ରାଜ୍ୟରେ ଚିହ୍ନଟ ହେଲେ ୫ ପ୍ରକାରର କରୋନା ଭୂତାଣୁ, ଗୋଟିଏ ଷ୍ଟ୍ରେନ୍ ଦେଶର ଅନ୍ୟ କେଉଁଠାରେ ମିଳିନାହିଁ !

1 min read
Spread the love

ଭୁବନେଶ୍ୱର:  ଓଡିଶାରେ କରୋନା ଭୂତାଣୁର ୫ଟି ପ୍ରକାର ଚିହ୍ନଟ ହୋଇଛି । ଏଗୁଡିକ ହେଉଛି, ୧୯-ଏ, ୧୯-ବି, ୨୦ଏ, ୨୦ବି, ୨୦ସି । ତେବେ ମାର୍ଚ୍ଚରୁ ଜୁନ ୨୦ ମଧ୍ୟରେ ରାଜ୍ୟ ୧୮ଟି ଜିଲ୍ଲାରୁ ୨୨୫ଟି ନମୁନା ସଂଗ୍ରହ କରାଯାଇ ପରୀକ୍ଷା କରାଯାଇଥିଲା । ପରୀକ୍ଷା ପରେ ଏଭଳି ତଥ୍ୟ ସାମ୍ନାକୁ ଆସିଛି । ଆଇଏଲଏସ ନିର୍ଦ୍ଦେଶକ ଅଜୟ ପରିଡ଼ା ଓ ବୈଜ୍ଞାନିକ ସୁନୀଲ ରାଘବ ଏଭଳି ସୂଚନା ଦେଇଛନ୍ତି  । ଏମାନେ କହିଛନ୍ତି ଯେ ରାଜ୍ୟରେ କରୋନା ସଂକ୍ରମଣର ପ୍ରାଥମିକ ସ୍ତରରେ କେବଳ ୧୯ଏ ଓ ୧୯ବି କରୋନା ଭୂତାଣୁ ଦେଖିବାକୁ ମିଳିଥିଲେ । ପରେ ଏମାନେ ଭିନ୍ନ ରୂପରେ ବିକଶିତ ହୋଇଥିଲେ । ଏହି ବିକଶିତ କିମ୍ୱା ପରିବର୍ତ୍ତିତ ଭୂତାଣୁକୁ ବୈଜ୍ଞାନିକମାନେ ୨୦ଏ, ୨୦ବି ଓ ୨୦ସି ନାମ ଦେଇଛନ୍ତି । ତେବେ ଏସବୁ ଜିନୋମ୍ ମ୍ୟୁଟେସନ ସହାୟତାରେ ହୋଇଥିବା କୁହାଯାଇଛି ।

୨୦ସି ଭୂତାଣୁ କେବଳ ଓଡ଼ିଶାରେ

ଏହାଦ୍ୱାରା ଜଣାପଡିଛି ଯେ ୨୦ଏ, ୨୦ବି ଓ ୨୦ସି ଭୂତାଣୁ ଅପେକ୍ଷାକୃତ ଭାବେ ଅଧିକ ସକ୍ରିୟ ଓ ପ୍ରଭାବଶାଳୀ । ଏବେ ରାଜ୍ୟରେ ହୋଇଥିବା ସଂକ୍ରମିତଙ୍କ ମଧ୍ୟରେ ଏହି ବିକଶିତ ଭୂତାଣୁ ଦେଖିବାକୁ ମିଳୁଛି । ତେବେ ଏହା ପ୍ରାକ୍ ଭୂତାଣୁଠାରୁ ପ୍ରଭାବଶାଲୀ ଓ ସକ୍ରିୟ ହୋଇଥିବା ହେତୁ ସଂକ୍ରମିତଙ୍କ ମଧ୍ୟରେ ଭୂତାଣୁ ରୋଗଜନିତ ସମସ୍ୟା ମଧ୍ୟ ବଢୁଛି । ତେବେ ଏହା ମଧ୍ୟ ସୂଚନାଯୋଗ୍ୟ ୨୦ସି ନାମକ ବିକଶିତ ଭୂତାଣୁ କେବଳ ଓଡିଶାରେ ଦେଖିବାକୁ ମିଳିଛି । ଏଭଳି ପ୍ରକାରର ଭୂତାଣୁ ଭାରତର ଅନ୍ୟ କୌଣସି ସ୍ଥାନରେ ନାହିଁ । ତେବେ ଏବେ ବୈଜ୍ଞାନିକମାନେ ଭୂତାଣୁର ପରିବର୍ତ୍ତିତ ଓ ବିକଶିତ ରୂପକୁ ଚିହ୍ନଟ କରିସାରିବା ପରେ ଏହାର ପ୍ରତିକ୍ରିୟା ଉପରେ ଧ୍ୟାନ ଦେଇଛନ୍ତି । ଏସବୁ ଭୂତାଣୁ କିଭଳି ଓ କେଉଁ ମାତ୍ରାରେ ପ୍ରଭାବ ବିସ୍ତାର କରୁଛନ୍ତି ଏନେଇ ଅନୁସନ୍ଧାନ ଜାରି ରହିଛି । ସେହିଭଳି ମାନବ ଶରୀରରେ ଏହାର କ୍ରିୟା ପ୍ରତିକ୍ରିୟା ଉପରେ ମଧ୍ୟ ରିସର୍ଚ୍ଚ ହେଉଛି ।

କିଭଳି ହୁଏ  ଜିନୋମ୍ ମ୍ୟୁଟେସନ୍ :

ସାଧାରଣତଃ ଜିନୋମ୍ କହିଲେ ଡିଏନଏର ଏକ ସାରଣୀ କିମ୍ୱା ଏକ ଶ୍ରେଣୀ ବୁଝାଇଥାଏ । ଭୂତାଣୁ କ୍ଷେତ୍ରରେ ମଧ୍ୟ ସମାନ ଧରଣର ସାରଣୀ ଦେଖିବାକୁ ମିଳୁ । ଭୂତାଣୁ ଯେକୌଣସି ଶରୀରରେ ପ୍ରବେଶ କରିବା ପରେ ମଣିଷ ଶରୀରରେ ଥିବା ବିଭିନ୍ନ ସାରାଂଶ ଯଥା ପ୍ରୋଟିନ, ଭାଇବର ଇତ୍ୟାଦି ସଂସ୍ପର୍ଶରେ ଆସି ଭିନ୍ନ ଭିନ୍ନ ପ୍ରକାରରେ ପ୍ରତିକ୍ରିୟା ପ୍ରକାଶ କରେ  । ଯାହା ଦ୍ୱାରା ନୂଆ ନୂଆ ସାରଣୀ ପ୍ରସ୍ତୁତ ହୁଏ ଓ ଏହି ନୂଆ ଡିଏନଏ ସାରଣୀକୁ ଆମେ ଜେନମ ବୋଲି କହୁ । ସମ୍ପୂର୍ଣ୍ଣ ପ୍ରକ୍ରିୟାଟିକୁ ମ୍ୟୁଟେସନ ବୋଲି କୁହାଯାଏ । ସେହିଭଳଇ ମଣିଷ ଶରୀର ମଧ୍ୟରେ ପ୍ରବେଶ କରିବା ପରେ ଆବଶ୍ୟକୀୟ ଉତ୍ପାଦ ପାଇଁ ଭୂତାଣୁ ଅଧିକ ଦୀର୍ଘସ୍ଥାୟୀ ଓ ସକ୍ରିୟ ହେଉଛି ବୋଲି ମଧ୍ୟ କୁହାଯାଇଛି ।

ଦେଶକୁ ସଂକ୍ରମଣ ବିଶେଷ ଭାବେ ଦୁଇଟି ମାଧ୍ୟମ ଦେଇ ଆସିଛି । ୟୁରୋପ ଓ ଦକ୍ଷୀଣ ପୂର୍ବ ଏସିଆ । ଏହା ପ୍ରାରମ୍ଭିକ ସ୍ରୋତ ବୋଲି ଜଣାପଡିବା ପରେ ଏହାର ପ୍ରକାର ଉପରେ ଏବେ ଗବେଷଣା ଜାରି ରହିଛି । ଭୂତାଣୁ ସଂକ୍ରମଣର ସଂଖ୍ୟା ବଢିଲେ, ଅର୍ଥାତ୍ ଗୋଟିଏ ପ୍ରକାରର କରୋନା ଭୂତାଣୁ ଅଧିକ ସଂଖ୍ୟକ ଶରୀରରୁ ସଂକ୍ରମିତ ହେଲେ ଏହାର କ୍ଷମତା ବଢିଥାଏ । ଏଭଳି ହେବା ଦ୍ୱାରା ବାରମ୍ବାର ଭୂତାଣୁର ଡିଏନଏ ବାରମ୍ୱାର ବିକଶିତ ହେବା ସହ ମଣିଷ ଶରୀର ସଂଶ୍ପର୍ଷରେ ଆସି ଭିନ୍ନ ଭିନ୍ନ ଓ ଶକ୍ତ ପ୍ରକାରରେ ପ୍ରସ୍ତୁତ ହୁଏ ।

Leave a Reply

Your email address will not be published. Required fields are marked *

Close Bitnami banner