ଭଲ ବର୍ଷା ଆଣିଥିଲା ଅନେକ ସ୍ୱପ୍ନ, ଉଜାଡ଼ି ଦେଲା ସାର କଳାବଜାରୀ

ଧର୍ମଗଡ଼: ଚାଷୀଙ୍କ ଚିନ୍ତା ବଢାଇଛି ସାର । ଏ ବର୍ଷ ରାଜ୍ୟ ଭଲ ବର୍ଷା ହୋଇଛି । ଭଲ ଚାଷ ହେବା ଖୁସିରେ ବିଲରେ ଧାନ ରୋଇଥିଲେ ଚାଷୀ । ବର୍ଷା ପରେ ଜମିରେ ଚାଷ ପାଇଁ ଚାଷୀ ଅଣ୍ଟା ଭିଡିଥିଲେ । କିନ୍ତୁ ଏବେ ବୋଧେ ଭଲ ଚାଷ ହେବା ସ୍ୱପ୍ନ କେବଳ ସ୍ୱପ୍ନରେ ହିଁ ରହିଯିବ । କାରଣ ୟୁରିଆର ଅଭାବ ଚାଷୀଙ୍କୁ ଅଡୁଆରେ ପକାଇଛି । ସବୁଠାରୁ ବଡ଼ କଥା ହେଉଛି ଚାଷୀଙ୍କୁ ୟୁରିଆ ମିଳୁନଥିବା ବେଳେ ୟୁରିଆ କଳାବଜାରୀ କିନ୍ତୁ ଜୋର ସୋରରେ ଚାଲିଛି । ଏଭଳି କିଛି ସ୍ଥିତି କଳାହାଣ୍ଡି ଜିଲ୍ଲାରେ ଦେଖିବାକୁ ମିଳିଛି । ଏଭଳି ଅଭିଯୋଗ ଆସିଛି ଜୁନାଗଡ଼ ବ୍ଲକ୍ ମିଚା ଗାଁରୁ । ଜଣେ ଛାତ୍ରଙ୍କ ନାଁ ରେ ସାର କଳାବଜାରୀ କରୁଛନ୍ତି ବିକ୍ରେତା  ।

ଏମିତି ଅଭିଯୋଗ ଆସିଛି କଳାହାଣ୍ଡି ଜିଲ୍ଲାରେ । ଜିଲ୍ଲାର ଜୁନାଗଡ ଥାନା ମୀଚା ଗାଁ ର ପରମେଶ୍ଵର ସରାଫ । ସେ ସ୍ଥାନୀୟ ଚିଚେଇଗୁଡ଼ା ମହାବିଦ୍ୟାଳୟ ଯୁକ୍ତ ଦୁଇ କଳାର ଦ୍ଵିତୀୟ ବର୍ଷର ଛାତ୍ର  । ତାଙ୍କ ନାଁ ରେ ହୋଇଛି ସାର କଳା ବଜାରୀ  । ସେ ୮୦ ବସ୍ତା ୟୁରିଆ ନେଇଥିବା ସେହି ଗାଁର ଡମ୍ବରୁ ଧର ସରାଫ ନାମକ ଜଣେ ବିକ୍ରେତା ଦର୍ଶାଇଛନ୍ତି । ଜୁନାଗଡ ଅଞ୍ଚଳରେ ଚାଷୀଙ୍କୁ ଆବଶ୍ୟକ ପରିମାଣ ସାର ମିଲିପାରୁ ନାହିଁ ।

କଳାବଜାରୀ କରି ଏହାର ଫାଇଦା ଉଠାଉଛନ୍ତି ବିକ୍ରେତା । ତେବେ ଏହି ଘଟଣା ଜଣା ପଡିବା ପରେ ଭୁଲରେ ଏପରି ହୋଇଥିବା ବିକ୍ରିତା କହିଛନ୍ତି । ସେପଟେ  ୨୧ଦିନ ପାଇଁ ବିକ୍ରେତାଙ୍କୁ ନିଲମ୍ବିତ କରାଯାଇ କାରଣ ଦର୍ଶାଅ ନୋଟିସ ଦେଇଛନ୍ତି ଜିଲ୍ଲା କୃଷି ଅଧିକାରୀ  । ୟୁରିଆର ଅଭାବ ଯୋଗୁଁ ଚାଷୀଙ୍କ ଚିନ୍ତା ବଢିଥିବାବେଳେ ବିକ୍ରିତାଙ୍କ କଳାବଜାରୀ ପ୍ରଶାସନକୁ ଅଡୁଆରେ ପକାଇଛି ।