ଭୁବନେଶ୍ୱର: ମାଫିଆଙ୍କ ମଉଜ ପାଇଁ ମାଧ୍ୟମ ସାଜିଛି ମେସିନ । କଥା କଥାକେ ଗର୍ଜୁଛି ବନ୍ଧୁକ, ଫୁଟୁଛି ଗୁଳି । ଭାଇ ବନିବା ପାଇଁ ଅଣ୍ଟାରେ ଖୋସି ବୁଲୁଛନ୍ତି ମାଉଜର । ସୋସିଆଲ ମିଡିଆରେ ଭାଇରାଲ ହେଉଥିବା ଏହି ଦୃଶ୍ୟ ୟୁପି କିମ୍ବା ବିହାରର ନୁହେଁ । ନିଆଳି ଗୋବିନ୍ଦପୁର ଅଞ୍ଚଳରେ ଅଭିଯୁକ୍ତ ଭାଇଗିରି ଦେଖାଇବା ସହ କରୁଛି ବ୍ଲାଙ୍କ ଫାୟାରିଂ । ନାଁ ବିଶ୍ୱଜିତ ବେହେରା ଓରଫ କାଳିଆ । ଘର ଗୋବିନ୍ଦପୁର ଥାନା ଅନ୍ତର୍ଗତ ଲୋଧା । ବାଲି ମାଫିଆ ଭାବେ ବେଶ ପରିଚିତ । ମୋବାଇଲରୁ ମୋବାଇଲକୁ ଭିଡିଓ ଘୁରି ବୁଲିବା ପରେ ନଜର ରଖିଥିଲା ସ୍ପେଶାଲ କ୍ରାଇମ ୟୁନିଟ । ଆଉ ତାକୁ ଆଜି କାବୁ କରିବା ବେଳେ ପାଖରୁ ମିଳିଛି ଚକ୍ ଚକ୍ କରୁଥିବା ଦୁଇଟି ସେମି ଅଟୋମେଟିକ ବନ୍ଧୁକ ସହ ୮ ରାଉଣ୍ଡ ଗୁଳି । ରୋବାବ୍ ଦେଖାଇବା ପାଇଁ କାଳିଆ ଚଢୁଥିଲା ଥାର୍ ରକ୍ସ୍ ଗାଡି । ଏହି ଗାଡି ମଧ୍ୟ ଜବତ କରିଛି ପୋଲିସ । ଏହି କରିତକର୍ମା ଜଣଙ୍କୁ କାବୁ କରିବା ପରେ ପୋଲିସ ବନ୍ଧୁକ ଚୋରା ଚାଲାଣ ଲିଙ୍କ ଖୋଜିବା ଆରମ୍ଭ କରିଛି । ବିହାର ମୁଙ୍ଗେରରୁ ୩୫ ହଜାର ରୁ ୫୦ ହଜାର ମଧ୍ୟରେ ବନ୍ଧୁକ ଆଣି କ୍ରାଇମ ସିଣ୍ଡିକେଟ ଚଳାଇଥିବା କହିଛନ୍ତି ଡିସିପି ।
କିଛିଦିନ ତଳେ ଶିଶୁପାଳଗଡ଼ ତପୁ ନାୟକ ହତ୍ୟାକାଣ୍ଡରେ ବ୍ୟବହାର ହୋଇଥିଲା ବନ୍ଧୁକ । ତାର ଦିନକ ପରେ ହଳଦୀ ପଡିଆ ସୋନୁ ନାୟକ ମର୍ଡର କେସରେ ପୁଣି ଗର୍ଜିଥିଲା ବନ୍ଧୁକ। ୧୮ ଅଗଷ୍ଟରେ ଏମ୍ସ ହସ୍ପିଟାଲ ସମ୍ମୁଖରୁ ଚେନ ଝାମ୍ପୁଥିବା ବେଳେ ଲୁଟେରା ନିକଟରୁ ମିଳିଥିଲା ବନ୍ଧୁକ । ଠିକ ସେହିପରି ବହୁଚର୍ଚ୍ଚିତ ନୟାପଲ୍ଲୀ ଦୁଷ୍କର୍ମ ଘଟଣାରେ ବନ୍ଧୁକ ମୁନରେ ଇଜ୍ଜତ ଲୁଟିଥିଲା ଅଭିଯୁକ୍ତ ଶ୍ରୀଧର ପଣ୍ଡା। ପରେ ପୋଲିସ ତାକୁ ଏନକାଉଣ୍ଟର ବେଳେ କାମୁକ ନିକଟରୁ ଜବତ ହୋଇଥିଲା ବନ୍ଧୁକ । ଗତବର୍ଷ ମାର୍ଚ୍ଚ ୧୪ରେ କଟକ ବୈୟାଳିସ୍ ମୌଜାରେ ବନ୍ଧୁକ ତିଆରି କାରଖାନା ଠାବ ଘଟଣା ପୋଲିସ ପାଇଁ ବଢାଇଥିଲା ମୁଣ୍ଡବିନ୍ଧା ।
ଚୋରା ବନ୍ଧୁକ ଧରିବାକୁ କମିଶନରରେଟ ପୋଲିସ ସ୍ପେଶାଲ ଡ୍ରାଇଭ ଚଳାଉଛି । ମାଫିଆଙ୍କୁ ବି ଧରୁଛି । କିନ୍ତୁ ମାଷ୍ଟରମାଇଣ୍ଡ ଧରା ନପଡିବାରୁ କଥା କଥାକେ ଫୁଟୁଛି ଗୁଳି
