ଶିଳ୍ପାଭିମୁଖୀ ହେବେ ଓଡ଼ିଶାର ପିଲା, ୨୦୩୬ ସୁଦ୍ଧା ଜାତୀୟ ହାରକୁ ଟପିବ ଓଡ଼ିଶାର ଶିକ୍ଷା ନାମଲେଖା ହାର
ନନ୍ଦିଘୋଷ ବ୍ୟୁରୋ: ଏନଇପି ୨୦୨୦ ଜରିଆରେ ଓଡ଼ିଶାକୁ ନଲେଜ୍ କ୍ୟାପିଟାଲ୍ ଭାବେ ଗଢ଼ିବା ପାଇଁ ଦୁଇ ଦିନିଆ ଜାତୀୟସ୍ତରୀୟ କର୍ମଶାଳା ଭୁବନେଶ୍ବରରେ ଆୟୋଜିତ ହୋଇଛି । ୨୦୩୬ ସୁଦ୍ଧା ଓଡ଼ିଶାର ଶିକ୍ଷା ନାମଲେଖା ହାର ଜାତୀୟ ହାରକୁ ଟପିବ । ପାରମ୍ପରିକ ପାଠ୍ୟକ୍ରମ ସହ ଦକ୍ଷତା ବିକାଶ ପାଠ୍ୟକ୍ରମ ପାଇଁ ରାଜ୍ୟ ସରକାର ଖସଡ଼ା ପ୍ରସ୍ତୁତ କରୁଛନ୍ତି । ଜାତୀୟ ଶିକ୍ଷା ନୀତି ୨୦୨୦କୁ ଲାଗୁ କରିବାରେ କେନ୍ଦ୍ରଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକାକୁ ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି । ଓଡ଼ିଆ ଭାଷାରେ ପାଠ୍ୟକ୍ରମ ଚାଲିଲେ ଓଡ଼ିଶା ଭାରତର ଜ୍ଞାନର ପେଣ୍ଠସ୍ଥଳୀ ହେବା ସହ ଶିକ୍ଷା କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ଆସିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ସେହିପରି କ୍ୟାମ୍ପସରେ ଛାତ୍ରୀଙ୍କ ସୁରକ୍ଷା ପାଇଁ ମୁଖ୍ୟମନ୍ତ୍ରୀଙ୍କ ଦ୍ୱାରା ଲୋକାର୍ପିତ ହୋଇଛି ଶକ୍ତିଶ୍ରୀ ଆପ୍ ।
ଶିକ୍ଷା କେବଳ ପୁସ୍ତକଗତ ଜ୍ଞାନ ନୁହେଁ, ଏହା ପ୍ରଗତିର ମୂଳଦୁଆ । ଓଡ଼ିଶାର ପିଲାମାନେ ଶିଳ୍ପାଭିମୁଖୀ ହେବେ, ବିଶ୍ୱସ୍ତରରେ ପ୍ରତିଯୋଗିତା କରିବେ । କ୍ୟାମ୍ପସ୍ ବାତାବରଣକୁ ଶୈକ୍ଷିକ ଏବଂ ସୁଦୃଢ଼ କରିବାକୁ ଆହ୍ବାନ ଦେଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ । ଟିଚିଂ, ରିସର୍ଚ୍ଚ, ଇନୋଭେସନ ପ୍ରତି ବିଶ୍ଵବିଦ୍ୟାଳୟର ଚରିତ୍ର ହେବା ଦରକାର । ଉଚ୍ଚ ଶିକ୍ଷା ବିଭାଗରେ କାର୍ଯ୍ୟରତ ମହିଳା କର୍ମଚାରୀ ଓ ଛାତ୍ରୀଙ୍କ ସୁରକ୍ଷା ପାଇଁ ମୁଖ୍ୟମନ୍ତ୍ରୀ ଆରମ୍ଭ କରିଛନ୍ତି ଶକ୍ତିଶ୍ରୀ ଆପ୍ । ନୂଆ ଶିକ୍ଷା ନୀତି ଜରିଆରେ ଭାରତକୁ ଜ୍ଞାନର ଭଣ୍ଡାର କରିବା ପାଇଁ ଯୋଜନା ରହିଛି । ଖାଲି ସେତିକି ନୁହେଁ, ସଂସ୍କୃତି ଓ ଶିକ୍ଷାର ଅପୂର୍ବ ସମନ୍ବୟ ହେଉଛି ଓଡ଼ିଶା । ସାରଳା ଦାସଙ୍କଠାରୁ ଭୀମ ଭୋଇଙ୍କ ଦର୍ଶନକୁ ପ୍ରଶଂସା କରିଛନ୍ତି କେନ୍ଦ୍ରମନ୍ତ୍ରୀ । କ୍ରୀଡ଼ା, ନାଚ, ଗୀତ, ଓଡ଼ିଆ ଭାଷା ସହ ପିଲାଙ୍କୁ ସାମିଲ ହେବାକୁ ହେବ । ବିଶ୍ଵବିଦ୍ୟାଳୟ ଓ କଲେଜ କ୍ୟାମ୍ପସରୁ ଆସୁଥିବା ନୂଆ ଚିନ୍ତାଧାରା ହିଁ ଆଗାମୀ ସୁବର୍ଣ୍ଣ ଭାରତରେ ରୋଡ ମ୍ୟାପ୍ ହୋଇପାରିବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ । ଉପାନ୍ତ ଅଞ୍ଚଳରେ ୧୮ଟି ନୂଆ ବିଶ୍ଵବିଦ୍ୟାଳୟ ନିର୍ମାଣ ହୋଇଛି । ଭାଷା ଭିତ୍ତିକ ଶିକ୍ଷାକୁ ଗୁରୁତ୍ୱ ଦିଆଯାଇଛି । ସେହିପରି ଦୁଇଟି ଇଞ୍ଜିନିୟରିଂ କଲେଜ, ଦୁଇଟି କୃଷି ମହାବିଦ୍ୟାଳୟ ନିର୍ମାଣ ହେବ । ଯୁବପୀଢ଼ିଙ୍କ ନିଯୁକ୍ତି ପାଇଁ ସରକାର ନଜର ଦେଇଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ଶିକ୍ଷାକୁ ରାଜ୍ୟ ସରକାର ସର୍ବୋଚ୍ଚ ପ୍ରାଥମିକତା ଦେଇ ଚଳିତବର୍ଷରେ ଶିକ୍ଷା କ୍ଷେତ୍ର ପାଇଁ ୪୧ ହଜାର ୨୭୩ କୋଟି ଟଙ୍କାର ପାଣ୍ଠି ବ୍ୟୟ ବରାଦ କରିଛନ୍ତି । ମୁଖ୍ୟମନ୍ତ୍ରୀଙ୍କ ମତରେ, ଏହି ପୁଞ୍ଜି ବିନିଯୋଗ ଓଡ଼ିଶାର ଯୁବପିଢ଼ିଙ୍କ ଉଜ୍ବଳ ଭବିଷ୍ୟତ ପାଇଁ ଏକ ମଜବୁତ ମୂଳଦୁଆ ସଦୃଶ ହେବ । ଏଭଳି ପଦକ୍ଷେପ ମାଧ୍ୟମରେ ରାଜ୍ୟର ଶିକ୍ଷା ଭିତ୍ତିଭୂମିକୁ ବିଶ୍ୱସ୍ତରୀୟ କରିବା ପାଇଁ ଲକ୍ଷ୍ୟ ରଖାଯାଇଛି । ଗ୍ରାମାଞ୍ଚଳ ଓ ସହର ମଧ୍ୟରେ ଥିବା ଶୈକ୍ଷିକ ପାର୍ଥକ୍ୟକୁ ଦୂର କରିବା ପାଇଁ ସରକାର ଗୋଦାବରୀଶ ମିଶ୍ର ଆଦର୍ଶ ବିଦ୍ୟାଳୟ ଯୋଜନା କରିଛନ୍ତି । ଏହାସହ ସାମାଜିକ ନ୍ୟାୟ ଓ ସମାନତାକୁ ଗୁରୁତ୍ୱ ଦେଇ ସରକାର ଉଚ୍ଚଶିକ୍ଷା କ୍ଷେତ୍ରରେ SEBC ବର୍ଗର ଛାତ୍ରଛାତ୍ରୀଙ୍କ ପାଇଁ ୧୧.୨୫ ପ୍ରତିଶତ ସଂରକ୍ଷଣ ବ୍ୟବସ୍ଥା ଲାଗୁ କରିଛନ୍ତି । ସେହୀପରି ପାରମ୍ପରିକ ପାଠ୍ୟକ୍ରମ ସହ ଦକ୍ଷତା ଭିତ୍ତିକ ପାଠ୍ୟକ୍ରମ ଓଡ଼ିଶାରେ ଆରମ୍ଭ ହେବ । ଇଣ୍ଡିଆ ନଲେଜ ସେଣ୍ଟର ଜରିଆରେ ବେଦ, ଉପନିଷଦ ସହ ବିଭିନ୍ନ କ୍ଷେତ୍ରରେ ପିଲାମାନଙ୍କୁ ଡିଗ୍ରୀଧାରୀ କରିବା ପାଇଁ ଦେଶର ବିଭିନ୍ନ ରାଜ୍ୟରେ ଦିଆଯାଉଥିବା ବେଷ୍ଟ ପ୍ରାକ୍ଟିସକୁ ଓଡ଼ିଶା ସରକାର ଆପଣାଇବେ ବୋଲି କହିଛନ୍ତି ଉଚ୍ଚଶିକ୍ଷା ମନ୍ତ୍ରୀ । ଏହାସହ ଅଧ୍ୟାପକ ଓ କର୍ମଚାରୀ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଛି ବୋଲି ମତ ରଖିଛନ୍ତି ମନ୍ତ୍ରୀ । ଦୁଇଦିନିଆ ଜାତୀୟ କର୍ମଶାଳାରେ ଉଚ୍ଚଶିକ୍ଷା ସଚିବ ଅରବିନ୍ଦ ଅଗ୍ରୱାଲଙ୍କ ସମେତ ବିଭାଗୀୟ ନିର୍ଦ୍ଦେଶକ ଏବଂ ବିଭିନ୍ନ ରାଜ୍ୟର ଶିକ୍ଷାବିତ ଓ ନୀତି ନିର୍ଦ୍ଧାରକ ଉପସ୍ଥିତ ଥିଲେ ।
