ଶାହଙ୍କ ଆହ୍ବାନ: ଆତଙ୍କବାଦୀ ବିରୋଧରେ ଅନ୍ତିମ ଲଢେଇ ଲଢ଼

ଶ୍ରୀନଗର: ଆତଙ୍କବଦୀଙ୍କ ବିରୋଧରେ ହେବ ଶେଷ ଲଢ଼େଇ । ଖୋଜି ଖୋଜି ଆତଙ୍କବଦୀଙ୍କୁ ନିପାତ କରିବାକୁ ନିର୍ଦ୍ଦେଶ ଦେଇଛନ୍ତି ଗୃହମନ୍ତ୍ରୀ ଅମିତ ଶାହ । ଆତଙ୍କବଦୀଙ୍କ ବିରୋଧରେ ଶେଷ ଲଢ଼େଇ ଲଢ଼ିବାକୁ ସୁରକ୍ଷାକର୍ମୀ ଓ ଯବାନଙ୍କୁ ଦେଇଛନ୍ତି ଆହ୍ବାନ ।

ଘାଟିରେ କିଛିଦିନ ହେବ ବିଗିଡ଼ି ଥିବା ସ୍ଥିତି ଭିତରେ ତିନିଦିନିଆ ଜମ୍ମୁ ଓ କାଶ୍ମୀର ଗସ୍ତରେ ଯାଇ ଆଜି ପହଞ୍ଚିଛନ୍ତି ଶାହ । ଶ୍ରୀନଗରରେ ସୁରକ୍ଷାକୁ ନେଇ ଏକ ଉଚ୍ଚସ୍ତରୀୟ ବୈଠକ କରିଥିଲେ ।

ଦିନ ୧୨ଟାରେ ଆରମ୍ଭ ହୋଇଥିବା ବୈଠକ ସାଢ଼େ ୪ ଘଣ୍ଟା ଚାଲିଥିଲା । ଘାଟିରେ ଅନ୍ୟ ରାଜ୍ୟର ନାଗରିକ, ଅଣ ହିନ୍ଦୁଙ୍କୁ ଆତଙ୍କବଦୀମାନେ ଟାର୍ଗେଟ କରିବାକୁ ନେଇ ବିସ୍ତୃତ ଆଲୋଚନା କରାଯାଇଛି । ଚଳିତ ମାସ ଆରମ୍ଭରୁ ଆତଙ୍କବଦୀ ଅଣ କାଶ୍ମୀର ଲୋକଙ୍କୁ ଆକ୍ରମଣ କରୁଛନ୍ତି । ବର୍ତ୍ତମାନ ସୁଦ୍ଧା ଉତ୍ତରପ୍ରଦେଶ, ବିହାର ଓ ଅନ୍ୟ ରାଜ୍ୟର ଶ୍ରମିକ ଶ୍ରେଣୀର ଲୋକଙ୍କୁ ଆତଙ୍କବାଦୀ ଟାର୍ଗେଟ କରି ହତ୍ୟା କରୁଛନ୍ତି । ସେତିକି ନୁହେଁ, ଆତଙ୍କବଦୀଙ୍କ ଆକ୍ରମଣରେ ପାଖାପାଖି ୯ ଜଣ ଯବାନ ସହିଦ ହୋଇଛନ୍ତି ।

ସହିଦ ଇନ୍ସପେକ୍ଟରଙ୍କ ପରିବାରକୁ ଭେଟିଲେ ଶାହ

ସୁରକ୍ଷା ବିଭାଗ ଓ ଗୁଇନ୍ଦା ସଂସ୍ଥାଙ୍କ ସହ ବୈଠକ ପୂର୍ବରୁ ଶାହ ସହିଦ ଇନ୍ସପେକ୍ଟର ପରଭେଜ ଅହମଦ ଦାରଙ୍କ କରିବାରକୁ ଭେଟିଥିଲେ । ଏହି ସମୟରେ ଅହମଦଙ୍କ ପତ୍ନୀ ଫାତିମା ଅଖତରଙ୍କୁ ସରକାରୀ ଚାକିରି ଦେବାକୁ ଶାହ ପ୍ରତିଶ୍ରୁତି ଦେଇଛନ୍ତି । ଏହାସହ ଶାହ କହିଛନ୍ତି, ‘ପୂରା ଦେଶ ଆପଣଙ୍କ ପରିବାର ସହ ଅଛି । ଆମେ ଜମ୍ମୁ ଓ କାଶ୍ମୀର ପୋଲିସ ଏବଂ ପରଭେଜ ଅହମଦ ଦାରଙ୍କ ବଳିଦାନକୁ ସବୁବେଳେ ମନେ ରଖିବୁ ।’ ସୂଚନାଯୋଗ୍ୟ, ଗତ ଜୁନରେ ଶ୍ରୀନଗରରେ ଆତଙ୍କବାଦୀ ପରଭେଜଙ୍କୁ ଗୁଳି ମାରି ଦେଇଥିଲେ ।

୫ ଅଗଷ୍ଟ ୨୦୧୯ ସ୍ବର୍ଣ୍ଣାକ୍ଷରରେ ଲେଖାଯିବ

ଶ୍ରୀନଗରରେ ଏକ କାର୍ଯ୍ୟକ୍ରମରେ ଶାହ କହିଥିଲେ ୨୦୧୯ ଅଗଷ୍ଟ ୫ ତାରିଖରୁ ଅନୁଚ୍ଛେଦ ୩୭୦ ହଟିବା ଜମ୍ମୁ ଓ କାଶ୍ମୀର ଇତିହାସରେ ସ୍ବର୍ଣ୍ଣାକ୍ଷରରେ ଲେଖା ହୋଇ ରହିବ । ସେ କହିଥିଲେ, ‘ଘାଟିରେ ପଥର ମାଡ଼ ଓ ହିଂସାର ଖବର ପ୍ରାୟ ସବୁଦିନ ଆସୁଥିଲା । ଏବେ ସ୍ଥିତି ବଦଳିଛି । ପରିବର୍ତ୍ତନର ଧାରାରେ ଘାଟି ଆଗକୁ ବଢ଼ୁଛି, ଯାହାକୁ କେହି ଅଟକାଇ ପାରିବେ ନାହିଁ ।’

ଅନୁଚ୍ଛେଦ ୩୭୦ ହଟିବାକୁ ନେଇ ସେ କହିଥିଲେ, ‘ଏହା ଆତଙ୍କବାଦ, ଦୁର୍ନୀତି, ଭାଇ-ଭତିଜାବାଦର ଅନ୍ତର ଦିନ ଥିଲା । ଯେଉଁ ଯୁବବଗଙ୍କ ହାତରେ ଦିନେ ପଥର ଥିଲା ଆଜି ସେମାନେ ବିକାଶ, ରୋଜଗାର ଓ ପାଠପଢ଼ା କଥା କହୁଛନ୍ତି । ଏବେ ସେମାନଙ୍କ ଉପରେ ବଡ଼ ଦାୟିତ୍ବ ସେମାନେ ଶ୍ରୀନଗରର ବିକାଶକୁ ଆଗକୁ ନେବେ ।‘