ନନ୍ଦିଘୋଷ ବ୍ୟୁରୋ: ଲହ ଲହ ଜିହ୍ବା, ହାତରେ ଖଡଗ ଆଉ ଖର୍ପର । ଚତୁଃପାର୍ଶ୍ବରେ ଅନୁଚର । ମହାଦେବ ଶିବଙ୍କ ହୃତପିଣ୍ଡ ଉପରେ ଦଣ୍ଡାୟମାନ ମହାଦେବୀ ମା’ କାଳୀଙ୍କ ଅପରୂପ । ଗରୁଡ଼କାଳୀଙ୍କ ଦର୍ଶନ ପାଇଁ ଛୁଟୁଛି ଶ୍ରଦ୍ଧାଳୁଙ୍କ ସୁଅ । କେଉଁ ଆବାହନମାନ କାଳରୁ ଯାଜପୁରର ଆଦ୍ୟକାଳୀ ଭାବେ ପୂଜା ପାଇ ଆସୁଛନ୍ତି ମାଆ ଗରୁଡ଼କାଳୀ । ଗରୁଡ଼ ମନ୍ଦିର ନିକଟରେ ବିଦ୍ୟମାନ ଥିବାରୁ ମାଆ ଏଠାରେ ଗରୁଡ଼କାଳୀ ଭାବରେ ପୂଜା ପାଇ ଆସୁଛନ୍ତି । ମାଆଙ୍କ ନିକଟରେ ପ୍ରତିଦିନ ସକାଳେ ଲାଗୁଛି ଭୋଗ, ମଧ୍ୟାହ୍ନରେ ଶାଗ ଅନ୍ନ, ରାତ୍ରିରେ ଲାଗୁଛି ମାଛ ମାଂସର ଭୋଗ । ମାଆଙ୍କ ନିକଟରେ ଯିଏ ଯାହା ମନସ୍କାମନା କରେ ତାହା ଅବିଳମ୍ବେ ପୂରଣ ହୋଇଥାଏ ବୋଲି ଭକ୍ତଙ୍କ ରହିଛି ଅତୁଟ ବିଶ୍ଵାସ ।
ଗରୁଡ଼କାଳୀ ମଣ୍ଡପକୁ ଆମେରିକାର ସ୍ଵାମୀ ନାରାୟଣ ଧାମର ରୂପ ଦିଆଯାଇଛି । ସୂକ୍ଷ୍ମ କାରୁକାର୍ଯ୍ୟ ଦେଖିବାକୁ ଜିଲ୍ଲା ତଥା ଜିଲ୍ଲା ବାହାରୁ ଶ୍ରଦ୍ଧାଳୁଙ୍କ ଭିଡ଼ ଜମୁଛି । ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ପାଇଁ ପୂଜା କମିଟି ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ ଗ୍ରହଣ କରାଯାଇଛି ।
