ନନ୍ଦିଘୋଷ ବ୍ୟୁରୋ: ମାଧ୍ୟମିକ ଶିକ୍ଷା ପରିଷଦ ଦ୍ବାରା ପରିଚାଳିତ ମାଟ୍ରିକ ପରୀକ୍ଷା ୨୦୨୭ ମାର୍ଚ୍ଚ ମାସରେ ଅନୁଷ୍ଠିତ ହେବ । ଏକା ସାଙ୍ଗରେ ହେବ ମାଟ୍ରିକ, ଓପନ ସ୍କୁଲ ଓ ମଧ୍ୟମା ପରୀକ୍ଷା । ମାର୍ଚ୍ଚ ୧୨ରୁ ୨୭ ତାରିଖ ଯାଏଁ ଚାଲିବ ମାଟ୍ରିକ ପରୀକ୍ଷା । ବୋର୍ଡ ପକ୍ଷରୁ ଏ ନେଇ ବିଧିବଦ୍ଧ ସୂଚି ପ୍ରକାଶ ପାଇଛି । ନଭେମ୍ବର ୨୧ ସୁଦ୍ଧା ସରିବ ଫର୍ମ ଫିଲଅପ୍ । ଏହାପରେ କେତେଜଣ ପରୀକ୍ଷାର୍ଥୀ ପରୀକ୍ଷା ଦେବେ ସେ ନେଇ ସ୍ପଷ୍ଟ ହେବ । ରାଜ୍ୟ, ଜିଲ୍ଲା ଓ ବୋର୍ଡର ଅଧିକାରୀ ଓ କର୍ମଚାରୀଙ୍କ ସହଯୋଗରେ ପରୀକ୍ଷା ଶୃଙ୍ଖଳିତ ଭାବେ କରାଯିବ । ସଠିକ ସମୟରେ କିପରି ପରୀକ୍ଷା ଫଳ ପ୍ରକାଶ ପାଇବ ସେ ନେଇ ମୂଲ୍ୟାୟନ କରାଯିବ । ପଞ୍ଚାୟତ ଓ ନଗର ପାଳିକା ନିର୍ବାଚନ କିମ୍ବା ଅନ୍ୟ ସରକାରୀ କାର୍ଯ୍ୟକ୍ରମ ଯେପରି ପରୀକ୍ଷାକୁ ପ୍ରଭାବିତ ନକରେ ସେ ନେଇ ସରକାରଙ୍କ ସହ ବୋର୍ଡ ଆଲୋଚନା କରିବ ବୋଲି ସଭାପତି କହିଛନ୍ତି ।
ପରୀକ୍ଷା ସକାଳ ୯ଟାରୁ ଆରମ୍ଭ ହୋଇ ୧୧ଟା ୩୦ ପର୍ଯ୍ୟନ୍ତ ଚାଲିବ । ଗଣିତ ବିଷୟ ପାଇଁ ଅତିରିକ୍ତ ୧୫ ମିନିଟ୍ ସମୟ ମିଳିବ । ମାର୍ଚ୍ଚ ୧୨ରେ ମାତୃଭାଷା, ୧୫ରେ ସାଧାରଣ ବିଜ୍ଞାନ, ୧୭ରେ ଗଣିତ, ୧୯ରେ ସାମାଜିକ ବିଜ୍ଞାନ, ୨୪ରେ ଇଂରାଜୀ, ୨୫ରେ ହିନ୍ଦୀ ଓ ୨୭ରେ ସଂସ୍କୃତ ପରୀକ୍ଷା ଅନୁଷ୍ଠିତ ହେବ । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ବୋର୍ଡ ପକ୍ଷରୁ ପରୀକ୍ଷା କେନ୍ଦ୍ରରେ ପାଣି, ଫ୍ୟାନ, ଅନବରତ ଆଲୋକ ବ୍ୟବସ୍ଥା କରାଯିବ। ପରୀକ୍ଷା ପାଇଁ ପ୍ରସ୍ତୁତି କରୁଥିବା ଛାତ୍ରଛାତ୍ରୀମାନେ ବେଶ ଆଗରୁ ପରୀକ୍ଷା ସୂଚୀ ବାହାରିବା ନେଇ ଖୁସି ପ୍ରକଟ କରିଛନ୍ତି । ହାତରେ ସମୟ ଥିବାରୁ ଏଥର ଭଲ ଭାବେ ପ୍ରସ୍ତୁତି କରି ପରୀକ୍ଷା ଦେବେ ବୋଲି କହିଛନ୍ତି ଛାତ୍ରଛାତ୍ରୀ ।
