ବରକନ୍ୟାକୁ ନେଇ ଫେରୁଥିବା ବୋଲେରୋକୁ ପିଟିଲା ଟ୍ରକ୍

କଳାହାଣ୍ଡି: ବିବାହ ସରିଲା । ହସଖୁସିରେ ଫେରୁଥିଲେ ବରକନ୍ୟା । ହେଲେ ସେମାନଙ୍କୁ ଜଣା ନଥିଲା ବାଟରେ ଟ୍ରକ ରୂପରେ ଅନାଇ ବସିଛି ମୃତ୍ୟଦୂତ । ରାସ୍ତାରେ ଘଟିଲା ମର୍ମନ୍ତୁଦ ଦୁର୍ଘଟଣା । ବରକନ୍ୟା ଫେରୁଥିବା ବୋଲେରୋକୁ ଧକ୍କା ଦେଳା କାଳରୂପୀ ଟ୍ରକ୍ । ଘଟଣାସ୍ଥଳରେ ଚାଲିଗଲା ବୋଲେରୋ ଡ୍ରାଇଭରଙ୍କ ଜୀବନ । ଗୁରୁତର ଅବସ୍ଥାରେ ବରକନ୍ୟାଙ୍କ ସମେତ ୬ ଜଣ ମେଡିକାଲରେ ହୋଇଛନ୍ତି ଭର୍ତ୍ତି ।

ଏ ଅଭାବନୀୟ ଘଟଣା ଘଟିଛି କଳାହାଣ୍ଡି ଆମପାଣି ଭୁର୍ଷାଗୁଡା ନିକଟରେ । ବିଳମ୍ବିତ ରାତିରେ ବାହାଘର ସାରି ଫେରୁଥିବା ବୋଲେରୋକୁ ସମ୍ମୁଖରୁ ଧକ୍କା ଦେଲା ଟ୍ରକ୍ । ଦୁର୍ଘଟଣା ଏତେ ଭୟଙ୍କର ଥିଲା ଯେ ବୋଲେରୋର ସମ୍ମୁଖ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ସେହିପରି ଧକ୍କା ଦେବା ପରେ ରାସ୍ତା ଉପରେ ଟ୍ରକଟି ଓଲଟି ପଡ଼ିଛି । ଗୁରୁତରଙ୍କୁ ଧର୍ମଗଡ଼ ହସ୍ପିଟାଲରେ ଭର୍ତ୍ତି କରାଯାଇଛି । ମୃତ ଡ୍ରାଇଭର ହେଲ ଛତିଶଗଡ଼ ଉର୍ମାଲ ଗାଁର ରୁକ୍ମଣ ସାହୁ । ଆମ୍ବପାଣି ପୋଲିସ ଏକ ଦୁର୍ଘଟଣା ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।