Sputnik-V ନେଇଥିବା ଲୋକଙ୍କୁ ଆଶ୍ବସ୍ତି, ପ୍ରିକସନ ଡୋଜ ଭାବେ ନେଇପାରିବେ ସମାନ ଟିକା
1 min read
ନୂଆଦିଲ୍ଲୀ: ସ୍ପୁଟନିକ୍-ଭି ଟିକା ନେଇଥିବା ଲୋକଙ୍କ ପାଇଁ ଆଶ୍ୱସ୍ତି । ବୁଷ୍ଟର ଡୋଜକୁ ନେଇ ଥିବା ବିବାଦର ସମାଧାନ । ଯେଉଁମାନେ ଋଷ ନିର୍ମିତ ସ୍ପୁଟନିକ-ଭି ଟିକା ନେଇଛନ୍ତି ସେମାନେ ବୁଷ୍ଟର ଡୋଜ୍ ରୂପେ ମଧ୍ୟ ଏହି ଟିକାର ପ୍ରଥମ ଡୋଜ୍ ନେଇପାରିବେ । ଏଥିପାଇଁ ନ୍ୟାସନାଲ ଟେକ୍ନିକାଲ ଆଡଭଇଜରୀ ଗ୍ରୁପ୍ ସ୍ପୁଟନିକ ଟିକାକୁ ଅନୁମତି ଦେଇଛି । ସ୍ପୁଟନିକ ଟିକା ନେଇଥିବା ଲୋକମାନଙ୍କୁ ଏହି ଟିକାର ବୁଷ୍ଟର ଡୋଜ୍ ନେବା ପାଇଁ କୌଣସି ନୀତି ପ୍ରସ୍ତୁତ ହୋଇନଥିଲା । ଏହାପରେ ଏହି ଟିକା ନେଇଥିବା ଲୋକମାନଙ୍କ ପାଇଁ କେଉଁ ଟିକା ବୁଷ୍ଟର ଡୋଡ୍ ଭାବରେ ନିଆଯିବ ସେ ନେଇ ପ୍ରଶ୍ନ ଉଠିଥିଲା ।
୧୮ ବର୍ଷରୁ ଅଧିକ ବୟସ୍କମାନେ ଚାହିଁଲେ ଏପ୍ରିଲ ୧୦ ତାରିଖ ପରଠାରୁ ଘରୋଇ ଟିକାକରଣ କେନ୍ଦ୍ରଗୁଡ଼ିକରେ ଯାଇ ବୁଷ୍ଟର ଡୋଜ୍ ନେଇପାରିବେ ବୋଲି କେନ୍ଦ୍ର ସରକାର ଘୋଷଣା କରିଥିଲେ । ଏହି ବୟସ ବର୍ଗରେ ଯେଉଁମାନେ ଦ୍ବିତୀୟ ଟିକା ନେବାର ୯ ମାସ ପୂରା କରିଛନ୍ତି ସେମାନେ ଯାଇ ବୁଷ୍ଟର ଡୋଜ୍ ନେଇପାରିବେ ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ କହିଛି । ସ୍ପୁଟନିକ୍ ଭି ଟିକାର ପ୍ରଥମ ଓ ଦ୍ବିତୀୟ ଡୋଜର ରୋଗ ପ୍ରତିରୋଧକ ଶକ୍ତି ବୃଦ୍ଧିରେ ତାରତମ୍ୟ ଥିବା ଜଣାପଡ଼ିଛି ।
