ନନ୍ଦିଘୋଷ ବ୍ୟୁରୋ: ରାଜ୍ୟରେ ଅନୁଭୂତ ହେଲାଣି ଶୀତ । ଦିନକୁ ଦିନ ଖସିବାରେ ଲାଗିଛି ପାରଦ । ଅଧିକାଂଶ ସ୍ଥାନରେ ରାତିର ତାପମାତ୍ରା ୨୦ ଡିଗ୍ରୀ ସେଲସିୟସ୍ ତଳକୁ ଖସି ଆସିଛି। ଉତ୍ତର ଓ ଉତ୍ତର-ପଶ୍ଚିମ ଦିଗରୁ ରାଜ୍ୟକୁ ଥଣ୍ଡା ଓ ଶୁଷ୍କ ବାୟୁ ପ୍ରବାହିତ ହେଉଥିବାରୁ ଶୀତ ଅନୁଭୂତ ହେଉଛି। ରାଜ୍ୟର ପ୍ରାୟ ୬ଟି ସ୍ଥାନରେ ସୋମବାର ରାତି ତାପମାତ୍ରା ୧୫ ଡିଗ୍ରୀ ସେଲସିୟସ୍ ଭିତରେ ରହିଥିଲା।
କୋରାପୁଟ ଜିଲ୍ଲା ସିମିଳିଗୁଡ଼ାରେ ଚଳିତ ବର୍ଷ ରାଜ୍ୟର ସର୍ବନିମ୍ନ ତାପମାତ୍ରା ୧୧.୬ ଡିଗ୍ରୀ ରେର୍କଡ଼ ହୋଇଛି । ଏହା ତଳକୁ ଘୁ. ଉଦୟଗିରି ୧୨.୪, ଦାରିଙ୍ଗବାଡ଼ି ୧୪, ଝାରସୁଗୁଡ଼ା ଓ ଫୁଲବାଣୀରେ ୧୪.୫ ଡିଗ୍ରୀ, ଭବାନୀପାଟଣାରେ ୧୪.୬, ନବରଙ୍ଗପୁରରେ ୧୫, ରାଉରକେଲାରେ ୧୫.୬ ଡିଗ୍ରୀ, ରାଉରକେଲାରେ ୧୫.୭, ହୀରାକୁଦରେ ୧୬, ସମ୍ବଲପୁରରେ ୧୬.୨, ସୁନ୍ଦରଗଡ଼ର କିରେଇରେ ୧୬.୨, କେନ୍ଦୁଝରରେ ୧୬.୬, ରାୟଗଡ଼ା ୧୬.୬, ଚିପିଲିମା ୧୬.୮ ଡିଗ୍ରୀ ରହିଥିଲା। ଅନ୍ୟ ଜିଲ୍ଲାରେ ପାରଦ ସ୍ବାଭାବିକ ସ୍ତରରେ ରହିଥିଲେ ମଧ୍ୟ ରାଜଧୀନୀ ଭୁବନେଶ୍ବର, କଟକ ଓ ଝାରସୁଗୁଡ଼ାରେ ସ୍ବାଭାବିକଠାରୁ ୨ରୁ ୩ ଡିଗ୍ରୀ ପର୍ଯ୍ୟନ୍ତ କମ୍ ରହିଛି। ଭୁବନେଶ୍ବରରେ ୧୮.୫ ଡିଗ୍ରୀ ଓ କଟକରେ ୧୭.୪ ଡିଗ୍ରୀ ରେର୍କଡ଼ ହୋଇଛି । ତେବେ ଝାରସୁଗୁଡ଼ାରେ ସର୍ବନିମ୍ନ ତାପମାତ୍ରା ସ୍ବାଭାବିକଠାରୁ ପ୍ରାୟ ସାଢ଼େ ୩ ଡିଗ୍ରୀ କମ୍ ଥିଲା । ଆସନ୍ତା ୨୪ ଘଣ୍ଟା ମଧ୍ୟରେ ବୌଦ୍ଧ, କନ୍ଧମାଳ, ଅନୁଗୋଳ, କୋରାପୁଟ, ନୟାଗଡ଼, ଢେଙ୍ଗାନାଳ, ସୁବର୍ଣ୍ଣପୁର, କଟକ ଓ ସୁନ୍ଦରଗଡ଼ ଜିଲ୍ଲାର କେତେକ ସ୍ଥାନରେ ମଧ୍ୟମ ଧରଣର କୁହିଡ଼ି ହୋଇପାରେ ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି ।
ସୂଚନା ଥାଉ କି, ଆଗାମୀ ୭ ଦିନ ପର୍ଯ୍ୟନ୍ତ ସର୍ବନିମ୍ନ ତାପମାତ୍ରାରେ କୌଣସି ପରିବର୍ତ୍ତନ ହେବନାହିଁ । କୌଣସି ସ୍ଥାନରେ ବର୍ଷା ନେଇ ମଧ୍ୟ ଆଶଙ୍କା କମ୍ ରହିଛି । ତେବେ ଆସନ୍ତା ୧୩ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ଏକ ଲଘଚାପ କ୍ଷେତ୍ର ସୃଷ୍ଟି ହେବା ନେଇ ସମ୍ଭବନା ରହିଛି । ଏହା ଉତ୍ତର ପଶ୍ଚିମ ଦିଗକୁ କରି ଆଗାମୀ ୨୪ ଘଣ୍ଟାରେ ଲଘୁଚାପ କ୍ଷେତ୍ରରେ ପରିଣତ ହେବ । ତେବେ ଏହା କେତେ ଘନୀଭୂତ ହେବ ଓ କେଉଁଠି ସ୍ଥଳ ଭାଗ ଛୁଇଁବ ସେନେଇ ପାଣିପାଗ ବିଭାଗ ପକ୍ଷରୁ ସୂଚନା ମିଳିନାହିଁ ।
