ଜାତୀୟ ଗଣମାଧ୍ୟମରେ ଶିରୋନାମା ପାଲଟିଛି ଓଡ଼ିଶା ନିର୍ବାଚନ ଗଡ଼ବଡ଼ ପ୍ରସଙ୍ଗ

ଭୁବନେଶ୍ବର : ନିର୍ବାଚନ ଗଡ଼଼ବଡ଼ ନେଇ ନିର୍ବାଚନ କମିଶନଙ୍କ ନିକଟରେ ବିଜେଡିର ଅଭିଯୋଗକୁ ଗୁରୁତର ସହ ନେଇଛି ଜାତୀୟ ଗଣମାଧ୍ଯମ । ସୋମବାର ଦିନ ବିଜେଡିର ପୂର୍ବତନ ସାଂସଦ ଓ ସାଂସଦମାନେ ଦିଲ୍ଲୀଠାରେ ନିର୍ବାଚନ କମିଶନଙ୍କୁ ଭେଟି ମତଗ୍ରହଣ କେନ୍ଦ୍ରରେ ପ୍ରିଜାଇଡିଂ ଅଫିସର ମତଦାନ ସଂଖ୍ଯା ନେଇ ଦେଇଥିବା ତଥ୍ଯ ଓ ରିଟର୍ଣ୍ଣିଂ ଅଧିକାରୀ କାଉଟିଂ ସେଣ୍ଟରରେ ଦେଇଥିବା ତଥ୍ଯ ମଧ୍ଯରେ ତାଳମେଳ ରହୁନଥିବା ଅଭିଯୋଗ କରିଥିଲେ । ଏଥିସହ ଭୋଟହାର ସଂପର୍କରେ ଇଆଇସିଙ୍କ ପକ୍ଷରୁ ବିଭିନ୍ନ ସମୟର ସୂଚନା ନେଇ ମଧ୍ଯ ସନ୍ଦେହ ସୃଷ୍ଟି ହେଉଥିବା ବିଜେଡି ଦର୍ଶାଇଛି । ସର୍ବୋପରି ସର୍ବସାଧାରଣଙ୍କ ପାଇଁ ଉପଲବ୍ଧ ଲାଗି ନିୟମ ରହିଥିଲେ ସୁଦ୍ଧା ଫର୍ମ-୧୭ (ସି) ଓ ଫର୍ମ ୨୦ର ତଥ୍ଯ ଦିଆଯାଇନଥିବା ଅଭିଯୋଗ ହୋଇଛି ।

ଏପରି ଅଭିଯୋଗ ପରେ ଗତ ଦୁଇ ଦିନ ହେଲା ଜାତୀୟ ଗଣମାଧ୍ଯମ ଏହି ଖବରକୁ ଗୁରୁତ୍ବ ଦେଇ ପ୍ରସାରଣ କରିଆସୁଛି । ଆଜତକ, ଏବିପି, ନ୍ଯୁଜ ନାଇନ ଭଳି ଆଗଧାଡ଼ିର ନ୍ଯୁଜ ଚ୍ଯାନେଲ, ପିଟିଆଇ, ଏଏନଆଇ ଭଳି ନ୍ଯୁଜ ଏଜେନ୍ସି, ହିନ୍ଦୁ, ଦି ଇକୋନୋମିକ୍ସ ଟାଇମ୍ସ, ଇଣ୍ଡିଆନ ଏକ୍ସପ୍ରେସ, ଟାଇମ୍ସ ଅଫ ଇଣ୍ଡିଆ, ଦୈନିକ ଭାସ୍କର, ଡେକାନ ହେରାଲ୍ଡ, ପ୍ରଭାସାକ୍ଷୀ, ଦେଭ ଡିସକୋର୍ସ, ଦି ୱିକ ଭଳି ବିଭିନ୍ନ ଆଗଧାଡ଼ିର ସମ୍ବାଦପତ୍ର ଏହି ଖବରକୁ ଶିରୋନାମା କରିଛନ୍ତି । ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରିବା ପରେ ଦିଲ୍ଲୀ କନଷ୍ଟିଚ୍ଯୁସନ କ୍ଲବରେ ବିଜେଡି ପକ୍ଷରୁ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ଏହି ସାମ୍ବାଦିକ ସମ୍ମିଳନୀରେ ବିଜେଡି ନିର୍ବାଚନ ଗଡ଼ବଡ଼ି ସମେତ ବିଭିନ୍ନ ପ୍ରମାଣ ଗଣମାଧ୍ଯମ ଆଗରେ ଉପସ୍ଥାପନ କରିଥିଲା । ଏହି ପ୍ରମାଣକୁ ମଧ୍ଯ ଜାତୀୟ ଗଣମାଧ୍ଯମ ନିଜ ନିଜ ଆଲେଖ୍ଯରେ ସାମିଲ କରିଛନ୍ତି । ଦେଶର ନିର୍ବାଚନ ଇତିହାସରେ ଏହା ପ୍ରଥମ ଘଟଣା ବୋଲି ବିଜେଡି ପକ୍ଷରୁ କୁହାଯାଇଛି ।