ଭାଇଗିରି ଦେଖାଇବାକୁ ରାଜଧାନୀରେ ଆତଙ୍କ ମଚାଇଲେ, ବୋମା ଫିଙ୍ଗିଲେ

ଭୁବନେଶ୍ବର: ଭୁବନେଶ୍ବରରେ ସହିଦନଗର ୱିନର୍ସ ଆସୋସିଏସନ ନିକଟରେ ବୋମାମାଡ଼ ଘଟଣା । କାହ୍ନା ଓରଫ ବିଶ୍ୱରଞ୍ଜନ ବିଶ୍ଵାଳ ସମେତ ଦୁଇ ଜଣକୁ ଅଟକ ରଖିଛି ପୋଲିସ । ଅନ୍ୟ ସହଯୋଗୀଙ୍କୁ ପୋଲିସ ଚିହ୍ନଟ କରିବା ସହିତ ସେମାନଙ୍କୁ ଧରିବା ପାଇଁ ତନାଘନା ଜାରି ରଖିଛି । ଗତକାଲି ରାତିରେ ଖଣ୍ଡା ଦେଖାଇ ଆତଙ୍କ ସୃଷ୍ଟି କରିବା ସହ ବୋମାମାଡ଼ କରିଥିଲେ ଦୁର୍ବୃତ୍ତ । ଏଥିରେ ଗୋଟିଏ କାର ଓ ଗୋଟିଏ ବାଇକ ନଷ୍ଟ ହୋଇଛି ।

ଭାଇଗିରି ପାଇଁ ବିଳମ୍ବିତ ରାତିରେ ରାଜଧାନୀରେ ଆତଙ୍କ ସୃଷ୍ଟି କରାଯିବା ସହ ଘନଘନ ବୋମା ମାଡ ହୋଇଥିଲା । ଖଣ୍ଡା, ଲାଠି ମାଡରେ ଭାଙ୍ଗିଥିଲେ ଗାଡି । ଯାହାକୁ ପାଇଲେ ଗୋଡାଇ ଗୋଡାଇ ପିଟିଲେ ଦୁର୍ବୃତ୍ତ । ୧୫ ମିନିଟରୁ ଅଧିକ ସମୟ ରଚିଲେ ତାଣ୍ଡବ । ସହିଦନଗର ଭିଆଇପି ଅଞ୍ଚଳରେ ପୋଲିସକୁ ଏମିତି ଚ୍ୟାଲେଞ୍ଜ ଦେଇଥିଲେ ୨୫ରୁ ଊର୍ଦ୍ଧ୍ବ ଯୁବକ ।

ସିସିଟିଭରେ ଦୁର୍ବୃତ୍ତଙ୍କ ପୂରା କାଣ୍ଡ ରେକର୍ଡ ହୋଇଛି । ଏବେ ପୋଲିସର ପାଳି । ଫୁଲ ଆକ୍ସନରେ କମିଶନରେଟ ପୋଲିସ । ମୁଖ୍ୟ ଅଭିଯୁକ୍ତ କାହ୍ନା ସହ ଦୁଇ ଜଣ ଅଟକ । ପୂର୍ବ ଶତ୍ରୁତା ଏବଂ ଭାଇଗିରି ପାଇଁ ଶୁକ୍ରବାର ରାତିରେ ସହିଦନଗର ଓ୍ବିନର ଆସୋସିଏସନରେ ବୋମାମାଡ ସହ ସଂଘବଦ୍ଧ ଆକ୍ରମଣ ହୋଇଥିଲା । ଭୟରେ ଓ୍ବିନର ଆସୋସିଏସନରେ ଥିବା ପିଲାମାନେ ନିଜକୁ ବଞ୍ଚାଇବା ପାଇଁ ଯିଏ ଯୁଆଡେ ଦୌଡିଥିଲେ । ଦୁର୍ବୃତ୍ତଙ୍କ ଆକ୍ରମଣରେ ଗୋଟିଏ କାର ଓ ଏକାଧିକ ବାଇକ ଭାଙ୍ଗି ଚୁରମାର ହୋଇଛି ।

ଘଟଣାରେ ଦୁଇ ଜଣଙ୍କୁ ଅଟକ ରଖି ପଚରାଉଚରା କରୁଛି ସହିଦନଗର ଥାନା ପୋଲିସ । ଅନ୍ଯ ଅଭିଯୁକ୍ତଙ୍କୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢାଉ ଜାରି ରହିଛି । ପୋଲିସ ସାଇଣ୍ଟିଫିକ୍ ଟିମ ସହ ଘଟଣା ସ୍ଥଳରେ ପହଞ୍ଚି ବୋମା ଓ ଗାଡି ଭଙ୍ଗାକାଚରୁ ପ୍ରମାଣ ସଂଗ୍ରହ କରିଛି । ପୂର୍ବରୁ ଉଭୟ ଗୋଷ୍ଠୀ ମଧ୍ୟରେ ସାଧାରଣ କଥାକୁ ନେଇ ଶତ୍ରୁତା ସୃଷ୍ଟି ହୋଇଥିବା ପୋଲିସ ତଦନ୍ତ ସମୟରେ ଜାଣିବାକୁ ପାଇଛି ।

ପୂର୍ବରୁ ଭୁବେନଶ୍ବରରେ ଭାଇଗିରି ପାଇଁ ଏମିତି ଅନେକ ଥର ଆତଙ୍କ ରଚିଛନ୍ତି ଦୁର୍ବୃତ୍ତ । କିନ୍ତୁ ପୋଲିସର ଆଖିଦୃଶିଆ କାର୍ଯ୍ୟାନୁଷ୍ଠାନ ନ ହେବାରୁ ଏବେ ପୁଣି ଚ୍ୟାଲେଞ୍ଜ ଦେଇଛନ୍ତି ଅପରାଧୀ ।