ଓକିଲ ଫୈଜାନ ଖାନ କିଏ ? ଯିଏ ସୋନମ ରଘୁବଂଶୀଙ୍କ ମାମଲା ଲଢ଼ିବେ !
ନନ୍ଦିଘୋଷ ବ୍ୟୁରୋ : ରାଜା ରଘୁବଂଶୀ ହତ୍ୟା ମାମଲା ଏପର୍ଯ୍ୟନ୍ତ ୮ ଜଣଙ୍କୁ ଗିରଫ କରାଯାଇଛି । ଯେଉଁଥିର ମୁଖ୍ୟ ଅଭିଯୁକ୍ତ ତାଙ୍କ ନିଜ ପତ୍ନୀ ସୋନମ। ସମସ୍ତେ ଚାହୁଁଛନ୍ତି ଯେ ରାଜାଙ୍କ ହତ୍ୟାର ଦୋଷୀମାନଙ୍କୁ କଠୋରତମ ଦଣ୍ଡ ମିଳୁ। ଏହି ସମୟରେ ରାୟପୁରର ଜଣେ ଓକିଲ ସୋନମଙ୍କ ମାମଲା ଲଢ଼ିବା ପାଇଁ ଦାବି କରିଛନ୍ତି।
ରାୟପୁରର ପ୍ରସିଦ୍ଧ ଓକିଲ ଫୈଜାନ ଖାନ ଘୋଷଣା କରିଛନ୍ତି ଯେ, ସେ ରାଜା ରଘୁବଂଶୀଙ୍କ ହତ୍ୟାର ମୁଖ୍ୟ ଅଭିଯୁକ୍ତ ସୋନମଙ୍କ ମାମଲା ଲଢ଼ିବାକୁ ପ୍ରସ୍ତୁତ। ଓକିଲ ଫୈଜାନ ଖାନ ଗଣମାଧ୍ୟମକୁ କହିଛନ୍ତି, ସୋନମଙ୍କ ଭାଇ ତାଙ୍କ ସହିତ ପାଟନାର ଫୁଲୱାରୀ ସରିଫ ପୋଲିସ ଷ୍ଟେସନରେ ଯୋଗାଯୋଗ କରିଛନ୍ତି। ଫୈଜାନ ଖାନଙ୍କ ଆଇନଗତ ଦଳ ସୋନମଙ୍କ ପରିବାରକୁ ଭେଟି ମାମଲା ବିଷୟରେ ଆଲୋଚନା କରିଥିଲେ। ଏକ ରିପୋର୍ଟ ଅନୁଯାୟୀ, ଆଡଭୋକେଟ୍ ଫୈଜାନ ଖାନ ଖୁବଶୀଘ୍ର ତାଙ୍କର ବକାଲତନମା ଦାଖଲ କରିବେ । ଯାହା ପରେ ସେ ଆନୁଷ୍ଠାନିକ ଭାବରେ ସୋନମ ରଘୁବଂଶୀଙ୍କ ପ୍ରତିନିଧିତ୍ୱ କରିବେ। ସୋନମ ରଘୁବଂଶୀଙ୍କ ମାମଲାରେ ଫୈଜାନ ଖାନଙ୍କ ଏଣ୍ଟ୍ରି ଏହାକୁ ଆକର୍ଷଣୀୟ କରିଛି। କାରଣ ଓକିଲ ମହମ୍ମଦ ଫୈଜାନ ଖାନ ପୂର୍ବରୁ ମଧ୍ୟ ଚର୍ଚ୍ଚାରେ ଥିଲେ।
ସେ ବଲିଉଡ ସୁପରଷ୍ଟାର ଶାହରୁଖ ଖାନଙ୍କ ବିରୋଧରେ ଏକ ମାମଲା ଦାୟର କରିଥିଲେ । ସମ୍ପ୍ରତି ଏକ ଭ୍ରାମକ ବିଜ୍ଞାପନ ମାମଲାରେ ଶାହରୁଖଙ୍କୁ ନୋଟିସ ପଠାଇଥିଲେ। ଏହା ବ୍ୟତୀତ ଫୈଜାନ ଖାନ ବିବାଦରେ ଆସିଥିଲେ ଯେତେବେଳେ ତାଙ୍କ ଉପରେ ଶାହରୁଖଙ୍କୁ ଧମକ ଦେବା ଓ 50 ଲକ୍ଷ ଟଙ୍କା ଆଦାୟ କରିବାର ଅଭିଯୋଗ ଆସିଥିଲା। ତଥାପି, ଫୈଜାନ ଖାନ ଦାବି କରିଛନ୍ତି ଯେ ତାଙ୍କ ଫୋନ୍ ଚୋରି ହୋଇଥିଲା ଓ ଧମକପୂର୍ଣ୍ଣ କଲ୍ ଅନ୍ୟ କେହି କରିଥିଲେ। ଫୈଜାନ ଖାନଙ୍କର ମଧ୍ୟ ଶାହରୁଖ ଖାନଙ୍କ ସହିତ ଦୀର୍ଘ ଦିନର ବିବାଦ ଅଛି। ସେ ୧୯୯୪ ମସିହାରେ ରିଲିଜ୍ ହୋଇଥିବା ଫିଲ୍ମ ଅଞ୍ଜାମରେ ଶାହରୁଖଙ୍କ ଚରିତ୍ର ଦ୍ୱାରା ହରିଣ ଶିକାର ବିଷୟରେ ଅପମାନଜନକ ଉଲ୍ଲେଖକୁ ବିରୋଧ କରିଥିଲେ।
