ସୀମାରେ ବଢ଼ୁଛି ତିକ୍ତତା, ଭାରତ ଉପରକୁ ଗୁଳିବର୍ଷା କଲା ନେପାଳ…

ନୂଆଦିଲ୍ଲୀ: ଭାରତ ଏବଂ ନେପାଳ ମଧ୍ୟରେ ଚାଲିଥିବା ତିକ୍ତତାକୁ ନେଇ ଏବେ ପରିସ୍ଥିତି ଗମ୍ଭୀର ହେବାରେ ଲାଗିଛି । ଆଲୋଚନା ମାଧ୍ୟମରେ ବିବାଦ ସମାଧାନ ହେବ ବୋଲି କୁହାଯାଉଥିବା ବେଳେ ନେପାଳ ପକ୍ଷରୁ ଗୁଳି ବର୍ଷା କରାଯାଇଛି । ନେପାଳର ଏଭଳି ଆଚରଣ ଯୋଗୁଁ ଜଣେ ଭାରତୀୟ ଯୁବକ ଗୁରୁତର ହୋଇଛନ୍ତି । ଉକ୍ତ ଯୁବକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।

 ଏହି ଘଟଣା ବିହାରର କିଶାନଗଞ୍ଜ ଜିଲ୍ଲାର ଟେଢ଼ାଗାଛର ଫତେହପୁରର ଭାରତ-ନେପାଳ ସୀମାରେ ଘଟିଛି । ଯେଉଁଠାରେ ଶନିବାର ରାତିରେ ନେପାଳ ପୋଲିସ ତିନି ଜଣ ଭାରତୀୟ ନାଗରିକଙ୍କ ଉପରକୁ ଗୁଳି ଚଳାଇଥିଲା । ଯେଉଁଥିରେ ଜଣେ ଯୁବକ ଗୁରୁତର ହୋଇଥିଲେ । ଆହତ ଯୁବକଙ୍କୁ ଅନାନ-ଫାନାନରେ ଚିକିତ୍ସା ପାଇଁ ଟେଢ଼ାଗାଛ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା, ପରେ ତାଙ୍କୁ ଭଲ ଚିକିତ୍ସା ପାଇଁ ରେଫରାଲ ଡାକ୍ତରଖାନାକୁ ପଠାଯାଇଥିଲା ।

ଯୁବକଙ୍କ ଅବସ୍ଥା ଗୁରୁତର ଥିବା କୁହାଯାଉଛି । ଯୁବକ ଜଣକୁ ପୁର୍ନିଆରେ ଚିକିତ୍ସା କରାଯାଉଛି । ସ୍ଥାନୀୟ ଗ୍ରାମବାସୀଙ୍କ କହିବାନୁଯାୟୀ, ଗୁରୁତର ଯୁବକ ହେଉଛନ୍ତି ଜିତେନ୍ଦ୍ର କୁମାର ସିଂ (୨୫) । ଜିତେନ୍ଦ୍ର ଏବଂ ତାଙ୍କର ଦୁଇ ସାଥୀ ଅଙ୍କିତ କୁମାର ସିଂ ଏବଂ ଗୁଲଶାନ କୁମାର ସିଂ ଭାରତ-ନେପାଳ ସୀମାରେ ଥିବା ମାଫି ଟୋଲା ଏବଂ ମଲ୍ଲା ଟୋଲାକୁ ରାତି ପ୍ରାୟ ସାଢ଼େ ସାତଟାରେ ଗୋରୁ ଖୋଜିବା ପାଇଁ ଯାଇଥିଲେ ।

ଗ୍ରାମବାସୀଙ୍କ କହିବାନୁସାରେ, ଗାଁରୁ ବାହାରେ ଥିବା ଚାଷ ଜମି ଆଡକୁ ଯିବା ପରେ ସୀମାରେ ଅବସ୍ଥାପିତ ନେପାଳ ପୋଲିସ ସେମାନଙ୍କ ଉପରକୁ ଗୁଳି ଚଳାଇଥିଲା । ଯେଉଁଥିରେ ଜିତେନ୍ଦ୍ର କୁମାର ସିଂଙ୍କୁ ଗୁଳି ବାଜିଛି । ପରେ ଜିତେନ୍ଦ୍ର କୁମାର ସିଂଙ୍କୁ ତାଙ୍କର ଦୁଇ ସାଙ୍ଗ ତଥା ସ୍ଥାନୀୟ ଗ୍ରାମବାସୀ ଘରକୁ ଆଣିଥିଲେ । ଏହି ଘଟଣାର ସୂଚନା ସ୍ଥାନୀୟ ପୋଲିସ ଏବଂ ଦ୍ୱାଦଶ ବାଟାଲିୟନର ଏସଏସବି ଫତେହପୁରକୁ ଦିଆଯାଇଛି ।

ସୂଚନାଯୋଗ୍ୟ, ଏହାପୂର୍ବରୁ ମଧ୍ୟ ନେପାଳ ପକ୍ଷରୁ ଗୁଳି ବର୍ଷ କରାଯାଇଥିଲା । ଚଳିତ ବର୍ଷ ଜୁନ୍ ମାସରେ ନେପାଳ ପକ୍ଷରୁ ଗୁଳି କରାଯାଇଥିଲା । ଏହି ଗୁଳି ବିନିମୟରେ ଜଣଙ୍କର ମୃତ୍ୟୁ ମଧ୍ୟ ହୋଇଥିଲା । ଏହାସହ ଚାରି ଜଣ ଆହତ ମଧ୍ୟ ହୋଇଥିଲେ । ଏହି ଘଟଣା ବିହାରର ଭାରତ-ନେପାଳ ସୀମା ନିକଟ ସୀତାମାଢ଼ୀର ସୋନବରସା ଥାନା ଅଧିନରେ ଘଟିଛି ।