ଗାଈ ପାଇଁ ଜିଲ୍ଲାପାଳଙ୍କ ଗାଡ଼ି ଆଗରେ ଶୋଇ ପଡ଼ିଲେ ବୃଦ୍ଧା

ସୋନପୁର: ଗାଈ ପାଇଁ ଗୁହାରୀ । ଜିଲ୍ଲାପାଳଙ୍କ ଗାଡ଼ି ଆଗରେ ଅଳି । ପରିଣତ ବୟସରେ ବୃଦ୍ଧା ପାତିଲେ ପଣତକାନି । କାନ୍ଦି କାନ୍ଦି ନେହୁରା ହୋଇ କହୁଛନ୍ତି, ମୋ ପ୍ରିୟ ଗାଈକୁ ମୋତେ ଫେରାଇ ଦିଅ । ଘର ନାହିଁ, ମାନସିକ ସ୍ଥିତି ଭଲ ନାହିଁ । କିନ୍ତୁ ଏକ ଗାଈ ସହ ଯୋଡ଼ି ହୋଇଥିଲା ଭାବନା । ଗାଈକୁ କାଞ୍ଜିଆହୁଦାକୁ ନିଆଯିବାରୁ ଫେରାଇ ଆଣିବାକୁ ଗୁହାରୀ କରିଛନ୍ତି ବୃଦ୍ଧା । ଗୁହାରୀ କେହି ନଶୁଣିବାରୁ ଶେଷରେ ଗାଈ ଫେରାଇବା ପାଇଁ ଜିଲ୍ଲାପାଳଙ୍କ ଗାଡ଼ି ଆଗରେ ବୃଦ୍ଧା ଶୋଇ ପଡ଼ିଥିଲେ । ଶେଷରେ ଜିଲ୍ଲାପାଳ ବୃଦ୍ଧାଙ୍କୁ ତାଙ୍କ ପ୍ରିୟ ଗାଈ ଫେରାଇ ଦେବାକୁ ପ୍ରତିଶ୍ରୁତି ଦେଇଛନ୍ତି । ସୂଚନା ଅନୁସାରେ ୨୦ ବର୍ଷ ହେଲା ସୁବର୍ଣ୍ଣପୁର ମେଡିକାଲ ବାରଣ୍ଡାରେ ରହୁଛନ୍ତି ତରାସ ବାଘ ।

ସେ ଏକ ବୁଲାଗାଈକୁ ନିଜର କରିଥିଲେ । ଭିକ ମାଗି ଯାହା ଖାଆନ୍ତି, ଗାଈଟିକୁ ମଧ୍ୟ ଦିଅନ୍ତି । ଗୋଟିଏ ପତ୍ରରେ ମଧ୍ୟ ଗାଈ ସହ ଖାଉଥିଲେ । ହେଲେ ବୁଲାଗାଈଟିକୁ କାଞ୍ଜିଆ ହାଉସକୁ ନିଆଯିବା ପରେ ଆକୁଳ ନିବେଦନ କରିଛନ୍ତି ବୃଦ୍ଧା । ଜିଲ୍ଲାପାଳଙ୍କ ଗାଡ଼ି ଆଗରେ ପଡ଼ିଯାଇ ନିଜ ଜୀବନଠୁ ପ୍ରିୟ ଗାଈକୁ ଫେରାଇବାକୁ ଅଳି କରିଥିଲେ । ଗାଈ ଫେରିବା ପ୍ରତିଶ୍ରୁତି ପାଇବା ପରେ ବୃଦ୍ଧାଙ୍କ ମନ ବୁଝିଛି ।