ଋଷର ଭ୍ୟାକସିନ ନେଉଥିବା ୭ରୁ ଜଣେ ବ୍ୟକ୍ତି ହେଉଛନ୍ତି ଅସୁସ୍ଥ, ଭାରତକୁ ମଧ୍ୟ ଆସୁଛି ଡୋଜ

ନୂଆଦିଲ୍ଲୀ: ଦେଶରେ ଦୃତଗତିରେ ବଢ଼ୁଥିବା କରୋନା ଭାଇରସର ସଂକ୍ରମଣକୁ ଦେଖି ଏବେ ସମସ୍ତେ ଭ୍ୟାକସିନର ଅପେକ୍ଷାରେ ଅଛନ୍ତି । ଭାରତରେ ପ୍ରସ୍ତୁତ ହେଉଥିବା ଭ୍ୟାକସିନ ପୂର୍ବରୁ ଋଷର ଭ୍ୟାକସିନ Sputnik V ଭାରତରେ ପହଞ୍ଚିବା ଆଶା କରାଯାଉଛି । ଅବଶ୍ୟ ଏସବୁ ମଧ୍ୟରେ ଖବର ଆସିଛି ଯେ, ଋଷର ଭ୍ୟାକସିନ ନେଇଥିବା ପ୍ରତି ୭ ଜଣ ଭଲେଣ୍ଟିୟର୍ସଙ୍କ ମଧ୍ୟରୁ ଜଣଙ୍କ ମଧ୍ୟରେ ଏହାର ପାଶ୍ୱ ପ୍ରତିକ୍ରିୟା ଦେଖିବାକୁ ମିଳୁଛି । ଏହି ଖବରର ଖୁଲାସା ଖୋଦ ଋଷର ସ୍ୱାସ୍ଥ୍ୟ ମନ୍ତ୍ରୀ ମିଖାଇଲ ମୁରାଶ୍କୋ କରିଛନ୍ତି ।

ମୁରାଶ୍କୋ ମସ୍କୋ ଟାଇମ୍ସୃକୁ ଦେଇଥିବା ଏକ ମନ୍ତବ୍ୟରେ କହିଛନ୍ତି ଯେ, ଭ୍ୟକସିନ ନେଇଥିବା ପ୍ରାୟ ୧୪ ପ୍ରତିଶତ ଲୋକଙ୍କ ମଧ୍ୟରେ ଏହାର ପ୍ରାର୍ଶ୍ୱ ପ୍ରତିକ୍ରିୟା ଦେଖିବାକୁ ମିଳିଛି । କରୋନା ଭ୍ୟାକସିନ ନେଉଥିବା ଜଣେ ବ୍ୟକ୍ତି କହିଛନ୍ତି ଯେ, ଭ୍ୟସିନର ଡୋଜ ନେବା ପରେ ସେ ଶରୀରରେ ଦୁର୍ବଳତା ଏବଂ ମାଂସପେଶୀରେ କଷ୍ଟ ଅନୁଭବ କରିଥିଲେ । ଅବଶ୍ୟ ସେ ଏହା ମଧ୍ୟ କହିଛନ୍ତି ଯେ,  କରୋନା ଭ୍ୟାକସିନ ନେବା ପରେ ଏଭଳି ସମସ୍ୟା ଦେଖାଦେଇପାରେ ବୋଲି ପୂର୍ବରୁ ଦର୍ଶାଯାଇଥିଲା ଏବଂ ତା’ ପର ଦିନ ସେ ଠିକ୍ ଅନୁଭବ କରୁଥିବା ବୋଲି ମଧ୍ୟ କହିଛନ୍ତି ।

ସୂଚନା ଅନୁଯାୟୀ ଏହି ଭ୍ୟକସିନର କ୍ଲିନିକାଲ ପରୀକ୍ଷଣର ପ୍ରାରମ୍ଭିକ ଫଳ ସେପ୍ଟେମ୍ବର ୪ ତାରିଖରେ ଦ ଲାନସେଟ ଜର୍ନଲରେ ପ୍ରକାଶିତ କରାଯାଇଛି । ଏଥିରେ କୁହାଯାଇଛି ଯେ, ଭ୍ୟାକସିନକୁ ୭୬ ଜଣ ଲୋକଙ୍କୁ ଦିଆଯାଇଛି ।

ଭ୍ୟାକସିନ ନେବା ପରେ ଏହା ସଂପୂର୍ଣ୍ଣ ଭାବେ ସୁରକ୍ଷିତ ବୋଲି କୁହାଯାଇଛି । ଜର୍ନଲରେ କୁହାଯାଇଛି ଯେ ୨୧ ଦିନ ମଧ୍ୟରେ ଭଲେଣ୍ଟିୟର୍ସଙ୍କ ଶରୀରରେ ବିନା କୌଣସି ପାର୍ଶ୍ୱ ପ୍ରତିକ୍ରିୟାରେ ଆଣ୍ଟିବଡ଼ୀ ପ୍ରସ୍ତୁତ ହୋଇଛି । ଅବଶ୍ୟ ଏଥିରୁ ୫୮ ପ୍ରତିଶତ ଲୋକ ଇଜେକସନ ଲଗାଇଥିବା ସ୍ଥାନରେ ଦରଜ ଅନୁଭବ କରିଥିଲେ । ଅନ୍ୟପଟେ ୨୮ ପ୍ରତିଶତ ଲୋକ ଦୁର୍ବଳତା ଏବଂ ୨୪ ପ୍ରତିଶତ ଲୋକ ମାଂସପେଶୀରେ କଷ୍ଟ ହେଉଥିବା ଅଭିଯୋଗ କରିଥିଲେ ।