ଭୁବନେଶ୍ବର: ତୃତୀୟ ଦିନରେ ବିଧାନସଭା ଅଚଳ । ଗୃହରେ ଗଂଜାମ ବନ୍ୟା ଓ କୋଟିଆ ତାତି କାଏମ । ସ୍ବତନ୍ତ୍ର ଆଲୋଚନା ଦାବିରେ ବିରୋଧୀ ଅଟଳ । ମୁଲତବୀ ପରେ ଶାସକ ଦଳର ଚିରାଚରିତ ଜବାବ ।.. ..୩ଦିନ ହେଲା ବିଧାନସଭାରେ ଅଚଳାବସ୍ଥା ଜାରି । ଅଧ ଘଣ୍ଟା ବି ଚାଲିପାରୁନି ଗୃହ । ବିରୋଧୀଙ୍କ ପ୍ରଶ୍ନ ଗୃହ ଚଳାଇବାର ଚାବି କାଠି କାହା ହାତରେ ? ଶାସକ ଦଳ ହାତରେ ନା ବିରୋଧୀ ଦଳ ହାତରେ ? ଶାସକ ଦଳ ତିନି ଦିନ ଧରି ଗୋଟିଏ କଥା କହୁଛନ୍ତି। ଶାସକ ଦଳ ବିଧାନସଭା ଆରମ୍ଭରୁ କହିଥିଲେ ସବୁ ପ୍ରସଙ୍ଗରେ ଆଲୋଚନା କରିବେ । ଆମେ ଗୋଟିଏ ପ୍ରସଙ୍ଗ ଉପରେ ଆଲୋଚନା ପାଇଁ ଦାବି କରୁଛୁ । ସରକାରଙ୍କ ପରିଚାଳନାଗତ ବିଫଳତା ପାଇଁ ପ୍ରତିକୂଳ ପରିସ୍ଥିତି ସୃଷ୍ଟି ହେଲା । ଏହାକୁ ନେଇ ଆଲୋଚନା କରିବାରେ ଅସୁବିଧା କେଉଁଠି ? ବାତ୍ୟା ବନ୍ୟା ପ୍ରସଙ୍ଗରେ ଆଲୋଚନା ନ କରି ଶାସକ ଦଳ କାହିଁକି ପଛଘୁଞ୍ଚା ଦେଉଛନ୍ତି ପୁଣି ବିରୋଧୀ ଦଳକୁ ଦୋଷ ଦେଉଛନ୍ତି । ଶାସକ ଦଳ ରାଜ୍ୟବାସୀଙ୍କୁ ଭ୍ରମିତ କରୁଛି ବୋଲି ବିଜେଡି ଅଭିଯୋଗ କରିଛି । ବିଜେଡି ମୋସନ ନୋଟିସ ଦେଇଥିଲା, ବାଚସ୍ପତି ବିଚାର କରିବେ ବୋଲି କହିଥିଲେ । ଆଜି ପର୍ଯ୍ୟନ୍ତ ସେ ମୋସନ ଉପରେ ବିଚାର କରାଗଲା ନାହିଁ । ବିଧାନସଭାରେ ମଧ୍ୟ ଆଲୋଚନା ପାଇଁ ପଛଘୁଞ୍ଚା ଦେଉଛି ଶାସକ ଦଳ । ଆକୱାନ ବାତ୍ୟା ପାଇଁ ଗୃହ ବନ୍ଦ କରିବାକୁ ନିଷ୍ପତ୍ତି ନିଆଗଲା ତାକୁ ନେଇ ଆମେ ସହମତି ପ୍ରକାଶ କରିଛୁ । ସୋମବାର ଠାରୁ ଆଉ ସରକାର ପଛଘୁଞ୍ଚା ନ ଦିଅନ୍ତୁ । ଗଞ୍ଜାମ ବନ୍ୟା ଏବଂ ଆକୱାନ କ୍ଷୟକ୍ଷତି ପାଇଁ ଆଲୋଚନା କରନ୍ତୁ ବୋଲି ବିଜେଡି ଦାବି କରିଛି।
ସେପଟେ କୋଟିଆ ପ୍ରସଙ୍ଗରେ କଂଗ୍ରେସ ଶାସକ ଦଳକୁ ସିଧା ନିଶାଣ କରିଛି । ମା, ମାଟି ଆଗ, ଦଳ ପଛ l କୋଟିଆ ପାଇଁ ଲଢେଇ ଜାରିରହିବ ଦରକାର ପଡିଲେ ବିଧାନସଭାରେ ଆତ୍ମାହୁତି ଦେବାକୁ ଚେତାବନୀ ଦେଇଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । ଓଡ଼ିଶାର ଅବିଚ୍ଛେଦ୍ୟ ଅଙ୍ଗ ହେଉଛି କୋଟିଆ। କେବଳ କୋଟିଆ ନୁହେଁ, ଆନ୍ଧ୍ର ସରକାର ଦୀର୍ଘ ବର୍ଷ ଧରି ନନ୍ଦପୁରଠାରୁ ପଟ୍ଟାଙ୍ଗୀ ପର୍ଯ୍ୟନ୍ତ ବିଭିନ୍ନ ଅଞ୍ଚଳର ପ୍ରାୟ ୫୦ଟି ଗାଁ ଉପରେ ନିଜର ଦାବି ଜାହିର କରି ଆସୁଛି । କୋଟିଆର ସ୍ୱାର୍ଥ ଓ ଓଡ଼ିଶାର ଅଧିକାର ପାଇଁ ଆମେ ଜୀବନ ପଛେ ଦେବୁ, କିନ୍ତୁ ଲଢ଼େଇରୁ ପଛକୁ ହଟିବୁ ନାହିଁ ବୋଲି କଂଗ୍ରେସ ଚେତାବନୀ ଦେଇଛି । ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି କଂଗ୍ରେସ କୋଟିଆକୁ ନେଇ ରାଜନୀତି କରୁଛି । କୋଟିଆ ଓଡିଶାର ଥିଲା ଓ ରହିବ ବୋଲି ଶାସକ ଦଳ କହିଛି ।
ଗତକାଲି ସର୍ବଦଳୀୟ ବୈଠକରେ ନିଷ୍ପତ୍ତି ଅନୁସାରେ ବାତ୍ୟା ପାଇଁ ବିଧାନସଭାକୁ ସୋମବାର ଯାଏଁ ଗୃହ ମୂଲତବୀ ଘୋଷଣା କରିଛନ୍ତି ବାଚସ୍ପତି ।..

