ନନ୍ଦିଘୋଷ ବ୍ୟୁରୋ: ବାତ୍ୟା ଆକୱାନକୁ ନେଇ ଚିଲିକା କୂଳରେ ଛନକା । ଖୋର୍ଦ୍ଧା ଜିଲ୍ଲା ଚନ୍ଦ୍ରାପୁଟ ମତ୍ସ୍ୟଜୀବୀଙ୍କ ଭିତରେ ଦେଖା ଦେଇଛି ଆତଙ୍କ । ପାଖାପାଖି ୩ ହଜାର ମତ୍ସ୍ୟଜୀବୀଙ୍କୁ ନେଇ ଗଢ଼ି ଉଠିଥିବା ଏହି ଗାଁ ଅତୀତରେ ଅନେକ ପ୍ରାକୃତିକ ବିପର୍ଯ୍ୟୟର ସାମ୍ନା କରିଛି । ବାରମ୍ବାର ବିପର୍ଯ୍ୟୟର ମାଡ଼ରେ ଭାଙ୍ଗି ପଡ଼ିଛି ଲୋକଙ୍କ ଆର୍ଥିକ ମେରୁଦଣ୍ଡ । ପୁଣି ଏକ ବାତ୍ୟାର ମୁକାବିଲା କରିବାକୁ ସେମାନଙ୍କ ପାଖରେ ନା ଅଛି ଆବଶ୍ୟକ ସମ୍ବଳ, ନା ଅଛି ପୂର୍ବଭଳି ସାହସ ।
ଚିଲିକା କୂଳରେ ଚନ୍ଦ୍ରାପୁଟ ଗାଁ । ଏଠାକାର ମୁଖ୍ୟ ଜୀବିକା ମାଛ । ସକାଳ ହେଲେ ଡଙ୍ଗା ଧରି ଚିଲିକାକୁ ବାହାରି ଯାଆନ୍ତି ଏଠାକାର ମତ୍ସ୍ୟଜୀବୀ । ଆଉ ମାଛ ମାରି ଫେରିବା ପରେ ଏଥିରେ ଚାଲେ ପରିବାର । କିନ୍ତୁ ବାତ୍ୟା ଆସିଲେ ଠପ୍ ହୋଇଯାଏ ଲୋକଙ୍କ ଜୀବନ ଜୀବିକା । ଗୋଟିଏ ପରେ ଗୋଟିଏ ପ୍ରାକୃତିକ ବିପର୍ଯ୍ୟୟ ଏବେ ମତ୍ସ୍ୟଜୀବୀଙ୍କ ଅଣ୍ଟା ଭାଙ୍ଗି ଦେଇଛି । ଅର୍ଣ୍ଣବ, ମୁରାସୁ ପରେ ଏବେ ପୁଣି ଆକୱାନ ସାମୁଦ୍ରିକ ଝଡ଼ ଲୋକଙ୍କ ଭିତରେ ଆତଙ୍କ ସୃଷ୍ଟି କରିଛି । ଡଙ୍ଗା, ଜାଲ ଓ ପରିବାରର ସୁରକ୍ଷାକୁ ନେଇ ଚିନ୍ତାରେ ମତ୍ସ୍ୟଜୀବୀ । ସମୁଦ୍ର ଓ ଚିଲିକାର ଅଶାନ୍ତ ଜଳରାଶି ମଧ୍ୟରେ ଜୀବନ ବିତାଉଥିବା ଏହି ଲୋକଙ୍କ ପାଇଁ ପ୍ରତିଟି ବାତ୍ୟା ତାଙ୍କ ଆର୍ଥିକ ମେରୁଦଣ୍ଡକୁ ଦୋହଲାଇ ଦେଇଛି । କେବଳ ଘରଦ୍ୱାର ନୁହେଁ, ନଷ୍ଟ ହେଉଛି ଡଙ୍ଗା, ଜାଲ ଓ ରୋଜଗାରର ଏକମାତ୍ର ମାଧ୍ୟମ । ଅତୀତର ବିପର୍ଯ୍ୟୟର କ୍ଷତ ଏଯାଏଁ ଶୁଖିନଥିବା ବେଳେ ପୁଣି ବାତ୍ୟା ଆକୱାନ ସେମାନଙ୍କ ଚିନ୍ତାକୁ ଦ୍ୱିଗୁଣିତ କରିଛି ।
ବାତ୍ୟା ଆସିବା ପୂର୍ବରୁ ସରକାର ପ୍ରସ୍ତୁତିର ଡିଣ୍ଡିମ ପିଟୁଛନ୍ତି । ହେଲେ ଚନ୍ଦ୍ରାପୁଟ ଗାଁରେ ଏଯାଏଁ ଆବଶ୍ୟକ ସହାୟତା ପହଞ୍ଚି ନଥିବା ଅଭିଯୋଗ କରିଛନ୍ତି ମତ୍ସ୍ୟଜୀବୀ । ପୁଣି ଏକ ବାତ୍ୟାର ମୁକାବିଲା କରିବାକୁ ସେମାନଙ୍କ ପାଖରେ ନା ଅଛି ଆବଶ୍ୟକ ସମ୍ବଳ, ନା ଅଛି ପୂର୍ବଭଳି ସାହସ । ସୁରକ୍ଷିତ ଆଶ୍ରୟସ୍ଥଳ, ଖାଦ୍ୟ ସାମଗ୍ରୀ ଓ ଜରୁରୀ ସେବାକୁ ନେଇ ରହିଛି ଅନେକ ପ୍ରଶ୍ନ । ତେବେ ଅଭିଯୋଗ ପରେ ପ୍ରଶାସନ ସେଠାରେ ପହଞ୍ଚି ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରିବା ସହ ସମସ୍ତ ସୁବିଧା ଯୋଗାଇ ଦେଇଛି । ବାରମ୍ବାର ପ୍ରାକୃତିକ ବିପର୍ଯ୍ୟୟ ମତ୍ସ୍ୟଜୀବୀଙ୍କ ଜୀବନ ଜୀବିକା ଉପରେ ପ୍ରଭାବ ପକାଉଥିବେଳେ ଏହାର ଏକ ସ୍ଥାୟୀ ପ୍ରତିକାର ପାଇଁ ଦାବି କରିଛନ୍ତି ଲୋକେ ।

