ଫିଫା ବିଶ୍ବକପ୍ ଫାଇନାଲ: ଆର୍ଜେଣ୍ଟିନା-ଫ୍ରାନ୍ସ ମୁକାବିଲା

ନୂଆଦିଲ୍ଲୀ: ଆଜି ବିଶ୍ବର ସବୁଠାରୁ ହାଇପ୍ରୋଫାଇଲ୍ ଓ ଲୋକପ୍ରିୟ କ୍ରୀଡ଼ା ଫିଫା ଫୁଟବଲ ବିଶ୍ବକପ୍ ଫାଇନାଲ । ମୁହାଁମୁହିଁ ହେବ ଆର୍ଗେଣ୍ଟିନା ଓ ଡିଫେଣ୍ଡିଂ ଚାମ୍ପିୟନ ଫ୍ରାନ୍ସ । ଯାହା ଉପରେ ରହିଛି ସାରା ବିଶ୍ବର ନଜର ।

ତେବେ ବିଶ୍ବକପ୍ ଫାଇନାଲର ମୁଖ୍ୟ ଆକର୍ଷଣ ଆର୍ଗେଣ୍ଟିନା ସୁପରଷ୍ଟାର ଲିଓନେଲ ମେସିଙ୍କ ଉପରେ ରହିଛି ସମସ୍ତଙ୍କ ନଜର । ଏଥର ମେସି ୟୁରୋପର ପ୍ରଭାବକୁ କ୍ଷୂର୍ଣ୍ଣ କରିବାରେ ସଫଳ ହେବେ କି ନାହିଁ ତା ଫୁଟପଲ୍ ପ୍ରେମୀଙ୍କ ମନକୁ ଆନ୍ଦୋଳିତ କରୁଛି । ଏପର୍ଯ୍ୟନ୍ତ ମୋଟ ଖେଳାଯାଇଥିବା ୨୧ଟି ବିଶ୍ବକପରୁ ୧୨ଥର ୟୁରୋପୀୟ ଦେଶ ଚାମ୍ପିୟନ ହୋଇଛନ୍ତି । ସେହିପରି ଲାଟୀନ ଆମେରିକୀୟ ଦେଶଗୁଡ଼ିକ ୯ଥର ଟାଇଟଲ ହାସଲ କରିଛନ୍ତି ।

ଡିଫେଣ୍ଡିଂ ଚାମ୍ପିୟନ ଫ୍ରାନ୍ସ ୨ଥର ଚାମ୍ପିୟନ ହୋଇଥିବା ବେଳେ ବିଶ୍ବକପରେ ବ୍ରାଜିଲ ସର୍ବାଧିକ ୫ ଥର ଟାଇଟଲ ହାସଲ କରିଛି । ସେହିପରି ଆର୍ଜେଣ୍ଟିନା ଓ ଉରୁଗୁଏ ୨ ଥର ଲେଖାଏଁ ଚାମ୍ପିୟନ ହୋଇଛନ୍ତି ।

ଅନ୍ୟପକ୍ଷରେ ୨୦୧୮ର ପ୍ରତିଶୋଧ ନେବାକୁ ଉଦ୍ୟମ କରିବ ଆର୍ଜେଣ୍ଟିନା । ୨୦୧୮ ବିଶ୍ବକପରେ ଦୁଇ ଦଳ ଶେଷଥର ପାଇଁ ରାଉଣ୍ଡ ଅଫ୍ ୧୬ରେ ମୁହାଁମୁହିଁ ହୋଇଥିଲେ । ଏଥିରେ ଫ୍ରାନ୍ସ ୪-୩ ଗୋଲରେ ବିଜୟୀ ହୋଇଥିଲା । ଏବେ ଆର୍ଜେଣ୍ଟିନା ଏହି ପରାଜୟର ପ୍ରତିଶୋଧ ନେବାକୁ ପ୍ରୟାସ କରିବ ।