ନୂଆଦିଲ୍ଲୀ: ଚଳିତ ବର୍ଷ ଭାରତୀୟ ଅର୍ଥବ୍ୟବସ୍ଥାର ଅଭିବୃଦ୍ଧିରେ ୪.୫% ହ୍ରାସ ହେବ । ୧୯୬୧ର ଏହା ଦେଶରେ ଦେଖା ଯାଇଥିବା ସବୁଠାରୁ ବଡ଼ ହ୍ରାସ ହେବ । ଏନେଇ ସୂଚନା ଦେଇଛି ଅନ୍ତର୍ଜାତୀୟ ମୁଦ୍ରା ପାଣ୍ଠି । କରୋନା ଜନିତ କଟକଣା ଲାଗୁ ହେବା ପରେ ଅଧିକାଂଶ କ୍ଷେତ୍ରରେ କାମ୍‌ ଠପ୍ ହୋଇଯାଇଛି । ଏଥିଯୋଗୁଁ ଏତେ ବଡ଼ ଧରଣର ହ୍ରାସ ଦେଖିବାକୁ ମିଳିବ ।

ତେବେ ଆସନ୍ତାବର୍ଷ ଅର୍ଥାତ ୨୦୨୧ରେ ଦେଶର ଅର୍ଥନୀତିରେ ପୁଣି ଥରେ ଉନ୍ନତି ଦେଖାଯିବ ଏବଂ ଏହା ୬.୦ ପ୍ରତିଶତର ଦୃଢ଼ ସ୍ଥିତିକୁ ପହଞ୍ଚିବ । ଅପରପକ୍ଷରେ ସାରା ବିଶ୍ୱର ଆର୍ଥିକ ଅଭିବୃଦ୍ଧିରେ ୪.୯ ପ୍ରତିଶତ ହ୍ରାସ ହେବର ଅନୁମାନ କରାଯାଉଛି । ଯାହା ଗତ ଏପ୍ରିଲରେ ବିଶ୍ୱ ଆର୍ଥିକ ପରିଷଦର ବୈଠକରେ ହୋଇଥିବା ପୂର୍ବାନୁମାନଠାରୁ ୧.୯ ପ୍ରତିଶତ କମ୍‌ । ସେହିଭଳି ମୁଦ୍ରାକୋଷ ମୁଖ୍ୟ ଅର୍ଥଶାସ୍ତ୍ରୀ ଭାରତୀୟ ଆମେରିକା ଗୀତା ଗୋପିନାଥ ମଧ୍ୟ ସମାନ କଥାକୁ ଦୋହରାଇଛନ୍ତି । ଏଭଳି ହ୍ରାସ ଐତିହାସିକ ।

ବହୁ ଦିନ ଧରି ଲକ୍‌ଡାଉନ୍‌ ଜାରି ହେବାର ପ୍ରଭାବ

ଆଇଏମ୍‌ଏଫ୍‌ର ପୂର୍ବାନୁମାନ ଅନୁଯାୟୀ ୪.୫ ପ୍ରତିଶତର ଐତିହାସିକ ହ୍ରାସ ଦେଖାଯିବାକୁ ଥିବାବେଳେ ଅଧିକ ସମୟ ଧରି ଲକ୍‌ଡାଉନ୍‌ ଲାଗୁ ରହିବା ଏହାର ପ୍ରମୁଖ କାରଣ । ମୁଦ୍ରାପାଣ୍ଠିର ରେକର୍ଡ ଅନୁଯାୟୀ ୧୯୬୧ ପରେ ଏହା ସବୁଠାରୁ ଧିମା ଅଭିବୃଦ୍ଧି । ଆଇଏମ୍‌ଏଫ୍‌ ପାଖରେ ଏହା ପୂର୍ବର ସଂଖ୍ୟା ନାହିଁ ।

ତେବେ ଆଶା କରାଯାଉଛି ଯେ, ୨୦୨୧ରେ ସ୍ଥିତିରେ ସୁଧାର ଆସିବ ଏବଂ ଆର୍ଥିକ ଅଭିବୃଦ୍ଧି ମଜବୁତ୍ ସ୍ଥିତିରେ ପହଞ୍ଚିବ ।