ନନ୍ଦିଘୋଷ ବ୍ୟୁରୋ: ଧୁମଧାମରେ ପାଳିତ ହୋଇଛି ପବିତ୍ର ଗୋଷ୍ଟାଷ୍ଟମୀ। ଯାଜପୁର ବଡ଼ଚଣା ବ୍ଲକ ଦେକୁଡି ହରିହାଟ ପଡିଆରେ ବଣଭୋଜିର ଆସର। ଏକପତ୍ରୀରେ ଏକାଠି ଖାଇବାର ନିଆରା ପରମ୍ପରା। ବିଭିନ୍ନ ଅଞ୍ଚଳରୁ ଜମିଛି ଶ୍ରଦ୍ଧାଳୁଙ୍କ ଭିଡ଼ ।
ଦ୍ଵାପର ଯୁଗରେ ପ୍ରଭୁ ଶ୍ରୀକୃଷ୍ଣ ଯେଉଁ ବଣ ଭୋଜି ଆୟୋଜନ କରିଥିଲେ ଏହାକୁ ମନେ ପକାଇ ଏଠାରେ ବଣ ଭୋଜିର ଆୟୋଜନ କରାଯାଇଛି । ୧୦୮ ଚୁଲିରେ ପିତଳ ହାଣ୍ଡିରେ ଶ୍ରଦ୍ଧାଳୁ ମାନେ ବିଭିନ୍ନ ପ୍ରକାର ବ୍ୟଞ୍ଚନ ପ୍ରସ୍ତୁତ କରିଥାନ୍ତି। ଏହି ବ୍ୟଞ୍ଜନକୁ ଠାକୁରଙ୍କ ପାଖେ ଲାଗି ପରେ ଏକ ପତ୍ରୀ ଭୋଜନ ଅନୁଷ୍ଠିତ ହୋଇଥାଏ। ଜାତି ବର୍ଣ୍ଣ ନିର୍ବିଶେଷରେ ସଭିଏଁ ବସି ଗୋଟିଏ ପତ୍ରରେ ପରସ୍ପରକୁ ଖୁଆଇଥାନ୍ତି। କାହିଁ କେଉଁ କାଳରୁ ଏହି ପରମ୍ପରା ଏଠାରେ ଅନୁଷ୍ଠିତ ହୋଇ ଆସୁଛି। ବାଜା ସଙ୍କୀର୍ତ୍ତନରେ ପ୍ରକମ୍ପିତ ହେଉଛି ସମଗ୍ର ପରିବେଶ । ଏହି ଆଶ୍ରମରେ ପ୍ରଭୁ ଜଗନ୍ନାଥ, ବଳଭଦ୍ର ସୁଭଦ୍ରାଙ୍କ ରୀତିନୀତି ରେ ପୂଜାର୍ଚ୍ଚନା କରାଯାଉଛି। ଆଶ୍ରମ ମଠାଧିସ ହରିହର ଦାସଙ୍କ ତତ୍ୱାବଧାନରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି।
ମନରେ ଭକ୍ତି ବିଶ୍ୱାସ ନେଇ ବିଭିନ୍ନ ଅଞ୍ଚଳରୁ ଶ୍ରଦ୍ଧାଳୁ ମାନେ ହରିହାଟ ପଡିଆରେ ଏକତ୍ରିତ ହୋଇଥାନ୍ତି। ପରମ୍ପରାକୁ ଉଜ୍ଜୀବିତ ରଖିବା ଓ ପରସ୍ପର ମଧ୍ୟରେ ଭାଇଚାରା ସୃଷ୍ଟି କରିବା ଉଦ୍ଦେଶ୍ୟରେ ଏହି ଉତ୍ସବ ପ୍ରତିବର୍ଷ ପାଳନ କରାଯାଉଛି ।

