଲାଲକିଲ୍ଲା ନିକଟ ବିସ୍ଫୋରଣରେ ଆଇ-ଟ୍ବେଣ୍ଟି କାର ବିସ୍ଫୋରଣ ଘଟଣାରେ ଯାଇଥିଲା ୧୩ ଜୀବନ। ଆହତ ହୋଇଥିଲେ ୨୫ରୁ ଅଧିକ ଲୋକ।
ଇଣ୍ଡିଆ –ଏ ବନାମ ବାଂଲାଦେଶ -ଏ ସେମି-ଫାଇନାଲ ; ବିନା ରନ୍ କରି ସେମିଫାଇନାଲ ଜିତିଲା ବାଂଲାଦେଶ
ନନ୍ଦିଘୋଷ ବ୍ୟୁରୋ :ଏସିଆ କପ ରାଇଜିଂ ଷ୍ଟାର୍ସ ୨୦୨୫ରେ ଭାରତ ଏର ଯାତ୍ରା ଶେଷ ହୋଇଛି। ବାଂଲାଦେଶ ଏ ବିପକ୍ଷରେ ଏକ ରୋମାଞ୍ଚକର ସେମିଫାଇନାଲ ମ୍ୟାଚରେ ଭାରତ ଏ ସୁପର ଓଭରରେ ପରାସ୍ତ ହୋଇ ଟୁର୍ନାମେଣ୍ଟରୁ ବାଦ ପଡିଛି। ପ୍ରଥମେ ବ୍ୟାଟିଂ କରି, ବାଂଲାଦେଶ ଏ ୧୯୪ ରନ କରିଥିଲା। ଜବାବରେ ଟିମ ଇଣ୍ଡିଆ ୨୦ ଓଭରରେ ସମାନ ସଂଖ୍ୟକ ରନ କରିଥିଲା। ଭାରତ ଏ ଶେଷ ବଲରେ ମ୍ୟାଚ ଟାଇ କରିଥିଲା କିନ୍ତୁ ସୁପର ଓଭରରେ ଜିତିବାର ସୁଯୋଗ ହରାଇଥିଲା। ଭାରତୀୟ ଦଳ ସୁପର ଓଭରରେ ଗୋଟିଏ ବି ରନ କରିପାରି ନ ଥିଲା, ଏବଂ ତା’ପରେ ଏକ ୱାଇଡ ବଲ ବାଂଲାଦେଶକୁ ବିଜୟ ପାଇଁ ଆବଶ୍ୟକ ଗୋଟିଏ ରନ ସୁରକ୍ଷିତ କରିବାକୁ ଅନୁମତି ଦେଇଥିଲା, ଯାହା ଫାଇନାଲରେ ସ୍ଥାନ ପକ୍କା କରିଥିଲା।
ଦୋହାର ୱେଷ୍ଟ ଏଣ୍ଡ ଇଣ୍ଟରନ୍ୟାସନାଲ ଷ୍ଟାଡିୟମରେ ବାଂଲାଦେଶ ଏ ପ୍ରଥମେ ବ୍ୟାଟିଂ କରି ଦମଦାର ଆରମ୍ଭ କରିଥିଲେ। ଓପନର ହବିବୁର ରହମାନ ମାତ୍ର ୪୬ ବଲରେ ୬୫ ରନ କରିଥିଲେ, ଯେତେବେଳେ ତାଙ୍କ ସାଥୀ ଜିଶାନ ଆଲାମ ମଧ୍ୟ ଏକ ଦୃଢ଼ ଆରମ୍ଭ ପ୍ରଦାନ କରିଥିଲେ, ୧୪ ବଲରେ ୨୬ ରନ କରିଥିଲେ। ତଥାପି, ଭାରତ ଏ ମଧ୍ୟ ଓଭରରେ ଏକ ଦୃଢ଼ ପ୍ରତ୍ୟାବର୍ତ୍ତନ କରିଥିଲା, ୧୬.୨ ଓଭରରେ ୬ ଉଇକେଟ ହରାଇ କେବଳ ୧୩୦ ରନ କରିଥିଲା।
କିନ୍ତୁ ତା’ପରେ ଏସଏମ ମେହରୋବ ହାସନଙ୍କ ବ୍ୟାଟର ଝଡ଼ ଆସିଥିଲା। ଏହି ବ୍ୟାଟସମ୍ୟାନ ମାତ୍ର ୧୮ ବଲ୍ରେ ଛଅଟି ଛକା ଏବଂ ଗୋଟିଏ ଚୌକା ମାରି ଦ୍ରୁତ ୪୮ ରନ କରିଥିଲେ। ଏହା ବାଂଲାଦେଶ ଏ’କୁ ୧୯୪ ରନ୍ରେ ପହଞ୍ଚିବାରେ ସାହାଯ୍ୟ କରିଥିଲା। ଭାରତ ଏ’ ପକ୍ଷରୁ ଗୁରଜାପନ ସିଂହ ଦୁଇଟି ଉଇକେଟ ନେଇଥିଲେ, କିନ୍ତୁ ସ୍ପିନର ସୁୟାଶ ଶର୍ମା ସବୁଠାରୁ ମଜଭୁତ ପ୍ରମାଣିତ ହୋଇଥିଲେ, ଚାରି ଓଭରରେ ୧୭ ରନ ଦେଇ ଗୋଟିଏ ଉଇକେଟ ନେଇଥିଲେ।
ଟିମ ଇଣ୍ଡିଆ ପାଇଁ, ୧୪ ବର୍ଷୀୟ ବୈଭବ ସୂର୍ଯ୍ୟବଂଶୀ ପୁଣି ଥରେ ଏକ ଚମତ୍କାର ଆରମ୍ଭ କରିଥିଲେ, ପ୍ରଥମ ଓଭରରେ ୧୯ ରନ କରିଥିଲେ। ପ୍ରଥମ ଓଭରରେ ଦୁଇଟି ଛକା ମାରିଥିବା ବୈଭବ ଦ୍ୱିତୀୟ ଓଭରରେ ଦୁଇଟି ଛକା ମାରିଥିଲେ ଏବଂ ଖୁବ ଶୀଘ୍ର ଟିମ ଇଣ୍ଡିଆ ୩.୧ ଓଭରରେ ୫୦ ରନ୍ରେ ପହଞ୍ଚି ଯାଇଥିଲା। ଯଦିଓ ବୈଭବ (୩୮ ରନ, ୧୫ ବଲ) ସେହି ଓଭରରେ ଆଉଟ ହୋଇଥିଲେ। ପ୍ରିୟାଂଶ ଆର୍ଯ୍ୟ (୪୪ ରନ, ୨୩ ବଲ) ଆକ୍ରମଣ ଆରମ୍ଭ କରିଥିଲେ ଏବଂ ଛକା ଏବଂ ଚୌକା ବର୍ଷା କରିଥିଲେ। ପ୍ରିୟାଂଶ ୧୦ମ ଓଭରରେ ଆଉଟ ହେବା ପୂର୍ବରୁ ଦଳକୁ ୯୮ ରନରେ ପହଞ୍ଚାଇଥିଲେ।
ଏହି ସମୟ ସୁଦ୍ଧା ଟିମ ଇଣ୍ଡିଆ ତିନୋଟି ଉଇକେଟ ହରାଇ ସାରିଥିଲା, କିନ୍ତୁ ଅଧିନାୟକ ଜିତେଶ ଶର୍ମା ଦାୟିତ୍ୱ ନେଇଥିଲେ ଏବଂ ନେହାଲ ୱାଧେରାଙ୍କ ସହ ମିଶି ଦଳକୁ ୧୫୦ ରନରେ ପହଞ୍ଚାଇଥିଲେ। ତଥାପି, ୧୫ତମ ଓଭରର ଶେଷ ବଲ୍ରେ ଜିତେଶ ଆଉଟ ହୋଇଥିଲେ ଏବଂ ବାଂଲାଦେଶ ପ୍ରତ୍ୟାବର୍ତ୍ତନ କରିଥିଲା, ଯାହା ଭାରତ ଏ’କୁ ସମସ୍ୟାରେ ପକାଇ ଦେଇଥିଲା। ଶେଷ ଓଭରରେ ବିଜୟ ପାଇଁ ୧୬ ରନ ଆବଶ୍ୟକ କରୁଥିବା ବେଳେ, ଆଶୁତୋଷ ଶର୍ମା ତୃତୀୟ ବଲ୍ରେ ଛକା ମାରିଥିଲେ। ଆଶୁତୋଷ ପରବର୍ତ୍ତୀ ବଲ୍ରେ ଚୌକା ମାରିଥିଲେ। ବର୍ତ୍ତମାନ, ଦୁଇଟି ବଲ୍ରୁ ଚାରି ରନ ଆବଶ୍ୟକ ଥିଲା, କିନ୍ତୁ ପଞ୍ଚମ ବଲ୍ରେ ଆଶୁତୋଷ ବୋଲ୍ଡ ହୋଇଥିଲେ।
ଶେଷ ବଲ୍ରେ ଆସି ହର୍ଷ ଦୁବେ ଫିଲ୍ଡରଙ୍କ ଆଡ଼କୁ ସିଧାସଳଖ ସଟ ଖେଳିଥିଲେ, କିନ୍ତୁ ଭାରତୀୟ ବ୍ୟାଟସମ୍ୟାନମାନେ ଦୁଇ ରନ ପାଇଁ ଦୌଡ଼ିଥିଲେ। ବାଂଲାଦେଶ କିପର ରନ-ଆଉଟ ଚେଷ୍ଟା କରିବାର ଭୁଲ କରିଥିଲେ ଏବଂ ବିଫଳ ହୋଇଥିଲେ, ଯାହା ଭାରତୀୟ ବ୍ୟାଟସମ୍ୟାନମାନଙ୍କୁ ତୃତୀୟ ରନ ପୂରଣ କରିବାକୁ ଅନୁମତି ଦେଇଥିଲା। ଫଳରେ ମ୍ୟାଚ୍ ଟାଇ ହୋଇଥିଲା। ସୁପର ଓଭର ଦ୍ୱାରା ମ୍ୟାଚ୍ର ଫଳାଫଳ ବାହାରିଥିଲା।
ସୁପର ଓଭରରେ, ଭାରତ ଏ ପ୍ରଥମେ ବ୍ୟାଟିଂ କରିଥିଲା, ଅଧିନାୟକ ଜିତେଶ ଶର୍ମା ପ୍ରଥମେ ଆସିଥିଲେ। ତଥାପି, ସେ ପ୍ରଥମ ବଲ ରେ ବୋଲ୍ଡ ହୋଇଥିଲେ। ଆଶୁତୋଷ ନୂତନ ବ୍ୟାଟସମ୍ୟାନ ଭାବରେ ଆସିଥିଲେ ଏବଂ ସେ ମଧ୍ୟ ଦ୍ୱିତୀୟ ବଲରେ କ୍ୟାଚ ଆଉଟ୍ ହୋଇଥିଲେ। ଫଳସ୍ବରୂପ, ଭାରତ ଏ ସେମାନଙ୍କର ସୁପର ଓଭରରେ ଗୋଟିଏ ବି ରନ କରିପାରି ନ ଥିଲା। ବାଂଲାଦେଶକୁ କେବଳ ଗୋଟିଏ ରନ ଆବଶ୍ୟକ ଥିଲା, କିନ୍ତୁ ସେମାନେ ପ୍ରଥମ ବଲରେ ଏକ ଉଇକେଟ ମଧ୍ୟ ହରାଇଥିଲେ। ସୁୟାଶ ଶର୍ମା ଉଇକେଟ ନେଇଥିଲେ। ତାଙ୍କର ପରବର୍ତ୍ତୀ ବଲ ୱାଇଡ ଥିଲା, ଯାହା ଫଳରେ ବାଂଲାଦେଶ କେବଳ ଗୋଟିଏ ରନ କରି ମ୍ୟାଚ ଶେଷ କରିଥିଲା।
ଭାରତ ବନାମ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ୍ ମ୍ୟାଚ ; ଭାରତର ଟସ୍ ହାରିବା ଧାରା ଜାରି
ନନ୍ଦିଘୋଷ ବ୍ୟୁରୋ : ଆଜିଠାରୁ ଆରମ୍ଭ ହେବ ଭାରତ ବନାମ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ୍ ମ୍ୟାଚ। ଭାରତୀୟ ଅଧିନାୟକ ଭାବରେ ରିଷଭ ପନ୍ତଙ୍କର ଏହା ପ୍ରଥମ ଟେଷ୍ଟ୍ ହେବ। ଭାରତ ସିରିଜ୍ ରେ ୦-୧ ପଛରେ ଅଛି। ତେଣୁ ସିରିଜ୍ ଡ୍ରରେ ଶେଷ କରିବାକୁ ହେଲେ ଯେକୌଣସି ଭାବେ ଏହି ଟେଷ୍ଟ୍ ଜିତିବାକୁ ପଡିବ। ଦକ୍ଷିଣ ଆଫ୍ରିକାର ବାଭୁମା ପୁଣି ଥରେ ଟେଷ୍ଟ୍ ଅଧିନାୟକ ଭାବରେ ପଡିଆକୁ ଓହ୍ଲାଇବେ। ଗୌହାଟୀ ବରସାପାରା କ୍ରିକେଟ ଷ୍ଟାଡିୟମରେ ହେବାକୁ ଥିବା ଏହି ଟେଷ୍ଟ୍ ର ସମୟ ପ୍ରଥମ ମ୍ୟାଚ୍ ଠାରୁ ଭିନ୍ନ । ଗୌହାଟି ପ୍ରଥମ ଥର ପାଇଁ ଏହି ଟେଷ୍ଟ ମ୍ୟାଚ୍ ଆୟୋଜନ କରିଛି । ରିଷଭ ପନ୍ତ ପ୍ରଥମ ଥର ପାଇଁ ପୂର୍ଣ୍ଣକାଳୀନ ଟେଷ୍ଟ ଅଧିନାୟକ ଭାବରେ କାର୍ଯ୍ୟ କରିବେ। ଦଳର ଅଧିନାୟକତ୍ୱ କରିବାରେ ୩୮ ତମ ଭାରତୀୟ ହେବେ ରିଷଭ। ଶୁଭମନ ଗିଲ ଦ୍ୱିତୀୟ ଟେଷ୍ଟରୁ ବାଦ ପଡ଼ିଛନ୍ତି। ଦକ୍ଷିଣ ଆଫ୍ରିକାର ଦ୍ରୁତ ବୋଲର କାଗିସୋ ରାବାଡା ମଧ୍ୟ ଆଘାତ ଯୋଗୁଁ ମ୍ୟାଚ୍ ଖେଳିବେ ନାହିଁ ବୋଲି ସୂଚନା ରହିଛି।
ଏହି ଟେଷ୍ଟରେ ମଧ୍ୟ ଭାରତର ଟସ୍ ହାରିବା ଧାରା ଜାରି ରହିଛି। ଦକ୍ଷିଣ ଆଫ୍ରିକା ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛି। ତେବେ ଅଧିନାୟକ ଭାବରେ ତାଙ୍କର ପ୍ରଥମ ଟେଷ୍ଟ ଖେଳୁଥିବା ରିଷଭ ପନ୍ତ କହିଛନ୍ତି ଯେ ପ୍ରଥମେ ବୋଲିଂ କରିବା ଏଠାରେ ଏକ ଖରାପ ବିକଳ୍ପ ନୁହେଁ।
ଭାରତର ପ୍ଲେଇଂ୧୧
ଯଶସ୍ବୀ ଜୟସ୍ବାଲ, କେଏଲ ରାହୁଲ, ସାଇ ସୁଦର୍ଶନ, ଧ୍ରୁବ ଜୁରେଲ, ରିଷଭ ପନ୍ତ (ଅଧିନାୟକ ଏବଂ ଉଇକେଟ୍କିପର), ନୀତିଶ କୁମାର ରେଡ୍ଡୀ, ରବିନ୍ଦ୍ର ଜାଡେଜା, ୱାଶିଂଟନ ସୁନ୍ଦର, କୁଲଦୀପ ଯାଦବ, ଜସପ୍ରିତ ବୁମରା, ମହମ୍ମଦ ସିରାଜ।
ଦକ୍ଷିଣ ଆଫ୍ରିକାର ପ୍ଲେଇଂ୧୧
ଏଡେନ ମାର୍କ୍ରମ, ରିଆନ ରିକେଲଟନ, ୱାଇଆନ ମୁଲଡର, ଟୋନି ଡି ଜୋରଜି, ଟେମ୍ବା ବାବମା (ଅଧିନାୟକ), ଟ୍ରିଷ୍ଟାନ ଷ୍ଟବ୍ସ, କାଇଲ ଭେରେନ ( ଉଇକେଟ୍ କିପର), ମାର୍କୋ ଜାନସେନ, ସେନୁରାନ ମୁଥୁସାମି, ସାଇମନ ହାର୍ମର, କେଶବ ମହାରାଜ।
ଲଘୁଚାପର ରୂପ ନେବ ଘୁର୍ଣ୍ଣିବଳୟ ; ୨୬ ତାରିଖ ବେଳକୁ ବଙ୍ଗୋପସାଗରରେ ବାତ୍ୟା ନେଇ ପୂର୍ବାନୁମାନ କରିଛନ୍ତି ବିଭିନ୍ନ ଆନ୍ତର୍ଜାତୀୟ ମଡେଲ
ନନ୍ଦିଘୋଷ ବ୍ୟୁରୋ : ଆଜି ଲଘୁଚାପର ରୂପ ନେବ ଘୁର୍ଣ୍ଣିବଳୟ। ୨୪ ତାରିଖ ବେଳକୁ ଦକ୍ଷିଣ ବଙ୍ଗୋପସାଗରର କେନ୍ଦ୍ରୀୟ ଅଞ୍ଚଳରେ ଅବପାତର ରୂପ ନେବାର ସମ୍ଭାବନା। ପରବର୍ତ୍ତୀ ୪୮ ଘଣ୍ଟାରେ ଆହୁରି ଘନୀଭୂତ ହୋଇପାରେ। ତେବେ ଆସନ୍ତା ୨୬ ତାରିଖ ବେଳକୁ ବଙ୍ଗୋପସାଗରରେ ବାତ୍ୟା ନେଇ ପୂର୍ବାନୁମାନ କରିଛନ୍ତି ବିଭିନ୍ନ ଆନ୍ତର୍ଜାତୀୟ ମଡେଲ I ତେବେ ମାଲାକ୍କା ସମୁଦ୍ର ସନ୍ଧି ନିକଟବର୍ତ୍ତୀ ଅଞ୍ଚଳରେ ସକ୍ରିୟ ଥିବା ଘୁର୍ଣ୍ଣିବଳୟ ଟି ଆଜି ସୁଦ୍ଧା ଲଘୁଚାପର ରୂପ ନେଇ ପାରେ ବୋଲି କହିଛି ଆଞ୍ଚଳିକ ପାଣିପାଗ କେନ୍ଦ୍ର I ତାହା ପରବର୍ତ୍ତୀ ସମୟରେ ବାତ୍ୟାରେ ପରିଣତ ହୋଇପାରେ। ଲଘୁଚାପ ସୃଷ୍ଟି ହେବା ପରେ ଅଧିକ ସ୍ପଷ୍ଟତା ଆସିପାରେ ବୋଲି କହିଛି ପାଣିପାଗ କେନ୍ଦ୍ର I ସେପଟେ ରାଜ୍ୟରେ ଆହୁରି ୫ ଦିନ ପର୍ଯ୍ୟନ୍ତ ପାଗ ଶୁଖିଲା ରହିବ I ତାପମାତ୍ରାରେ ଆଉ ୨ ରୁ 3 ଡିଗ୍ରୀ ବୃଦ୍ଧି ହେବାର ସମ୍ଭାବନା ଥିବା ବେଳେ ଆସନ୍ତା ସପ୍ତାହରେ ପାଗ ବଦଳି ପାରେ। ଉପକୁଳ ଜିଲ୍ଲା ମାନଙ୍କରେ ମେଘୁଆ ପାଗ ସହିତ ବର୍ଷା ସମ୍ଭାବନା ରହିଛି।
କାର୍ଯ୍ୟକାରୀ ହେଲା ୪ ଶ୍ରମ ଆଇନ ; ମହିଳା କର୍ମଚାରୀଙ୍କୁ ରାତି ଡ୍ୟୁଟି କରିବାକୁ ହେଲେ ସହମତି ନିଆଯିବା ବାଧ୍ୟତାମୂଳକ
ନନ୍ଦିଘୋଷ ବ୍ୟୁରୋ : ୨୦୨୦ରେ ପାର୍ଲାମେଣ୍ଟରେ ଗୃହୀତ ହୋଇଥିବା ଉକ୍ତ ୪ ଶ୍ରମ ଆଇନକୁ ଶୁକ୍ରବାରଠାରୁ କାର୍ଯ୍ୟକାରୀ କରାଯାଇଛି। ଏହି ବୃହତ୍ ସଂସ୍କାର ଅନୁଯାୟୀ, ଅସ୍ଥାୟୀ ଓ ପାର୍ଟଟାଇମ୍ ଜବ୍ କରୁଥିବା କର୍ମଚାରୀମାନଙ୍କୁ ସାମାଜିକ ସୁରକ୍ଷା ପରିସରଭୁକ୍ତ କରାଯିବ। ସମସ୍ତ କର୍ମଚାରୀଙ୍କୁ ନିଯୁକ୍ତିପତ୍ର ପ୍ରଦାନ, ବୈଧାନିକ ସର୍ବନିମ୍ନ ମଜୁରି ଏବଂ ସବୁ ସେକ୍ଟରରେ ଠିକ୍ ସମୟରେ ବେତନ ପ୍ରଦାନକୁ ବାଧ୍ୟତାମୂଳକ କରାଯିବ। ପୂର୍ବରୁ ଥିବା ୨୯ଟି ଖଣ୍ଡିତ ଆଇନ ସ୍ଥାନରେ ୪ ନୂଆ ଶ୍ରମ ଆଇନ ଯଥା କୋଡ୍ ଅଫ୍ ଓ୍ବେଜସ୍ (୨୦୧୯), ଇଣ୍ଡଷ୍ଟ୍ରିଆଲ ରିଲେଶନ୍ସ କୋଡ୍ (୨୦୨୦), କୋଡ୍ ଅନ୍ ସୋସିଆଲ୍ ସିକ୍ୟୁରିଟି(୨୦୨୦) ଏବଂ ଅକ୍ୟୁପେଶନାଲ ସେଫ୍ଟି, ହେଲ୍ଥ ଆଣ୍ଡ ଓ୍ବର୍କିଂ କଣ୍ଡିଶନ୍ସ କୋଡ୍ (୨୦୨୦) ଶୁକ୍ରବାର କାର୍ଯ୍ୟକାରୀ ହୋଇଛି।
ମହିଳା କର୍ମଚାରୀଙ୍କୁ ରାତି ଡ୍ୟୁଟି କରିବାକୁ ହେଲେ ସେମାନଙ୍କ ସହମତି ନିଆଯିବା ବାଧ୍ୟତାମୂଳକ। ରାତିବେଳେ ମହିଳା କର୍ମଚାରୀଙ୍କୁ ନିୟୋଜିତ କରୁଥିବା କମ୍ପାନୀ ସୁରକ୍ଷା, ଓଭରଟାଇମ ପାଇଁ ଦୁଇଗୁଣ ପାରିଶ୍ରମିକ ଦେବେ। ନିୟୋଜିତ କର୍ମଚାରୀଙ୍କୁ ନିଯୁକ୍ତି ପତ୍ର ଦେବାକୁ ପଡ଼ିବ। ସାରା ଦେଶରେ ଲାଗୁ ହୋଇଛି ସଂଶୋଧିତ ଶ୍ରମ ଆଇନ କୋଡ। ସେଗୁଡ଼ିକ ହେଲା ଦ କୋଡ ଅନ ୱେଜେସ ୨୦୧୯, ଦ ଇଣ୍ଡଷ୍ଟ୍ରିଆଲ ରିଲେସନ କୋଡ ୨୦୨୦, ଦ କୋଡ ଅନ ସୋସିଆଲ ସିକ୍ଯୁରିଟି ୨୦୨୦ ଓ ଦ ଅକୁପେସନାଲ ସେଫଟି, ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିସନସ କୋଡ ୨୦୨୦। ପ୍ରଚଳିତ ପୁରୁଣା ୨୯ଟି ଶ୍ରମ ଆଇନରେ ସଂଶୋଧିତ କରି ସରଳୀକରଣ କରାଯାଇଛି। ଯେଉଁଥିରେ ଶ୍ରମଜୀବୀ, କର୍ମଚାରୀଙ୍କ କଲ୍ଯାଣ ଉପରେ ଗୁରୁତ୍ବ ଦିଆଯାଇଛି। ନୂଆ ବ୍ଯବସ୍ଥା ଅନୁଯାୟୀ ପ୍ଲାଟଫର୍ମରେ କାମ କରୁଥିବା ଶ୍ରମିକଙ୍କୁ ବି ସାମାଜିକ ସୁରକ୍ଷା ଅନ୍ତର୍ଗତ ସବୁ ସୁବିଧା ନିଯୁକ୍ତିଦାତା ଯୋଗାଇଦେବେ। ସର୍ବନିମ୍ନ ମଜୁରୀ ଠାରୁ କମରେ କାହାରିକୁ ନିୟୋଜିତ କରାଯିବନି। ୪୦ ବର୍ଷରୁ ଅଧିକ ବୟସ୍କ କର୍ମଚାରୀଙ୍କ ବାର୍ଷିକ ସ୍ବାସ୍ଥ୍ଯ ପରୀକ୍ଷା କରାଇବେ ନିଯୁକ୍ତିଦାତା। ପୁରୁଷ ଓ ମହିଳା କର୍ମଚାରୀଙ୍କ ଭିତରେ ଦରମାରେ ତାରତମ୍ଯ ରହିବ ନାହିଁ। ୧୦ କିମ୍ବା ଅଧିକ କର୍ମଚାରୀ କାମ କରୁଥିବା ସଂସ୍ଥା କର୍ମଚାରୀଙ୍କୁ ଇଏସଆଇସି ଅନ୍ତର୍ଭୁକ୍ତ କରିପାରିବେ। ବିପଦପୂର୍ଣ୍ଣ ଉତ୍ପାଦ ଶିଳ୍ପରେ କାମ କରୁଥିବା ଜଣେ କର୍ମଚାରୀଙ୍କ ବି ଇଏସଆଇସି କରିବା ଅନିବାର୍ଯ୍ଯ। ସେହିପରି ଏଣିକି ୫ ବର୍ଷ ନୁହେଁ, ଜଣେ କର୍ମଚାରୀ ବର୍ଷେ କାମ କରିଥିଲେ ବି କମ୍ପାନୀ କର୍ତ୍ତୃପକ୍ଷ ତାଙ୍କୁ ଗ୍ରାଚ୍ୟୁଇଟି ଦେବାକୁ ବାଧ୍ୟ ବୋଲି ବିଜ୍ଞପ୍ତିରେ କେନ୍ଦ୍ର ସରକାର ଜଣାଇଛନ୍ତି।
ବିପର୍ଯ୍ୟସ୍ତ ସ୍ଵାସ୍ଥ୍ୟସେବା, ସିକ୍ୟୁରିଟି ଗାର୍ଡ ମାପୁଛନ୍ତି ରୋଗୀଙ୍କ ରକ୍ତଚାପ
ବିଞ୍ଝାରପୁର : ରାଜ୍ୟରେ ବିପର୍ଯ୍ୟସ୍ତ ସ୍ଵାସ୍ଥ୍ୟ ବ୍ୟବସ୍ଥା । ସରକାରୀ ଡାକ୍ତରଖାନାରେ ସିକୁରିଟି ଗାର୍ଡ ମାପୁଛନ୍ତି ରୋଗୀଙ୍କ ବ୍ଲଡ଼ ପ୍ରେସର | ପ୍ରେସର ମାପିବା ପାଇଁ ନିର୍ଦ୍ଦେଶ ଦେଉଛନ୍ତି ଡ୍ୟୁଟିରେ ଥିବା ଡାକ୍ତର | ଏଭଳି ବିଚିତ୍ର ଦୃଶ୍ୟ ଦେଖିବାକୁ ମିଳିଛି ଯାଜପୁର ଜିଲ୍ଲା ବିଞ୍ଝାରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ | ଅଭିଯୋଗ ଅନୁଯାୟୀ ଡ୍ୟୁଟିରେ ଥିବା ଡାକ୍ତର ବିନ୍ଦୁସାଗର ସାମଲ ଆଉଟଡୋରରେ ରୋଗୀ ଦେଖୁଥିବା ବେଳେ ଜଣେ ବୃଦ୍ଧ ରୋଗୀଙ୍କ ପ୍ରେସର ମାପିବା ପାଇଁ ବାହାରେ ଥିବା ସିକ୍ୟୁରିଟି ଗାର୍ଡଙ୍କ ନିକଟକୁ ପଠାଇଥିଲେ । ଯାହାକୁ ନେଇ ଡାକ୍ତରଙ୍କୁ ପ୍ରଶ୍ନ କରିବାରୁ ସେ ମଧ୍ୟ ଘଟଣାକୁ ସ୍ଵିକାର କରିବା ସହ ଭିଡ ଥିଲେ ସିକୁରିଟିମାନଙ୍କୁ ରୋଗୀଙ୍କ ବ୍ଲଡ଼ ପ୍ରେସର ମାପିବା ପାଇଁ କହିଥାଉ ବୋଲି କହିଛନ୍ତି । ଅନ୍ୟପଟେ ସିକ୍ୟୁରିଟି ଗାର୍ଡ ରୋଗୀଙ୍କ ପ୍ରେସର ମାପିବା ସମ୍ପୂର୍ଣ ଭୁଲ । କେବଳ ନର୍ସିଙ୍ଗ ଷ୍ଟାଫମାନେ ହିଁ ରୋଗୀଙ୍କ ବ୍ଲଡ଼ ପ୍ରେସର ମାପି ପାରିବେ ବୋଲି କହିଛନ୍ତି ବିଞ୍ଝାରପୁର ଗୋଷ୍ଠି ସ୍ୱାସ୍ଥ୍ୟ ଅଧିକାରୀ | ଏନେଇ ଜିଲ୍ଲା ସ୍ୱାସ୍ଥ୍ୟ ଅଧିକାରୀଙ୍କ ପ୍ରତିକ୍ରିୟା ମିଲିପାରିନାହିଁ ।