ନନ୍ଦିଘୋଷ ବ୍ୟୁରୋ: ସହଜ ହେବ ଇଭି ଚାର୍ଜିଂ । ସୁଲଭ ଦରରେ ଶୀଘ୍ର ହେବ ବ୍ୟାଟେରୀ ଚାର୍ଜ । ଦୀର୍ଘ ସମୟ ପର୍ଯ୍ୟନ୍ତ ରହିବ ବ୍ୟାକଅପ୍ । ରାଉରକେଲା NIT ଗବେଷଣାକୁ ଆଉ ଏକ ସଫଳତା । ନିର୍ମାଣ ହୋଇଛି ସୌରଶକ୍ତି ଚାଳିତ ଇଭି ଚାର୍ଜିଂ ମାଇକ୍ରୋଗ୍ରିଡ୍ ଡିଜାଇନ୍ । ଏପରି ଏକ ଜ୍ଞାନକୌଶଳ ପାଇଁ ପେଟେଣ୍ଟ ହାସଲ କରିଛନ୍ତି ଗବେଷକ ଟିମ୍ । ଯାହା ଇଲେକ୍ଟ୍ରିକ୍ ଯାନ ଚାର୍ଜିଂ ଷ୍ଟେସନଗୁଡ଼ିକୁ ଅଧିକ ଦକ୍ଷ, ବିଶ୍ୱସନୀୟ ଏବଂ ଦୀର୍ଘସ୍ଥାୟୀ କରିପାରିବ ବୋଲି କୁହାଯାଇଛି ।
ଏନଆଇଟି ଇଲେକ୍ଟ୍ରିକାଲ ଇଞ୍ଜିନିୟରିଂ ବିଭାଗର ପ୍ରଫେସର ପ୍ରଭାତ କୁମାର ରାୟ, ଆସୋସିଏଟ୍ ପ୍ରଫେସର ଅର୍ଣ୍ଣବ ଘୋଷଙ୍କ ନେତୃତ୍ବରେ ୪ ଜଣିଆ ଟିମ୍ ଏହାକୁ ଡିଜାଇନ୍ କରିଛନ୍ତି । ଏଥିରେ ସୋଲାର ପ୍ୟାନେଲ୍, ପାରମ୍ପରିକ ବିଦ୍ୟୁତ୍ ଗ୍ରୀଡ୍ ଓ ବ୍ୟାଟେରୀ ଓ ସୁପରକାପାସିଟରର ମିଶ୍ରଣରେ ଗଠିତ ଏକ ସ୍ୱତନ୍ତ୍ର ଶକ୍ତି ସଂରକ୍ଷଣ ବ୍ୟବସ୍ଥାକୁ ଏକତ୍ରିତ କରି ଇଭି ଚାର୍ଜିଙ୍ଗ ସିଷ୍ଟମ ନିର୍ମାଣ କରାଯାଇଛି । ଏହାଦ୍ବାରା ସୌରଶକ୍ତିରେ ସହଜରେ ଓ ଶୀଘ୍ର ଇଭି ଚାର୍ଜିଙ୍ଗ କରାଯାଇ ବିଦ୍ୟୁତ୍ ସଞ୍ଚୟ କରାଯାଇ ପାରିବ । ଏହି ବିକଶିତ ଜ୍ଞାନକୌଶଳ ପାଇଁ ପେଟେଣ୍ଟ ହାସଲ କରିଛନ୍ତି ଗବେଷକ ଟିମ୍ ।
ଦେଶରେ ଇଲେକ୍ଟ୍ରିକ୍ ଯାନର ବ୍ୟବହାର ଦ୍ରୁତ ଗତିରେ ବୃଦ୍ଧି ପାଉଥିବାରୁ ଯାନ ଚାର୍ଜିଂ ଷ୍ଟେସନଗୁଡ଼ିକର ଚାହିଦା ମଧ୍ୟ ବଢ଼ିବାରେ ଲାଗିଛି । ଏହାକୁ ଦୃଷ୍ଟିରେ ରଖି ଇଭି ଚାର୍ଜିଂ ସହଜ, ସୁଲଭ ଓ ବିଦ୍ୟୁତ୍ ସଞ୍ଚୟ ପାଇଁ NITର ଏହି ଉଦ୍ୟମକୁ ସବୁ ମହଲରୁ ପ୍ରଶଂସା କରାଯାଇଛି । ଏକାସାଙ୍ଗରେ ଅନେକ ଯାନ ଚାର୍ଜ କରିବା ସମୟରେ ବିଦ୍ୟୁତ୍ ଚାହିଦାରେ ହଠାତ୍ ବୃଦ୍ଧି ପାଇ ପାଓ୍ବାର ନେଟୱର୍କ ଅସ୍ଥିର ହେଉଥିବାରୁ ଏଥିରୁ ସୁରକ୍ଷା ଦେବା ପାଇଁ ବ୍ୟବସ୍ଥା କରାଯାଇଛି । ସୌରଶକ୍ତିରେ ଚାଲୁଥିବା ଇଭି ଚାର୍ଜିଂ ଷ୍ଟେସନ ମେଘୁଆ ପାଗ, ଋତୁ ଓ ଦିନର ସମୟ ଅନୁଯାୟୀ ଶକ୍ତି ଉତ୍ପାଦନରେ ହ୍ରାସ ବୃଦ୍ଧି ଦେଖାଦେଉଥିବାରୁ ଏଥିରେ ରହିଛି ପ୍ରତିକାର ବ୍ୟବସ୍ଥା । ଗବେଷକ ଦଳ ସୌରଶକ୍ତି ଉତ୍ପାଦନ ଓ ବିଦ୍ୟୁତ୍ ଚାହିଦାରେ କୃତ୍ରିମ ପରିବର୍ତ୍ତନ କରି ସିଷ୍ଟମର ଏକ ନମୂନା ପ୍ରସ୍ତୁତ କରି ସଫଳ ହୋଇଥିବା କହିଛନ୍ତି ।

