ଦୁବାଇରେ ମୁଖ୍ୟମନ୍ତ୍ରୀ, ୨୯ରେ ମଧ୍ୟପ୍ରାଚ୍ୟର ପୁଞ୍ଜିପତିଙ୍କ ସହ କଥା ହେବେ ନବୀନ

ଦୁବାଇ: ଦୁବାଇରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୁବାଇ ମେକ୍ ଇନ୍ ଓଡ଼ିଶା କନକ୍ଲେଭ ପାଇଁ ଆରମ୍ଭ ହୋଇଛି କାଉଣ୍ଟଡାଉନ୍ । ୨୯ ତାରିଖରେ ମଧ୍ୟପ୍ରାଚ୍ୟର ପୁଞ୍ଜିପତିଙ୍କ ସହ ସିଧାସଳଖ କଥାହେବେ ମୁଖ୍ୟମନ୍ତ୍ରୀ । ଦୁବାଇରେ ଖାଦ୍ୟ ପ୍ରକ୍ରିୟାକରଣ, ପର୍ଯ୍ୟଟନ ସହିତ ପେଟ୍ରୋ କେମିକାଲ, ପେଟ୍ରୋଲିୟମ ସେକ୍ଟର ଏବଂ ଡାଉନଷ୍ଟ୍ରିମ ଇଣ୍ଟଷ୍ଟ୍ରୀ ଉପରେ ଫୋକସ ରହିବ। ଦୁବାଇର ହୋଟେଲ ଓବେରାଇରେ ହେବାକୁ ଥିବା ପୁଞ୍ଜିପତି ସମ୍ମିଳନୀରେ ମୁଖ୍ୟମନ୍ତ୍ରୀଙ୍କ ସହ ମୁଖ୍ୟ ଶାସନ ସଚିବ, ଶିଳ୍ପ ସଚିବ, ଖାଦ୍ୟ ଯୋଗାଣ ସଚିବ, ଆବାସିକ କମିଶନର ଏବଂ 5-T ସଚିବ ଯୋଗ ଦେବେ ।

ରାଜ୍ୟରେ ସଫଳତାର ସହ ପୁଞ୍ଜିନିବେଶ କରିଥିବା ଶିଳ୍ପପତିଙ୍କ ଏକ ପ୍ରତିନିଧି ଦଳ ମଧ୍ୟ କନକ୍ଲେଭରେ ଯୋଗଦେବେ । ଓଡ଼ିଶାରେ ଶିଳ୍ପ ପାଇଁ ଥିବା ଅପାର ସୁଯୋଗ, ସମ୍ଭାବନା ସହିତ ରାଜ୍ୟ ସରକାରଙ୍କ ପ୍ରୋତ୍ସାହନ ନେଇ ମୁଖ୍ୟମନ୍ତ୍ରୀ ଓ ଟିମ୍ ଓଡ଼ିଶା ମିଡଲ-ଇଷ୍ଟର ଇନଭେଷ୍ଟରଙ୍କ ସହ ଆଲୋଚନା କରିବେ । ଶିଳ୍ପାୟନ କ୍ଷେତ୍ରରେ ଓଡ଼ିଶାରେ ହୋଇଛି ଦ୍ରୁତ ଅଭିବୃଦ୍ଧି । ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟି, ସ୍ଥିର ସରକାର, ଦୃଢ ଇଚ୍ଛାଶକ୍ତି ଯୋଗୁଁ ଓଡ଼ିଶାକୁ ମୁହାଁଇଛନ୍ତି ଜାତୀୟ ଓ ଅନ୍ତର୍ଜାତୀୟସ୍ତରର ବଡ଼ ବଡ଼ କର୍ପୋରେଟ କମ୍ପାନୀ । ଓମାନ, ଦୋହା, ଦୁବାଇ ଭଳି ଗଲ୍ଫ ଦେଶର ଶିଳ୍ପପତି ଓଡ଼ିଶାରେ ପୁଞ୍ଜିନିବେଶ କରିବାକୁ ଚାହୁଁଛନ୍ତି । ମୁଖ୍ୟମନ୍ତ୍ରୀ ଓ ଟିମ୍ ଓଡ଼ିଶାର ଦୁବାଇ ଗସ୍ତ ରାଜ୍ୟକୁ ଅଧିକ ପୁଞ୍ଜି ଆଣିବାରେ ସକ୍ଷମ ହେବ ବୋଲି ବିଶେଷଜ୍ଞ ଆଶା କରିଛନ୍ତି ।