LAC face-off: ଚୀନ୍ ସହ ବ୍ରିଗେଡିୟର ସ୍ତରୀୟ ଆଲୋଚନା ଶେଷ, କାଲି ପୁଣି ହୋଇପାରେ ବୈଠକ

ନୂଆଦିଲ୍ଲୀ: ଭାରତ ଓ ଚୀନ୍ ମଧ୍ୟରେ ସୃଷ୍ଟି ହୋଇଥିବା ସୀମା ବିବାଦକୁ ନେଇ ବୁଧବାର ବସିଥିବା ଏକ ବ୍ରିଗେଡିୟର ସ୍ତରର ବୈଠକ ସରିଛି । ତେବେ, ବୈଠକରୁ କୌଣସି ନିଷ୍କର୍ସ ବାହାରି ପାରିନାହିଁ । କୁହାଯାଉଛି ଗୁରୁବାର ପୁଣି ଥରେ ଆଉ ଏକ ବୈଠକ ବସିବ । ସୂତ୍ର ଅନୁସାରେ ଚୀନ୍ ପୂରା ମାମଲାରେ ଜଲଦି ସମାଧାନ ଚାହୁଁଛି ।

ଏହା ପୂର୍ବରୁ ପୂର୍ବ ଲଦାଖର ପ୍ୟାଙ୍ଗୋଗ ହ୍ରଦ ନିକଟରେ ଭାରତ-ଚୀନ ସୈନିକ ମୁହାଁମୁହିଁ ହୋଇଥିଲେ । ଏହାର ସମାଧାନ ପାଇଁ ଦୁଇ ଦେଶର ସେନା ମଧ୍ୟରେ ମଙ୍ଗଳବାର ଚୁଶୁଲରେ ତୃତୀୟ ଥର ଆଲୋଚନା ଆରମ୍ଭ ହୋଇଥିଲା । ବ୍ରିଗେଡ କମାଣ୍ଡର ସ୍ତରୀୟ ଆଲୋଚନା ଚୁଶୁଲରେ ହୋଇଥିଲା ।

ଗତ ମାସ ୨୯ ଓ ୩୦ ଅଗଷ୍ଟ ରାତିରେ ଚୀନ ପକ୍ଷରୁ ଅନୁପ୍ରବେଶ ଉଦ୍ୟମ ହୋଇଥିଲା । ଏହାପରେ ବ୍ରିଗେଡ୍ କମାଣ୍ଡର ସ୍ତରୀୟ କଥାବାର୍ତ୍ତା ଆରମ୍ଭ ହୋଇଥିଲା । ମଙ୍ଗଳବାର ମଧ୍ୟ ଏହି ବୈଠକ କେତେ ଘଣ୍ଟା ଧରି ଚାଲିଥିଲା । କିନ୍ତୁ ଏଥିରୁ କୌଣସି ସମାଧାନର ପନ୍ଥା ବାହାରି ପାରିନଥିଲା । ଏମିତିରେ ଦୁଇ ଦେଶ ମଧ୍ୟରେ କଥାବାର୍ତ୍ତା ଜାରି ରହିଛି । ପ୍ୟାଙ୍ଗୋଗ୍ ହ୍ରଦର ଦକ୍ଷିଣ ପାର୍ଶ୍ୱରେ ଦୁଇ ଦେଶ ମଧ୍ୟରେ ବିବାଦୀୟ ଅଞ୍ଚଳ ବିଚାର-ବିମର୍ଷ ଚାଲିଛି । ଚୀନ ଗତ କିଛିଦିନ ମଧ୍ୟରେ ୩ଥର ଅନୁପ୍ରବେଶ ଉଦ୍ୟମ କରିଥିବା ବେଳେ ଭାରତୀୟ ସେନା ତାହାକୁ ବିଫଳ କରିଛି ।

ଚୀନ ପ୍ରଥମେ ଅଗଷ୍ଟ ୨୯ ଓ ୩୦ରେ ପ୍ୟାଙ୍ଗୋଗ୍ ହ୍ରଦର ଦକ୍ଷିଣ ପାର୍ଶ୍ୱରେ ଅନୁପ୍ରବେଶ ଉଦ୍ୟମ କରିଥିଲା । ଯାହାକୁ ରୋକିଥିଲେ ଭାରତୀୟ ଯବାନ । ଏହା ପରେ ପୁଣି ଅଗଷ୍ଟ ୩୧ ରାତିରେ ଚୀନ ବ୍ଲାକ ଟପ୍ ନିକଟରେ ଅନୁପ୍ରବେଶ ଉଦ୍ୟମ କରିଥିଲା । ଯେଉଁଠାରେ ଏବେ ଭାରତୀୟ ସେନା ଉପସ୍ଥିତି ଜାହିର କରିଛି । ୧ ସେପ୍ଟେମ୍ବରରେ ମଧ୍ୟ ଚୀନ ଚୁମାର ଅଞ୍ଚଳରେ ପ୍ରବେଶ ପାଇଁ ଚେଷ୍ଟା କରିଥିଲା । ଭାରତୀୟ ସେନାକୁ ଦେଖି ବୀପରିତ ଦିଗରେ ପଳାଇଥିଲେ ।

ଭାରତ ବ୍ଲାକ ଟପ୍ ଓ ହେଲମେଟ ଟପ୍ ନିକଟରେ ଚୀନ ସେନା ମୁତୟନକୁ ନେଇ ଚିନ୍ତା ପ୍ରକାଶ କରିଛି । ଭାରତୀୟ ସୈନିକ ପର୍ବତ ଶିଖରକୁ ନିଜ ଅକ୍ତିଆରକୁ ନେଇଥିବା ବେଳେ ଭାରତ ପଛକୁ ଫେରୁ ବୋଲି ଚୀନ ସେନା ଚାହୁଁଛି । ଉଭୟ ପକ୍ଷ ମଧ୍ୟରେ ସୋମବାର ୫ ଘଣ୍ଟା ଧରି ଆଲୋଚନା ଚାଲିଥିଲା ।