ରାସନ କାର୍ଡ କଟିବା ନେଇ ସରକାରଙ୍କୁ ଘେରିଲା ବିଜେଡି: ଯୋଗ୍ୟ କିଏ ଅଯୋଗ୍ୟ କିଏ ଜାଣି ପାରୁନାହାନ୍ତି ସରକାର

ଭୁବନେଶ୍ବର: ରାସନ କାର୍ଡ କଟିବା ନେଇ ସରକାରଙ୍କୁ ଘେରିଲା ବିଜେଡି । ଯୋଗ୍ୟ କିଏ ଅଯୋଗ୍ୟ କିଏ ରାଜ୍ୟ ସରକାର ଜାଣିପାରୁନାହାଁନ୍ତି ବୋଲି ଅଭିଯୋଗ କରିଛି ବିଜେଡି । ଇ-କେୱାଇସି ନାଁରେ ବହୁ ଯୋଗ୍ୟ ହିତାଧିକାରୀଙ୍କୁ ରାସନରୁ ବାଦ ଦିଆଯାଉଛି । ପାନ ଦୋକାନୀ, ଚା ଦୋକାନୀ ସହ ବହୁ ଗରିବ ଲୋକଙ୍କୁ ରାସନ୍ କାର୍ଡରୁ ବାଦ୍ ଦିଆଯାଇଛି । ସେଥିପାଇଁ ବିଜେଡି ପ୍ରଶ୍ନ କରିଛି କି ସରକାର କାହାକୁ ଭୂତ କହୁଛନ୍ତି ? ଯୋଗ୍ୟ କାହାକୁ କହୁଛନ୍ତି ତାହା କେହି ଜାଣୁନାହାନ୍ତି । ତେଣୁ ଯୋଗ୍ୟ ହିତାଧିକାରୀଙ୍କୁ ରାସନ୍ କାର୍ଡ ଦିଆଯାଉ ବୋଲି ନିବେଦନ କରିଛି ବିଜେଡି । ନୂଆ ପୋର୍ଟାଲ ଜରିଆରେ ଗଳା ବାଟ ଦେଇ ଅଯୋଗ୍ୟଙ୍କୁ ରାସନ୍ କାର୍ଡ ଦିଆ ନଯାଉ ବୋଲି ଦାବି କରିଛି ବିଜେଡି । ସେହିପରି ବିଜେଡି ସ୍ବରରେ ସ୍ବର ମିଳାଇଛି କଂଗ୍ରେସ । ରାସନ କଟୁଥିବା ଲୋକଙ୍କ ତାଲିକା ଦେବାକୁ ସରକାରଙ୍କ ନିକଟରେ ଦାବି ରଖିଛି କଂଗ୍ରେସ । ଭୂତ କାର୍ଡ କହି ଯୋଗ୍ୟ ଲୋକଙ୍କ ରାସନ୍ କାର୍ଡ କାଟୁଛନ୍ତି ଏବଂ ଅବାନ୍ତର ଯୁକ୍ତି କରୁଛନ୍ତି । ସରକାରଙ୍କ ତଥ୍ୟରେ ତାଳମେଳ ନାହିଁ । ତେଣୁ ସରକାର ଧୀରେ ସ୍ଥିର ଭାବରେ ରାସନ ନିଷ୍ପତ୍ତି ନିଅନ୍ତୁ । ଗରିବ ଲୋକଙ୍କ ରାସନ ନ କାଟିବାକୁ କହିଛି କଂଗ୍ରେସ। ଦରକାର ହେଲେ ସରକାର ପ୍ରଥମେ ଯୋଗ୍ୟ ଓ ଅଯୋଗ୍ୟ କିଏ ଚିହ୍ନଟ କରନ୍ତୁ ବୋଲି ଚେତାଇ ଦେଇଛି କଂଗ୍ରେସ ।