ପେରୁ: ଦକ୍ଷିଣ ଆମେରିକୀୟ ଦେଶ ପେରୁରେ ଶକ୍ତିଶାଳୀ ଭୂମିକମ୍ପ । ଶୁକ୍ରବାର କେନ୍ଦ୍ରୀୟ ପେରୁରେ ୬.୮ ତୀବ୍ରତାର ଭୂମିକମ୍ପ ଅନୁଭୂତ ହୋଇଛି । ଏହାର ପ୍ରଭାବରେ ରାଜଧାନୀ ଲିମା ସମେତ ଅନେକ ଅଞ୍ଚଳ ଥରି ଉଠିଛି । ଭୟଭୀତ ହୋଇ ଲୋକେ ଘରୁ ବାହାରକୁ ଚାଲି ଆସିଥିଲେ ।
ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିଓସାଇନ୍ସ ଅନୁଯାୟୀ, ଭୂମିକମ୍ପର ତୀବ୍ରତା ୬.୮ ରେକର୍ଡ କରାଯାଇଛି । ପେରୁର ଜିଓଫିଜିକାଲ ଇନଷ୍ଟିଚ୍ୟୁଟ୍ ଅନୁସାରେ, ଜୁନିନ୍ ଆଣ୍ଡିଜ୍ ଅଞ୍ଚଳରେ ୧୨୯ କିଲୋମିଟର ଗଭୀରତାରେ ଏହାର କେନ୍ଦ୍ରସ୍ଥଳ ଥିଲା । ଭୂମିକମ୍ପ ଝଟକା ପରେ ଲିମା ସଂସଦରୁ ମଧ୍ୟ ସାଂସଦମାନେ ବାହାରକୁ ଚାଲି ଆସିଥିଲେ ।
ତେବେ ଏଯାଏଁ କୌଣସି ଧନଜୀବନ କ୍ଷୟକ୍ଷତିର ଖବର ମିଳିନାହିଁ । ଜୁନିନ୍ ଅଞ୍ଚଳରେ ପ୍ରଥମଥର ପାଇଁ ଏତେ ତୀବ୍ରତାର ଭୂମିକମ୍ପ ଅନୁଭୂତ ହୋଇଥିବା ସ୍ଥାନୀୟ ପ୍ରଶାସନ କହିଛି ।
ତେବେ ଖଣିଜ ସମ୍ପଦ ପାଇଁ ଜୁନିନ୍ ଅଞ୍ଚଳ ବେଶ୍ ପରିଚିତ । ଏଠାରେ ପେରୁର ବୃହତ୍ ତମ୍ବା ଖଣି ଟୋରୋମୋଚୋ ସମେତ ଅନେକ ଖଣି ରହିଛି । ଅନ୍ୟପଟେ, ଭୂମିକମ୍ପ ପରେ ସୁନାମିର କୌଣସି ଆଶଙ୍କା ନଥିବା ଆମେରିକାର ସୁନାମି ୱାର୍ଣ୍ଣିଂ ସିଷ୍ଟମ୍ ସ୍ପଷ୍ଟ କରିଛି । ପେରୁ ପ୍ରଶାନ୍ତ ମହାସାଗରର ରିଙ୍ଗ୍ ଅଫ୍ ଫାୟାର୍ ଅଞ୍ଚଳରେ ଥିବାରୁ ଏଠାରେ ବାରମ୍ବାର ଭୂମିକମ୍ପ ହୋଇଥାଏ ।
ସୂଚନାଯୋଗ୍ୟ, ଚଳିତ ବର୍ଷ ଅଗଷ୍ଟରେ ପେରୁରେ ୬.୭ ତୀବ୍ରତାର ଭୂମିକମ୍ପରେ ୨ ଜଣ ଆହତ ହେବା ସହ ଅନେକ ଘର, ସ୍କୁଲ୍ ଓ ସ୍ୱାସ୍ଥ୍ୟକେନ୍ଦ୍ର କ୍ଷତିଗ୍ରସ୍ତ ହୋଇଥିଲା । ଏହାର ପ୍ରାୟ ଏକ ମାସ ପୂର୍ବରୁ ୫.୫ ତୀବ୍ରତାର ଭୂମିକମ୍ପରେ ୬ ଜଣଙ୍କ ମୃତ୍ୟୁ ଓ ୩୦ ଜଣ ଆହତ ହୋଇଥିଲେ ।

