ଓଡ଼ିଶା-ଆନ୍ଧ୍ର ସୀମାନ୍ତରେ କାଳବୈଶାଖୀ ତାଣ୍ଡବ । ପେଦାବାଇଲ ସାପ୍ତାହିକ ହାଟରେ ଗଛ ପଡ଼ି ୨ ମହିଳାଙ୍କ ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି । ଆହତ ମାନଙ୍କୁ ଆନ୍ଦ୍ରପ୍ରଦେଶର ପାଡେର ଡାକ୍ତରଖାନାରେ ଭର୍ତ୍ତି କରାଯାଇଛି । ପେଦାବାଇଲ ସାପ୍ତାହିକ ହାଟ ଚାଲିଥିବା ସମୟରେ ହଠାତ୍ ପବନ ସାଙ୍ଗକୁ ବର୍ଷା ଆରମ୍ଭ ହୋଇଥିଲା । ଲୋକେ ନିଜ ଜୀବନ ବଞ୍ଚାଇବା ପାଇଁ ଏପଟ ସେପଟ ଦୌଡ଼ିଥିଲେ । କିନ୍ତୁ କିଛି ବୁଝିବା ଆଗରୁ ହଠାତ ଏକ ବିରାଟ ଗଛ ହାଟ ଉପରେ ଉପୁଡ଼ି ପଡ଼ିଥିଲା । ମୃତକ କୋରାପୁଟ ଜିଲ୍ଲା ନନ୍ଦପୁର ବ୍ଲକର ଜରାଇ ଗାଁର ସୀତାମା ଖଡା ଓ ତିଲତମା ଖରା ।ସ୍ଥାନୀୟ ଲୋକ ଓ ପୋଲିସ ମିଶି ଆହତମାନଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରିଥିଲେ l ପଟାଙ୍ଗୀ ବିଧାୟକ ରାମଚନ୍ଦ୍ର କାଡାମ ଘଟଣା ସ୍ଥଳରେ ପହଂଚି ସ୍ଥିତି ଅନୁଧ୍ୟାନ କରିଥିବା ସହ ପରିବାରକୁ ସମବେଦନା ଜଣାଇଛନ୍ତି ।
Home Blog
ଯୁବକଙ୍କୁ ପନିକିରେ ହାଣି ବୁଲେଟ ଚଢ଼ାଇଦେବା ଘଟଣା : ୪ ଜଣଙ୍କୁ ଗିରଫ କଲା ପୋଲିସ
ପୁରୀ କଣାସ ଗୋଲା ବଜାର ସ୍ଥିତ ମାଛ ମାର୍କେଟରେ ଯୁବକଙ୍କୁ ପନିକିରେ ହାଣି ବୁଲେଟ ଚଢ଼ାଇଦେବା ଘଟଣା । ୪ ଜଣଙ୍କୁ ଗିରଫ କଲା ପୋଲିସ । ଜଣେ ପୂର୍ବରୁ ଗିରଫ ହୋଇଥିବାବେଳେ ଆଜି ଥାନାରେ ଆତ୍ମସମର୍ପଣ କରିଛନ୍ତି ୩ ଅଭିଯୁକ୍ତ । ୭ ଜଣଙ୍କ ବିରୋଧରେ ଥାନାରେ ଅଭିଯୋଗ ହେଇଥିଲା । ୩ ଅଭିଯୁକ୍ତଙ୍କୁ ଅଧିକ ପଚରାଉଚରା ପାଇଁ ସତ୍ୟବାଦୀ ଥାନାକୁ ନେଇଛି ପୋଲିସ । ଗିରଫ ଅଭିଯୁକ୍ତମାନେ ହେଲେ ଧର୍ମପଦ ବଡ଼ଜେନା, ଚନ୍ଦ୍ରକାନ୍ତ ଜେନା, ଚିନ୍ମୟ ଗଜେନ୍ଦ୍ର ଓ ଅଜୟ ବଳିଆରସିଂହ । ତେବେ ଘଟଣାର ମାଷ୍ଟର ମାଇଣ୍ଡ ହାପିକୁ ଖୋଜୁଛି ପୋଲିସ । ହାପି ଫେରାର ଥିବାରୁ ଏକ ସ୍ବତନ୍ତ୍ର ଟିମ ଗଠନ କରି ଚଢ଼ାଉ କରୁଛି ପୋଲିସ । ଘଟଣାରେ ବ୍ୟବହୃତ ପନିକ ଓ ଦୁଇଟି ମୋବାଇଲ୍ ପୋଲିସ ଜବତ କରିଛି । ସେପଟେ କର୍ତ୍ତବ୍ୟରେ ଅବହେଳା ପାଇଁ ASI କୁମାର ବିଶ୍ବାଳ, ସଞ୍ଜୟ କୁମାର ପାଟ୍ଟଶାଣୀ ଓ ସନ୍ତୋଷ କୁମାର ଉଦୟ ସିଂହଙ୍କୁ ବଦଳି କରାଯାଇଛି । ଘଟଣାରେ ଅଧିକ ତଦନ୍ତ ପାଇଁ ସାଇବର ସେଲର ସହଯୋଗ ନିଆଯାଇଛି । ଫେରା ଅଭିଯୁକ୍ତ ଓ ବ୍ୟବହୃତ ବାଇକ୍ ଖୋଜୁଛି ପୋଲିସ ।
ଭବାନୀପୁର ଆସନରୁ ହାରିଲେ ମମତା ବାନାର୍ଜୀ
ପଶ୍ଚିମବଙ୍ଗ ରାଜନୀତିରେ ବଡ଼ ବିପର୍ଯ୍ୟୟ। ଭବାନୀପୁର ଆସନରୁ ହାରିଲେ ମମତା ବାନାର୍ଜୀ । ୧୫ ହଜାର ୧୧୪ ଖଣ୍ଡ ଭୋଟରେ ବିଜୟୀ ହୋଇଛନ୍ତି ଶୁଭେନ୍ଦୁ ଅଧିକାରୀ। ପଶ୍ଚିମବଙ୍ଗରେ ଟିଏମସି ଗଡ଼ ଭବାନୀପୁରରେ ରୋମାଞ୍ଚକର ହୋଇଥିଲା ଲଢ଼େଇ। ଗଣତି ଆରମ୍ଭରୁ ବିଜେପିର ଶୁଭେନ୍ଦୁ ଅଧିକାରୀ ଆଗୁଆ ଥିବା ବେଳେ, ମଧ୍ୟାହ୍ନ ବେଳକୁ ପଛରେ ପଡ଼ି ଯାଇଥିଲେ। ଟିଏମସି ସୁପ୍ରିମୋ ମମତା ବାନାର୍ଜୀ ୧୫ ହଜାରରୁ ଅଧିକ ଭୋଟରେ ଲିଡକୁ ଚାଲି ଆସିଥିଲେ। ୧୩ ରାଉଣ୍ଡ ଯାଏ ମମତା ଲିଡ ବଜାୟ ରଖିଥିଲେ। ଏହାପରେ ହଠାତ ଗଣତି ବନ୍ଦ ହୋଇ ଯାଇଥିଲା। ପ୍ରାୟ ୨ ଘଣ୍ଟା ପରେ ଗଣତି ଆରମ୍ଭ ହେବା କ୍ଷଣୀ ମମତାଙ୍କ ଲିଡ ଗ୍ୟାପ କମିବାରେ ଲାଗିଥିଲା। ପ୍ରଥମେ ୫ ହଜାର ଓ ପରେ ଏହା ୩ ହଜାରକୁ ଖସିଥିଲା। ଶେଷରେ ଶୁଭେନ୍ଦୁ ଅଧିକାରୀ ୧୫ ହଜାର ୧୧୪ ଖଣ୍ଡ ଭୋଟରେ ମମତା ବାନାର୍ଜୀଙ୍କୁ ପରାସ୍ତ କରି ପଶ୍ଚିମବଙ୍ଗ ରାଜନୀତି ସହ ଟିଏମସିକୁ ଝଟକା ଦେଇଛନ୍ତି। ୨୦୨୧ ବିଧାନସଭା ନିର୍ବାଚନ ବେଳେ ନନ୍ଦିଗ୍ରାମରେ ଶୁଭେନ୍ଦୁ ଓ ମମତାଙ୍କ ମଧ୍ୟରେ ଏଭଳି ଟକ୍କର ଦେଖିବାକୁ ମିଳିଥିଲା। ଶେଷରେ ଶୁଭେନ୍ଦୁ ୨ ହଜାରରୁ କମ ଭୋଟରେ ବିଜୟ ହାସଲ କରିଥିଲେ।
ପଶ୍ଚିମବଙ୍ଗରେ ବିଜେପି, ଆସାମରେ ଏନଡିଏ ଓ ତାମିଲନାଡୁରେ ବିଜୟଙ୍କ ବାଜିମାତ୍….
ନନ୍ଦିଘୋଷ ବ୍ୟୁରୋ : ବଙ୍ଗରେ ଫୁଟିଲା ପଦ୍ମ। ପଶ୍ଚିମବଙ୍ଗରେ ପ୍ରଥମ ଥର ପାଇଁ ସରକାର ଗଢ଼ିବ ବିଜେପି। ପଶ୍ଚିମବଙ୍ଗରେ ଏକକ ସଂଖ୍ୟାଗରିଷ୍ଠତା ହାସଲ କରିଛି ବିଜେପି । କ୍ଷମତାରୁ ଯାଇଛନ୍ତି ଏକମାତ୍ର ମହିଳା ମୁଖ୍ୟମନ୍ତ୍ରୀ ମମତା ବାନାର୍ଜୀ। ନିର୍ବାଚନରେ ଟିଏମସିର ଶୋଚନୀୟ ପରାଜୟ ପରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ମମତା ବାନାର୍ଜୀ। ରାଜ୍ୟପାଳଙ୍କୁ ଭେଟି ନିଜର ଇସ୍ତଫା ପତ୍ର ପ୍ରଦାନ କରିବେ ମମତା ବାନାର୍ଜୀ। ୨୯୩ ଆସନ ବିଶିଷ୍ଟ ଆସନରେ ବାଜିମାତ କରିଛି ବିଜେପି। ଏକପାଖିଆ ଭାବେ ବିଜୟ ହାସଲ କରିଛି ବିଜେପି। ଲଗାତର ତିନି ଥରର ଟିଏମସି ସରକାରକୁ ପତନ କରି ସରକାର ଗଢ଼ିବାକୁ ଯାଉଛି ବିଜେପି। ପଶ୍ଚିମବଙ୍ଗରେ ମମତା ପରାଜିତ ହେବାର ଅନେକ କାରଣ ରହିଛି। ଦେଶର ସମୂହ ବିଜେପି ଶକ୍ତି ବନାମ ଦିଦି, ଏସଆଇଆରରେ ୯୦ ଲକ୍ଷ ଭୋଟର ବଳି ପଡିଯିବା ମମତାଙ୍କ ପରାଜୟର ପ୍ରମୁଖ କାରଣ ରହିଛି। ସେହିପରି ଟିଏମସିର ମହିଳା ଭୋଟ ବ୍ୟାଙ୍କକୁ ଭାଙ୍ଗିବାରେ ସଫଳ ହୋଇଛି ବିଜେପି। ସେହିପରି ଆସାମରେ ତୃତୀୟ ଥର ପାଇଁ ସରକାର ଗଢ଼ିବ ବିଜେପି। ଦ୍ବିତୀୟ ଥର ପାଇଁ ମୁଖ୍ୟମନ୍ତ୍ରୀ ହେବେ ହିମନ୍ତ ବିଶ୍ବଶର୍ମା। ଆସାମ ବିଧାନସଭା ନିର୍ବାଚନରେ ଲୋକସଭାର ବିରୋଧୀ ଦଳ ଉପନେତା ଗୌରବ ଗୋଗଇ ପରାସ୍ତ ହୋଇଛନ୍ତି। ଅନ୍ୟପଟେ ତାମିଲନାଡ଼ୁରେ କମାଲ କରିଛି ଟିଭିକେ। ସିନେ ଷ୍ଟାରରୁ ମୁଖ୍ୟମନ୍ତ୍ରୀ ହୋଇପାରନ୍ତି ବିଜୟ। ଏଥିସହ ଶାସକ ଡିଏମକେ ମେଣ୍ଟକୁ ଲାଗିଛି ଶକ୍ତ ଝଟକା। ସରକାର ଗଢ଼ିବାକୁ ଟିଭିକେକୁ ସମର୍ଥନ ଦେଇପାରେ AIADMK। ନିର୍ବାଚନରେ ଦେଶର ଏକମାତ୍ର ବାମଗଡ଼ର ପତନ ହୋଇଛି। କେରଳରେ କ୍ଷମତାରୁ ଗଲା LDF। ଦକ୍ଷିଣ ଭାରତରେ କଂଗ୍ରେସକୁ ସାନ୍ତ୍ବନା ମିଳିଥିବା ବେଳେ, କେରଳରେ ସରକାର କରିବ UDF। ପୁଡୁଚେରୀରେ ପୁଣି ମୁଖ୍ୟମନ୍ତ୍ରୀ ହେବେ ଏନ. ରଙ୍ଗାସ୍ବାମୀ। ଦ୍ବିତୀୟ ଥର ପାଇଁ ପୁଡୁଚେରୀରେ ସରକାର ଗଢ଼ିବ ବିଜେପି।
ଯାତ୍ରୀଙ୍କ ପାଇଁ ନାହିଁ ବସ୍ ଷ୍ଟପ, ପ୍ରଚଣ୍ଡ ଖରାରେ ଅପେକ୍ଷା କରୁଛନ୍ତି ଯାତ୍ରୀ
ମାଳମାଳ ବସ୍ । ହେଲେ ନାହିଁ ବସ୍ ଷ୍ଟପ୍ । ଖରାରେ ଅପେକ୍ଷା କରୁଛନ୍ତି ଯାତ୍ରୀ । ବାରମ୍ବାର ଅଭିଯୋଗ ପରେ ବି ଫଳ ଶୂନ । ସମ୍ବଲପୁରରେ ତେଜୁଛି ଯାତ୍ରୀ ଅସନ୍ତୋଷ । ସମ୍ବଲପୁର ସହରରେ ମାଳ ମାଳ ଆମ ବସ୍ ଚଳାଚଳ କରୁଛି ହେଲେ ସହରରେ ଗୋଟିଏ ବି ବସ ଷ୍ଟପ ନାହିଁ । ଫଳରେ ନାହିନଥିବା ଅସୁବିଧା ଭୋଗୁଛନ୍ତି ସମ୍ବଲପୁର ସହର ବାସୀ l କିଛିଦିନ ଆଗରୁ ଖୋଦ୍ ମୁଖ୍ୟମନ୍ତ୍ରୀ ସମ୍ବଲପୁର ଆସି ସହର ବାସୀଙ୍କ ଯାତାୟାତ ସୁବିଧା ପାଇଁ ୫୦ ଟି ଆମ ବସ୍ ର ଶୁଭାରମ୍ଭ କରିଥିଲେ । କିନ୍ତୁ ବସ୍ ଷ୍ଟପ କଥା ଭୁଲିଗଲେ । ଫଳରେ ପ୍ରଚଣ୍ଡ ଖରାରେ ଗଛ ତଳେ ବସ କୁ ଅପେକ୍ଷା କରୁଛନ୍ତି ଯାତ୍ରୀ l ବାରମ୍ବାର ଅଭିଯୋଗ ପରେ ବି କୃଟ ପକ୍ଷରୁ କୌଣସି ପଦକ୍ଷେପ ନିଆଯାଉନଥିବା ବେଳେ ଜିଲ୍ଲା ପ୍ରଶାସନ ମଧ୍ୟ ଚୁପ୍ ଥିବାରୁ ତେଜୁଛି ଅସନ୍ତୋଷ ।
ବିଶେଷ କରି ସହରର ଗୋଲ ବଜାର, ଲକ୍ଷ୍ମୀ ଟକିଜ ଛକ, କଚେରୀ ଛକ, ଅଇଁଠା ପାଲି ଛକ ରୁ ବୁର୍ଲା ହୀରାକୁଦ, ମାଆ ସମଲେଶ୍ଵରୀଙ୍କ ମନ୍ଦିରକୁ ସବୁବେଳେ ଯାତ୍ରୀ ଯାତାୟାତ କରୁଛନ୍ତି । କିନ୍ତୁ ସହରରେ ଗୋଟିଏ ମଧ୍ୟ ବସ ଷ୍ଟପ ନଥିବାରୁ ଅନେକ ସମୟରେ ଅସୁବିଧାର ସମ୍ମୁଖିନ ହେଉଛନ୍ତି ସହର ବାସୀ । ସବୁଠାରୁ ବଡ଼କଥା ହେଲା ବର୍ତ୍ତମାନ ସମ୍ବଲପୁର ସହରର ତାପମାତ୍ରା ୪୫ ଡିଗ୍ରୀ ରହୁଛି । ଏହି ସମୟରେ ବହୁ ମୁସ୍କିଲରେ ଗଛ ତଳେ ଆଶ୍ରୟ ନେବାକୁ ବାଧ୍ୟ ହେଉଛନ୍ତି ଯାତ୍ରୀ । ତେଣୁ ଖୁବଶୀଘ୍ର ରାଜ୍ୟ ସରକାର ଙ୍କ ସହ ଆଲୋଚନା କରି ଏହାର ବ୍ୟବସ୍ଥା କରାଯାଉ ବୋଲି ଦାବି କରିଛନ୍ତି ସହରବାସୀ ।
ବାତ୍ସଲ୍ୟ ଯୋଜନାରୁ ବଞ୍ଚିତ ହିତାଧିକାରୀ, ଏକବର୍ଷ ହେଲା ମିଳୁନି ୪ ହଜାର ଆର୍ଥିକ ସହାୟତା
ରାଉରକେଲା : ବାତ୍ସଲ୍ଯ ଯୋଜନାରୁ ବଞ୍ଚିତ ହିତାଧିକାରୀ । ଏକବର୍ଷ ହେଲା ମିଳୁନି ଆର୍ଥିକ ସହାୟତା । ବାରମ୍ବାର ଅଫିସ ଦୌଡ଼ିଦୌଡ଼ି ନିରାଶ ଅଭିଭାବକ । ଅପେକ୍ଷାରେ ସୁନ୍ଦରଗଡ଼ର ୩ ଶହ ଅସହାୟ ଛାତ୍ରଛାତ୍ରୀ । ରାଉରକେଲା ସହରର ସେକ୍ଟର ୬ କଲ୍ୟାଣୀ ରାୟ କଲୋନୀରେ ରହୁଥିବା ବିଧବା ମାନସୀ ବାରିକଙ୍କ ପୁଅର ପାଠପଢ଼ା ପାଇଁ ମିଶନ ବାତ୍ସଲ୍ୟ ଯୋଜନାରେ ଆର୍ଥିକ ସହାୟତା ପାଇଁ ଦରଖାସ୍ତ କରି ନିରାଶ ହୋଇଥିବା ଅଭିଯୋଗ କରିଛନ୍ତି । ୨୦୨୫ ଜାନୁୟାରୀ ୬ ତାରିଖ ଦରଖାସ୍ତ କରିଥିଲେ ମଧ୍ୟ ମାସିକ ୪ ହଜାର ଟଙ୍କା ଆର୍ଥିକ ସହାୟତା ପାଇନଥିବା ଅଭିଯୋଗ କରିଛନ୍ତି । ୨୦୨୦ ସେପ୍ଟେମ୍ବର ୧୫ରେ କରୋନା ଯୋଗୁଁ ମାନସୀଙ୍କ ସ୍ବାମୀଙ୍କ ମୃତ୍ୟୁ ହୋଇଥିଲା । ସେହିପରି ସେକ୍ଟର ୬ କଲ୍ୟାଣୀ ରାୟ କଲୋନୀରେ ରହୁଥିବା ବିଧବା ସୁଚିତ୍ରା ବାରିକ ମଧ୍ଯ ୨୦୨୫ ଜାନୁୟାରୀ ୬ ତାରିଖ ଦରଖାସ୍ତ କରି ନିରାଶ ହୋଇଥିବା ଅଭିଯୋଗ କରିଛନ୍ତି । ରାଉରକେଲା ମହାନଗର ନିଗମ କାର୍ଯ୍ୟାଳୟରେ ପ୍ରଶାସନ ପକ୍ଷରୁ ଅନୁଷ୍ଠିତ ଅଭିଯୋଗ ଶୁଣାଣୀ ଶିବିରରେ ଅଭିଯୋଗ କରି ଆର୍ଥିକ ସହାୟତା ଦେବା ପାଇଁ ଅନୁରୋଧ କରିଛନ୍ତି ।
ମିଶନ ବାତ୍ସଲ୍ୟ ଯୋଜନାରେ ସୁନ୍ଦରଗଡ଼ ଜିଲ୍ଲାରେ ଗତ ଏକବର୍ଷ ହେଲା ୩ ଶହରୁ ଅଧିକ ଦରଖାସ୍ତ ଆସିଥିଲେ ମଧ୍ୟ ରାଜ୍ୟ ସରକାରଙ୍କ ପକ୍ଷରୁ ଆର୍ଥିକ ସହାୟତା ଆସିନଥି ଅଭିଯୋଗ ହୋଇଛି । ଜିଲ୍ଲାର ୩ ଶହରୁ ଅଧିକ ଗରିବ ହିତାଧିକାରୀ ଆର୍ଥିକ ସହାୟତା ପାଇବାରୁ ବଞ୍ଚିତ ହୋଇଥିଵା ଅଭିଯୋଗ ହୋଇଛି । ରାଜ୍ୟ ସରକାର ମିଶନ ବାତ୍ସଲ୍ୟ ଯୋଜନାରେ ଆର୍ଥିକ ସହାୟତା ତୁରନ୍ତ ଯୋଗାଇ ଦେବାକୁ ବିଭିନ୍ନ ମହଲରେ ଦାବି ହେଉଛି ।
‘BA ପଢି ଘାସ କାଟୁଛ…’ ସାମାନ୍ୟ ଥଟ୍ଟାକୁ ନେଇ ଗୋଷ୍ଠୀ ସଂଘର୍ଷ, ଜଣେ ମୃତ
ନନ୍ଦିଘୋଷ ବ୍ୟୁରୋ ; ବିହାରର କଟିହାର ଜିଲ୍ଲାର ବାଲିଆ ବେଲୋନ୍ ଥାନା ଅଧୀନସ୍ଥ ଆଲହାଣ୍ଡା ଖାଦି ଗାଁରେ, ଏକ ସାମାନ୍ୟ ବିବାଦ ରକ୍ତାକ୍ତ ସଂଘର୍ଷରେ ପରିଣତ ହୋଇଥିଲା । ଯାହା ଫଳରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିଲା ଏବଂ ଅନ୍ୟ ତିନି ଜଣ ଆହତ ହୋଇଥିଲେ। ଏହି ଘଟଣା ପରେ, ସମଗ୍ର ଗାଁରେ ଉତ୍ତେଜନା ପ୍ରକାଶ ପାଇଥିଲା । ସେଠାରେ ପୋଲିସ ଫୋର୍ସ ମୁତୟନ କରାଯାଇଛି। ମୃତକଙ୍କ ପରିବାର ଉତ୍ତେଜନାରେ ଅଛନ୍ତି। ସେମାନେ ଏହି ମାମଲାରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ରିପୋର୍ଟ ଅନୁଯାୟୀ, ଅଲହାଣ୍ଡା ଖାଦି ଗାଁର ୨୧ ବର୍ଷୀୟ ଯୁବକ ମହମ୍ମଦ ମୁସଫିକ୍ ସ୍ନାତକ ହାସଲ କରିବା ପରେ ଚାକିରି ଖୋଜୁଛନ୍ତି ଏବଂ ଘର କାମରେ ମଧ୍ୟ ସାହାଯ୍ୟ କରନ୍ତି। ଘଟଣା ଦିନ ସେ ତାଙ୍କ ପଶୁମାନଙ୍କ ପାଇଁ ତାଙ୍କ କ୍ଷେତରେ ଘାସ କାଟୁଥିଲେ। ସେହି ଗାଁର ମହମ୍ମଦ ରବାନୀ ମଧ୍ୟ ସେହି ବାଟ ଦେଇ ଯାଉଥିଲେ ଏବଂ ତାଙ୍କୁ ତାଚ୍ଛଲ୍ୟ କରି କହିଥିଲେ, “ତୁମେ ବିଏ ପଢି ଘାସ କାଟୁଛ, ଏବଂ ତୁମେ ବିବାହ ମଧ୍ୟ କରିପାରିବନି।” ଏଥିରେ ରାଗିଯାଇ, ଉଭୟଙ୍କ ମଧ୍ୟରେ ପ୍ରଥମେ ଯୁକ୍ତିତର୍କ ହୋଇଥିଲା, ଯାହା ଝଗଡ଼ାରେ ପରିଣତ ହୋଇଥିଲା।
ଝଗଡ଼ା ବିଷୟରେ ଜାଣିବା ପରେ, ମୁସଫିକର ପରିବାର ସଦସ୍ୟମାନେ ଘଟଣାସ୍ଥଳରେ ପହଞ୍ଚି ରବାନୀଙ୍କୁ ମାଡ଼ ମାରିଥିଲେ। ତା’ପରେ ରବାନୀଙ୍କ ପରିବାର ବାଡ଼ି ଏବଂ ରଡ୍ ଧରି ସେଠାରେ ପହଞ୍ଚିଥିଲେ ଏବଂ ଏକ ଭୟଙ୍କର ସଂଘର୍ଷ ଆରମ୍ଭ ହୋଇଥିଲା। ଏହି ସମୟରେ, ମୁସଫିକର ବାପା, ମହମ୍ମଦ ମୁଜାମ୍ମିଲ ଗୁରୁତର ଆହତ ହୋଇ ତଳେ ପଡ଼ିଗଲେ। ପରିବାର ଲୋକ ତାଙ୍କୁ ତୁରନ୍ତ ଡାକ୍ତରଖାନାକୁ ନେଇଗଲେ, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କଲେ। ମୃତକ ବାରସୋଇ ଉପଖଣ୍ଡ କୋର୍ଟରେ ଏକ ଘରୋଇ କ୍ଲର୍କ ଭାବରେ କାର୍ଯ୍ୟ କରୁଥିଲେ।
ଘଟଣା ସମ୍ପର୍କରେ ଉଭୟ ପକ୍ଷ ଭିନ୍ନ ଭିନ୍ନ ଦାବି କରୁଛନ୍ତି। ମୃତକଙ୍କ ପରିବାର ଅଭିଯୋଗ କରିଛନ୍ତି ଯେ ପ୍ରତିପକ୍ଷ ପକ୍ଷ ଦ୍ୱାରା ମୁଣ୍ଡରେ ବାଡ଼ିରେ ଆଘାତ ଲାଗିବା ପରେ ମୁଜାମ୍ମିଲଙ୍କ ମୃତ୍ୟୁ ହୋଇଛି, ଯେତେବେଳେ ବିରୋଧୀ ଦାବି କରୁଛନ୍ତି ଯେ ସେ ପଡ଼ିଯାଇ ଆଘାତ ଯୋଗୁଁ ମୃତ୍ୟୁବରଣ କରିଛନ୍ତି। ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଛି। ପୋଷ୍ଟମର୍ଟମ ପରେ ମୃତଦେହ ପରିବାରକୁ ହସ୍ତାନ୍ତର କରାଯାଇଛି, ଏବଂ ଉଭୟ ପକ୍ଷ ଥାନାରେ ଆବେଦନ କରିଛନ୍ତି। ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ଜଣାପଡିବ ।
ତାମିଲନାଡୁରେ ଅଭିନେତା ବିଜୟଙ୍କ ଦଳ କିପରି ଜିତିଲା?
ନନ୍ଦିଘୋଷ ବ୍ୟୁରୋ : ଦୁଇ ବର୍ଷର ଦଳ ଟିଭିକେ ତାମିଲନାଡୁର ୫୦ ବର୍ଷରୁ ଅଧିକ ପୁରୁଣା ରାଜନୈତିକ ବିଭାଜନକୁ ହଲାଇ ଦେଇଛି। ସୋମବାର ଶେଷ ହୋଇଥିବା ତାମିଲନାଡୁ ବିଧାନସଭା ନିର୍ବାଚନରେ ଅଭିନେତାରୁ ରାଜନେତା ହୋଇଥିବା ବିଜୟ ୧୦୦ ରୁ ଅଧିକ ଆସନରେ ଆଗୁଆ ଅଛନ୍ତି। ଫଳାଫଳ ସୂଚାଇ ଦେଉଛି ଯେ ଫିଲ୍ମ ସୁପରଷ୍ଟାର ବିଜୟ ସଫଳତାର ସହିତ ତାଙ୍କର ସିନେମା ଲୋକପ୍ରିୟତାକୁ ଭୋଟରେ ପରିଣତ କରିଛନ୍ତି। ଫଳସ୍ୱରୂପ, ବିଜୟଙ୍କ ପରଦା ଉପରେ ଲୋକପ୍ରିୟତା ତାମିଲନାଡୁରେ ଏକ ରାଜନୈତିକ ଶକ୍ତି ପାଲଟିଛି।
ତାମିଲନାଡୁର ଲୋକମାନେ ଦ୍ରାବିଡ଼ ମଡେଲ ରାଜନୀତିରେ ବିରକ୍ତ ହୋଇଯାଇଥିଲେ। ବିକଳ୍ପ ଡିଏମକେ ଏବଂ ଏଆଇଏଡିଏମକେ ସରକାର ଅଧୀନରେ, ତାମିଲନାଡୁର ଲୋକମାନେ ପରିବର୍ତ୍ତନ ଚାହୁଁଥିଲେ। ସେମାନେ ବିଜୟଙ୍କଠାରେ ଆଶା ଏବଂ ଏକ ବିକଳ୍ପ ଦେଖିଥିଲେ।
ବିଜୟଙ୍କ ପ୍ରତି ବିଶେଷ ଭାବରେ ରାଜ୍ୟର ଯୁବପିଢ଼ି ଏବଂ ମହିଳା ଭୋଟରଙ୍କ ମଧ୍ୟରେ ତାଙ୍କର ପ୍ରବଳ ଅନୁଗାମୀ ଥିଲେ। ଚଳଚ୍ଚିତ୍ର ପରି, ବାସ୍ତବ ଜୀବନରେ ମଧ୍ୟ, ବିଜୟ ଯୁବକମାନଙ୍କ ନିକଟରେ ଜଣେ ଶାନ୍ତ, କିନ୍ତୁ ପାଣ୍ଡିତ୍ୟପୂର୍ଣ୍ଣ ନାୟକ ଭାବରେ ଦେଖାଯାଇଥିଲେ ଯିଏ ପୁରୁଣା ରାଜନୈତିକ ମାନଦଣ୍ଡର ଛାଞ୍ଚ ଭାଙ୍ଗିଥିଲେ।
ବିଜୟ ନିଜକୁ ଜଣେ ନେତା ଭାବରେ ପ୍ରଦର୍ଶିତ କରିଥିଲେ ଯିଏ ଦ୍ରାବିଡ଼ ପରିଚୟକୁ ସମ୍ମାନ କରୁଥିଲେ କିନ୍ତୁ ଜାତି ଏବଂ ଧର୍ମ ଉପରେ ଆଧାରିତ ଧ୍ରୁବୀକରଣକୁ ବିରୋଧ କରୁଥିଲେ। ସେ ରାଜ୍ୟର ଦଳିତ ଏବଂ ସଂଖ୍ୟାଲଘୁ ଭୋଟରଙ୍କ ଏକ ବଡ଼ ଅଂଶକୁ ମଧ୍ୟ ଆକର୍ଷିତ କରିଥିଲେ।
କିନ୍ତୁ ବିଜୟଙ୍କ ପଥ ସହଜ ନଥିଲା। ଗତ ସେପ୍ଟେମ୍ବରରେ ତାଙ୍କ କରୁର ରାଲିରେ ୪୧ ଜଣଙ୍କ ମୃତ୍ୟୁ ପରଠାରୁ, କ୍ଷମତା ପାଇଁ ତାଙ୍କର ଯାତ୍ରା ଅନେକ ଚ୍ୟାଲେଞ୍ଜର ସମ୍ମୁଖୀନ ହୋଇଛି। ବିଜୟଙ୍କ ପାଖରେ ଅନ୍ୟ ଦଳର କର୍ମୀଙ୍କ ଅଭାବ ଅଛି ଯେଉଁମାନେ ଭୋଟରମାନଙ୍କୁ ଘରୁ ଏକାଠି କରି ଭୋଟ କେନ୍ଦ୍ରକୁ ନେଇପାରିବେ।
ଏଥିପାଇଁ ବିଜୟ ରାଜ୍ୟବ୍ୟାପୀ ବିସ୍ତାରିତ ତାଙ୍କର ପ୍ରଶଂସକ କ୍ଲବ ଉପରେ ନିର୍ଭର କରିଥିଲେ। ପ୍ରକୃତରେ, ବିଜୟ ରାଜନୀତିରେ ପ୍ରବେଶ କରିବା ପୂର୍ବରୁ ତାଙ୍କର ପ୍ରଶଂସକ କ୍ଲବ, ବିଜୟ ମକ୍କଲ ଇୟାକ୍କମ ଗଠନ କରିଥିଲେ। ଏହି ପ୍ରଶଂସକ କ୍ଲବ ନିର୍ବାଚନ ସମୟରେ ବୁଥ୍ ସ୍ତରରେ କାମ କରିଥିଲା, ତାଙ୍କର ସିନେମାଟିକ୍ କରିସ୍ମାକୁ ଭୋଟରେ ପରିଣତ କରିଥିଲା। ବର୍ତ୍ତମାନର ଡିଏମକେ ସରକାର ବିରୁଦ୍ଧରେ ଶାସନ ବିରୋଧୀ ଲହର ମଧ୍ୟ ବିଜୟଙ୍କୁ ତାମିଲନାଡୁରେ କ୍ଷମତାକୁ ଆଣିବାରେ ସାହାଯ୍ୟ କରିଥିଲା। ଡିଏମକେର ପରିବାରବାଦ, ଡିଏମକେ ନେତାଙ୍କ ବିରୁଦ୍ଧରେ ଦୁର୍ନୀତି ଅଭିଯୋଗ ଏବଂ ଆଇନ ଶୃଙ୍ଖଳା ସମସ୍ୟାକୁ ନେଇ ତାମିଲନାଡୁର ଲୋକମାନେ ଷ୍ଟାଲିନ ସରକାରଙ୍କ ଉପରେ ବିରକ୍ତ ଥିଲେ।
ଯୁବପିଢ଼ି ମୁଖ୍ୟମନ୍ତ୍ରୀ ଷ୍ଟାଲିନଙ୍କ ଉତ୍ତରାଧିକାରୀ ଭାବରେ ଉଦୟନିଧି ଷ୍ଟାଲିନଙ୍କ ଉତ୍ଥାନକୁ ପରିବାରବାଦର ଏକ ଲକ୍ଷଣ ଭାବରେ ଦେଖିଥିଲେ। ତେଣୁ, ସେମାନେ ଅଭିନେତା ବିଜୟଙ୍କ ପଛରେ ସମ୍ପୂର୍ଣ୍ଣ ଭାବରେ ଏକତ୍ରିତ ହେଲେ।
ଏହି ସମୟରେ, ନେତୃତ୍ୱ ସଂଘର୍ଷ ଯୋଗୁଁ AIADMK ମଧ୍ୟ ଭାଙ୍ଗିବାକୁ ଲାଗିଲା। EPS ଏବଂ OPS ମଧ୍ୟରେ ଗୋଷ୍ଠୀବାଦ, ପୁରୁଣା ନେତାମାନଙ୍କୁ ପରିତ୍ୟାଗ କରିବା ସହିତ, ଜନସାଧାରଣ ଏବଂ AIADMK କର୍ମୀଙ୍କ ମଧ୍ୟରେ ବିଶ୍ୱାସର ସଙ୍କଟ ସୃଷ୍ଟି କଲା। ଫଳସ୍ୱରୂପ, DMKରେ ଯୋଗ ଦେଇପାରି ନଥିବା ବିଶ୍ୱସ୍ତ AIADMK ଭୋଟରମାନେ ଅଭିନେତା ବିଜୟଙ୍କ ଦଳରେ ଏକ ନୂତନ ସ୍ଥାନ ପାଇଲେ।
ବିଜୟଙ୍କ ଶିକ୍ଷା ଏବଂ ସ୍ୱାସ୍ଥ୍ୟ ସମ୍ପର୍କିତ ପ୍ରତିଶ୍ରୁତି ଶିକ୍ଷିତ ମଧ୍ୟବିତ୍ତ ବର୍ଗଙ୍କୁ ଆଶା ସଞ୍ଚାର କରିଥିଲା, ଯେଉଁମାନେ ଡିଏମକେ ଏବଂ ଏଆଇଏଡିଏମକେର ମାଗଣା ପ୍ରତିଶ୍ରୁତିର ସଂସ୍କୃତିରେ ବିରକ୍ତ ହୋଇଯାଇଥିଲେ।ବିଜୟ ନିର୍ବାଚନ ସମୟରେ କୌଣସି ସାକ୍ଷାତକାର ଦେଇ ନଥିଲେ, ଅନାବଶ୍ୟକ ବିବାଦ ଏବଂ ଅଭିଯୋଗକୁ ଏଡାଇ ଦେଇଥିଲେ। ବିଜୟଙ୍କ ଦଳର ସୋସିଆଲ ମିଡିଆ ଏବଂ ଡିଜିଟାଲ୍ ପ୍ରଚାର ପଦ୍ଧତି, ଯେଉଁଥିରେ ଛୋଟ ଗୀତ ଏବଂ ଭିଡିଓ ବାର୍ତ୍ତା ସାମିଲ ଥିଲା, ତାହା ମଧ୍ୟ ସହରାଞ୍ଚଳ ଏବଂ ଗ୍ରାମାଞ୍ଚଳ ଉଭୟ ଭୋଟରଙ୍କ ମନରେ ପ୍ରତିଧ୍ୱନିତ ହୋଇଥିଲା।
ମାତିଛନ୍ତି ସାଇବର ସଇତାନ, ଗୋଟିଏ କ୍ଲିକରେ ଆକାଉଣ୍ଟ କରିଦେଉଛନ୍ତି ଖାଲି
ଜଗତସିଂହପୁର : ମାତିଛନ୍ତି ସାଇବର ସଇତାନ । ଗୋଟିଏ କ୍ଲିକରେ ଆକାଉଣ୍ଟ କରିଦେଉଛନ୍ତି ଖାଲି । ଅଦୃଶ୍ୟ ଠକଙ୍କୁ ଧରିବା ପୋଲିସ ପାଇଁ ହୋଇଛି ଚ୍ୟାଲେଞ୍ଜ । ଏଭଳି ଏକ ସାଇବର ଠକାମୀର ଶିକାର ହୋଇଛନ୍ତି ଜଗତସିଂହପୁର ଜିଲ୍ଲାର ଗଣେଶ୍ଵର ପରିଡା l ବୃନ୍ଦାବନ ବୁଲିବାକୁ ଯାଇଥିବା ବେଳେ ତାଙ୍କ ଆକାଉଣ୍ଟରୁ ୧ ଲକ୍ଷ ଟଙ୍କା କଟିଥିଲା। ୨୫ ହଜାର ଟଙ୍କା ଲେଖାଏ ଚାରି ଥର ୧ ଲକ୍ଷ ଟଙ୍କା କିଛି ସମୟ ଭିତରେ ଆକଉଣ୍ଟରୁ କଟିଥିବା ମୋବାଇଲରୁ ସେ ଜାଣିବାକୁ ପାଇଥିଲେ । ନିକଟସ୍ଥ ଥାନାରେ ଜଣାଇଥିବାବେଳେ ନିଜ ଅଞ୍ଚଳ ଥାନାରେ ଅଭିଯୋଗ କରିବାକୁ ସେ କହିଥିଲେ। ବୃନ୍ଦାବନରୁ ଫେରି ପାରାଦୀପ ଥାନାରେ ପହଞ୍ଚି ଥିଲେ ଗଣେଶ୍ଵର l ପାରାଦୀପ ଥାନା ପକ୍ଷରୁ ଜଗତସିଂହପୁର ସାଇବର ଥାନାକୁ ଯିବାକୁ କୁହାଯାଇଥିଲା l ସାଇବର ଥାନା ପକ୍ଷରୁ ଦୁଇ ଲକ୍ଷ ଟଙ୍କାରୁ ଉର୍ଦ୍ଧ ଟଙ୍କାର ଠକେଇ ଉପରେ ଅଭିଯୋଗ ପତ୍ର ରଖାଯାଉଥିବା ଶୁଣି ଶେଷରେ ନିରାଶ ହୋଇ ଅନଲାଇନ ଜରିଆରେ ଅଭିଯୋଗ କରିଛନ୍ତି ।
ଜଗତସିଂହପୁର ଠାରେ ନୂତନ ସାଇବର ଏବଂ ଅର୍ଥନୈତିକ ଅପରାଧ ଥାନାରେ ଅନେକ ଅଭିଯୋଗ ପତ୍ର ଦାଖଲ ହୋଇଥିଲେ ସୁଦ୍ଧା ମାମଲାର ଅଗ୍ରଗତି ହେଉନଥିବା ଅଭିଯୋଗ ହୋଇଛି l ଦିନକୁଦିନ ସାଇବର ଅପରାଧ ମାମଲା ବଢି ଚାଲିଥିବାବେଳେ ଦକ୍ଷ ଅଧିକାରୀ ନିଯୁକ୍ତି କରିବାକୁ ଦାବି ହୋଇଛି। କେତେବେଳେ ଡିଜିଟାଲ ଆରେଷ୍ଟ ତ କେତେବେଳେ ଲୋନ ଠକେଇ ଓ ସୋସିଆଲ ମିଡିଆରେ ଠକେଇ ର ମାତ୍ରା ବଢ଼ିବାରେ ଲାଗିଛି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି ଜଗତସିଂହପୁର ଜିଲ୍ଲାବାସୀ।
କାଳ ସାଜିଲା କାଣ୍ଡବିନ୍ଧା ପୋକ, ଉଜାଡିଦେଲା ସୁନାର ଫସଲ
କାଳ ସାଜିଲା କାଣ୍ଡବିନ୍ଧା ପୋକ। ଉଜାଡିଦେଲା ସୁନାର ଫସଲ । ଚାଷୀ ମୁହଁରୁ ଛଡ଼ାଇ ନେଇଛି ବର୍ଷକର ଆହାର। ପୁରୀ ଜିଲ୍ଲା କଣାସ ବ୍ଲକର ବିଭିନ୍ନ ଅଞ୍ଚଳରେ ନଷ୍ଟ ହୋଇଛି ବ୍ୟାପକ ଧାନ ଫସଲ । କେତେବେଳେ କାଳବୈଶାଖୀ ତ ପୁଣି କେତେବେଳେ କାଣ୍ଡବିନ୍ଧା ପୋକ ଚାଷୀଙ୍କ ଚିନ୍ତା ବଢ଼ାଇଛି। ଶହ ଶହ ଏକର ଧାନ ଫସଲ ସମ୍ପୂର୍ଣ୍ଣ ଆଗାଡ଼ିରେ ପରିଣତ ହୋଇଛି। ଧାନ ବଦଳରେ ଏବେ ଅଗାଡ଼ି ଅମଳ କରିବ ଚାଷୀ । ଅଧିକ ପ୍ରଭାବିତ ହୋଇଛି କେନାଲ ଜଳ ସେଚିତ ଜମି । କଣାସ ବ୍ଲକର ନୂଆପଡ଼ା ରୁ ନୂଆଗାଁ ପର୍ଯ୍ୟନ୍ତ ଧାନ ଫସଲ କାଣ୍ଡ ବିନ୍ଧା ପୋକ ଆଁରେ ପଶି ଯାଇଛି । କୀଟନାଶକ ସିଞ୍ଚନ କଲେ ମଧ୍ୟ କିଛି ଲାଭ ମିଳୁନି।
କାଳବୈଶାଖୀ ଯୋଗୁ ଧାନ ଝଡିଥିଲା। କିଛି ପବନ ମାଡ଼ରେ ଅଗାଡି ହୋଇଥିଲା। ପାଣି ରହିଥିବା ଜମିରେ ଶୋଇ ରହିଥିବା ଧାନ ଗଛ ଜଉ ପୋକ ଯୋଗୁ ନଷ୍ଟ ହୋଇଥିଲା। ଏବେ ପୁଣି କାଣ୍ଡବିନ୍ଧା ପୋକର ଦାଉ ଚାଷୀର ଜୀବିକା ଉପରେ ପ୍ରଭାବ ପକାଇଛି। ଅଭିଯୋଗ ପରେ କୃଷି ଅଧିକାରୀମାନେ ପ୍ରଭାବିତ ଅଞ୍ଚଳ ବୁଲି ଦେଖିବା ସହ ଚାଷୀମାନଙ୍କ ସହ ଆଲୋଚନା କରିଛନ୍ତି। ସରକାରଙ୍କ ଦୃଷ୍ଟି ଆକର୍ଷଣ ପରେ ତଦନ୍ତ କାରଯାଇ ପଦକ୍ଷେପ ନିଆଯିବ ବୋଲି କହିଛନ୍ତି। କ୍ଷୟକ୍ଷତିର ସମ୍ମୁଖୀନ ହୋଇଥିବା ଚାଷୀଙ୍କୁ ସରକାର ଶୀଘ୍ର ସହାୟତା ଯୋଗାଇ ଦେବା ଜରୁରୀ ହୋଇପଡିଛି ।