ନନ୍ଦିଘୋଷବ୍ୟୁରୋ: ବଲିଉଡ୍ର ବିଗ୍ ବି ଅମିତାଭ ବଚ୍ଚନଙ୍କୁ ବୋମା ଧମକ। ମୁମ୍ବାଇରେ ଏକାଧିକ ସ୍ଥାନକୁ ବୋମାରେ ଉଡ଼ାଇ ଦେବାକୁ ଆସିଛି ଧମକପୂର୍ଣ୍ଣ ଇମେଲ୍। ଏହାକୁ ନେଇ ମୁମ୍ବାଇରେ ହଇଚଇ ସୃଷ୍ଟି ହୋଇଥିବା ବେଳେ ହାଇ ଆଲର୍ଟରେ ରହିଛନ୍ତି ସୁରକ୍ଷା ଏଜେନ୍ସି।
ତେବେ ଧମକ ମିଳିଥିବା ସ୍ଥାନଗୁଡ଼ିକ ମଧ୍ୟରେ ରହିଛି ମୁମ୍ବାଇ ମେୟରଙ୍କ କାର୍ଯ୍ୟାଳୟ, ଅମିତାଭ ବଚ୍ଚନଙ୍କ ବଙ୍ଗଳା ‘ଜଲସା’ ଏବଂ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦର। ଏହି ସବୁ ସ୍ଥାନରେ ବୋମା ବିସ୍ଫୋରଣ କରିବାକୁ ଇମେଲ୍ ଜରିଆରେ ଧମକ ଦିଆଯାଇଛି। ଇମେଲ୍ ମିଳିବା ପରେ ତୁରନ୍ତ ଆକ୍ସନ ମୋଡ୍କୁ ଆସିଥିଲା ପୋଲିସ। ବୋମା ନିଷ୍କ୍ରିୟକାରୀ ଦଳ ଏବଂ ସୁରକ୍ଷାକର୍ମୀ ବିଭିନ୍ନ ସ୍ଥାନରେ ତଲାସୀ ଅଭିଯାନ ଆରମ୍ଭ କରିଥିଲେ। ତେବେ ଯାଞ୍ଚ ସମୟରେ କୌଣସି ସନ୍ଦେହଜନକ ବସ୍ତୁ ମିଳିନଥିବା ପୋଲିସ ପକ୍ଷରୁ ସୂଚନା ମିଳିଛି।
ସବୁଠାରୁ ଚିନ୍ତାର ବିଷୟ ହେଉଛି, ମାତ୍ର ଦୁଇ ସପ୍ତାହ ମଧ୍ୟରେ ଅମିତାଭ ବଚ୍ଚନଙ୍କ ବାସଭବନ ‘ଜଲସା’କୁ ଦ୍ୱିତୀୟ ଥର ପାଇଁ ବୋମା ଧମକ ମିଳିଛି। ଗତ ନଭେମ୍ବର ୬ ତାରିଖରେ ମଧ୍ୟ ତାଙ୍କ ବଙ୍ଗଳାକୁ ଉଡ଼ାଇ ଦେବାକୁ ଧମକପୂର୍ଣ୍ଣ ଇମେଲ୍ ଆସିଥିଲା।
କେବଳ ଅମିତାଭ ନୁହନ୍ତି, ନିକଟରେ ପଞ୍ଜାବୀ ଗାୟକ ଦିଲଜିତ ଦୋସାଞ୍ଜଙ୍କ ମୁମ୍ବାଇ କନସର୍ଟକୁ ମଧ୍ୟ ବୋମା ଧମକ ମିଳିଥିଲା। ଅନ୍ୟପଟେ ଅଭିନେତା ଟାଇଗର ଶ୍ରଫଙ୍କ ଉପରେ ନିକଟରେ ଗୁଳିମାଡ଼ ଘଟଣା ମଧ୍ୟ ସାମ୍ନାକୁ ଆସିଥିଲା। ଏହି ଆକ୍ରମଣ ପାଇଁ ବିଷ୍ଣୋଇ ଗ୍ୟାଙ୍ଗ ନିଜକୁ ଦାୟୀ କରିଥିବା ଦାବି କରାଯାଇଥିଲା।
ଲଗାତାର ଏଭଳି ଧମକ ଏବଂ ଆକ୍ରମଣ ଘଟଣା ପରେ ମୁମ୍ବାଇରେ ସେଲିବ୍ରିଟିଙ୍କ ସୁରକ୍ଷାକୁ ନେଇ ପୁଣିଥରେ ପ୍ରଶ୍ନ ଉଠିଛି। ବର୍ତ୍ତମାନ ଧମକପୂର୍ଣ୍ଣ ଇମେଲ୍ର ଉତ୍ସ ଖୋଜିବା ସହ ଘଟଣାର ତଦନ୍ତ କରୁଛି ପୋଲିସ।
