ଆହ୍ଲାବାଦ ହାଇକୋର୍ଟର ବିଚାରପତି ଭାବେ ଶପଥ ନେଲେ ବିବାଦୀୟ ଜଷ୍ଟିସ ଯଶଓ୍ବନ୍ତ ବର୍ମା

ନନ୍ଦିଘୋଷ ବ୍ୟୁରୋ: ଆହ୍ଲାବାଦ ହାଇକୋର୍ଟର ବିଚାରପତି ଭାବେ ଶପଥ ନେଲେ ବିବାଦୀୟ ଜଷ୍ଟିସ ଯଶଓ୍ବନ୍ତ ବର୍ମା । ଏକ ଆଡ଼ମ୍ବର ବିହୀନ କାର୍ଯ୍ୟକ୍ରମରେ ସେ ଶପଥ ନେଇଛନ୍ତି । ତେବେ ତାଙ୍କ ବିରୋଧରେ ଇନ-ହାଉସ ତଦନ୍ତ ଚାଲିଥିବାଯାଏଁ ତାଙ୍କୁ କୌଣସି ବିଚାର ସଂକ୍ରାନ୍ତ ଦାୟିତ୍ବ ଦିଆଯିବ ନାହିଁ ବୋଲି ଜଣାପଡିଛି ।

ତାଙ୍କ ବାସଭବନରୁ ଟଙ୍କା ଜବତ ହେବା ପରେ ଏହି ପ୍ରସଙ୍ଗକୁ ନେଇ ସାରା ଦେଶରେ ଚାଞ୍ଚଲ୍ୟ ଖେଳିଥିଲା । ତାଙ୍କୁ ଆହ୍ଲାବାଦ ହାଇକୋର୍ଟକୁ ବଦଳି କରିବା ଲାଗି ସୁପ୍ରିମକୋର୍ଟ କଲେଜିୟମ ପକ୍ଷରୁ ଯେଉଁ ନିଷ୍ପତ୍ତି ନିଆଯାଇଥିଲା ତାହାକୁ ବାର୍ ଆସୋସିଏସନ ବିରୋଧ କରିଥିଲା ।  ଆହ୍ଲାବାଦ ହାଇକୋର୍ଟର ମୁଖ୍ୟ ବିଚାରପତିଙ୍କ ପରେ ଜଷ୍ଟିସ ବର୍ମା ହେଉଛନ୍ତି ବରିଷ୍ଠତା ଭିତ୍ତିରେ ଷଷ୍ଠ । ଆହ୍ଲାବାଦ ବାର୍ ଆସୋସିଏସନର ବିରୋଧ ସତ୍ତ୍ବେ ତାଙ୍କୁ ଦିଲ୍ଲୀ ହାଇକୋର୍ଟରୁ ଆହ୍ଲାବାଦକୁ ବଦଳି ଲାଗି କେନ୍ଦ୍ର ବିଜ୍ଞପ୍ତି ଜାରି କରିଥିଲା । ବାର୍ ଆସୋସିଏସନ ପକ୍ଷରୁ କୁହାଯାଇଥିଲା, ଦୁର୍ନୀତି ଅଭିଯୋଗରେ ଜଡିତ ବିଚାରପତିଙ୍କୁ ବାର୍ ଆସୋସିଏସନ ଗ୍ରହଣ କରିବ ନାହିଁ । ଗତ ମାର୍ଚ୍ଚ ୧୪ରେ ଜଷ୍ଟିସ ବର୍ମାଙ୍କ ବାସଭବନରୁ ପୋଡା ଟଙ୍କା ଜବତ ହେବା ପରେ ହଇଚଇ ସୃଷ୍ଟି ହୋଇଥିଲା ।