ନନ୍ଦିଘୋଷ ବ୍ୟୁରୋ: ପକେଟକୁ ବାଧିବ ବସ୍ ଭଡ଼ା । ଆକାଶ ଛୁଆଁ ଅତ୍ୟାବଶ୍ୟକ ସାମଗ୍ରୀ । ସର୍ବାଧିକ ବଢ଼ିଛି ପନିପରିବା ଦର । ସୀମିତ ଆୟ ଉପରେ ଦରଦାମ ବୋଝ । ଏହାରି ଭିତରେ ରାଜ୍ୟ ସରକାର ବାରମ୍ବାର ବସ ଭଡ଼ା ବୃଦ୍ଧି କରୁଥିବାରୁ ସବୁଠି ଉଠିଛି ବିରୋଧର ସ୍ବର । ତୁରନ୍ତ ଭଡ଼ାବୃଦ୍ଧି ପ୍ରତ୍ୟାହାର ଦାବିରେ ରାଉରକେଲା ଘରୋଇ ବସଷ୍ଟାଣ୍ଡ ପରିସରରେ ଆନ୍ଦୋଳନ କରାଯାଇଛି। ସୁନ୍ଦରଗଡ଼ ମୋଟର କର୍ମଚାରୀ ସଂଘ, ରାଉରକେଲା ମିନି ବସ ଆସୋସିଏସନ୍ ଓ ସିଟୁ ଶ୍ରମିକ ସଂଗଠନ ପକ୍ଷରୁ ଏହି ଆନ୍ଦୋଳନରେ ପରିବହନ ଶ୍ରମିକ ଓ କର୍ମଚାରୀମାନେ ସାମିଲ ହୋଇଛନ୍ତି । ପେଟ୍ରୋଲ ଡିଜେଲ ଦରବୃଦ୍ଧି ନିୟନ୍ତ୍ରଣ କରିବା, ବୀମା ପ୍ରିମିୟମ ହ୍ରାସ କରିବା ଏବଂ ଅତ୍ୟଧିକ ଟୋଲ ଆଦାୟ ବନ୍ଦ କରିବା ଦାବିରେ ଆନ୍ଦୋଳନକୁ ଓହ୍ଲାଇଛନ୍ତି ବିଭିନ୍ନ ସଂଗଠନ ।
ବସ ଭଡ଼ା ବୃଦ୍ଧି ଯୋଗୁଁ ଅଧିକ ପ୍ରଭାବିତ ହେବେ ଶ୍ରମିକ, ଛାତ୍ରଛାତ୍ରୀ ଓ ମଧ୍ୟବିତ୍ତ। ସାଧାରଣ ବସ ଭଡ଼ା କିଲୋମିଟର ପିଛା ୧ ଟଙ୍କା ୧୮ ପଇସା ବୃଦ୍ଧି ହୋଇଥିବାବେଳେ ଏକ୍ସପ୍ରେସ ବସ ଭଡ଼ା କିଲୋମିଟର ପିଛା ୧ ଟଙ୍କା ୨୪ ପଇସା ବୃଦ୍ଧି ହୋଇଛି । ସେମି ଡିଲକ୍ସ ବସ ଭଡ଼ା କିଲୋମିଟର ପିଛା ୧ ଟଙ୍କା ୩୦ ପଇସା ବୃଦ୍ଧି ହୋଇଥିବା ବେଳେ ଡିଲକ୍ସ ବସ ଭଡ଼ା କିଲୋମିଟର ପିଛା ୧ ଟଙ୍କା ୪୧ ପଇସା ବଢ଼ିଛି। ଏସି ଡିଲକ୍ସ ବସ ଭଡ଼ା କିଲୋମିଟର ପିଛା ୧ ଟଙ୍କା ୯୯ ପଇସା, ସୁପର ପ୍ରିମିୟମ ବସ ଭଡ଼ା କିଲୋମିଟର ପିଛା ୩ ଟଙ୍କା ୨୧ ପଇସା ଓ ସୁପର ପ୍ରିମିୟମ ସ୍ଲିପର ଏସି କୋଚ ଭଡ଼ା କିଲୋମିଟର ପିଛା ୪ ଟଙ୍କା ୬୧ ପଇସା ବୃଦ୍ଧି ପାଇଛି । ଗୋଟିଏ ବର୍ଷରେ ରାଜ୍ୟ ସରକାର ୩ ଥର ବସ ଭଡ଼ା ବୃଦ୍ଧି କରି ଲୋକଙ୍କ ଉପରେ ବୋଝ ଉପରେ ଲଳିତା ବିଡ଼ା ନଦିଛନ୍ତି ବୋଲି ଅଭିଯୋଗ ହୋଇଛି ।
