ସ୍କୁଲ ପ୍ରାର୍ଥନା ବେଳେ ୩୦ ପିଲାଙ୍କ କେଶ କାଟିଦେଲେ ଶିକ୍ଷକ  

ଗୁଆହାଟି: ସ୍କୁଲରେ ପିଲାଙ୍କ କେଶ କାଟିଦେଲେ ଶିକ୍ଷକ । ସକାଳ ପ୍ରାର୍ଥନା ସମୟରେ ପିଲାଙ୍କ ଚୁଟି ବଢ଼ିଥିବା ଦେଖି ୩୦ରୁ ଅଧିକ ପିଲାଙ୍କ କେଶ କାଟିଦେଇଛନ୍ତି ଶିକ୍ଷକ । କେଶ କାଟିବା ପରେ ଲାଜରେ ପିଲାମାନେ ସ୍କୁଲ ଆସିବାକୁ ମନା କରିଦେଇଛନ୍ତି । ଏହି ଘଟଣା ପରେ ଜିଲ୍ଲା ପ୍ରଶାସନ ଯାଞ୍ଚ ପାଇଁ ନିର୍ଦ୍ଦେଶ ଦେଇଛନ୍ତି ।

ପୋଲିସର କହିବା ଅନୁସାରେ, ସ୍କୁଲରେ ସକାଳ ପ୍ରାର୍ଥନା ସମୟରେ ପିଲାଙ୍କ କେଶ ବଢ଼ିଥିବା ଶିକ୍ଷକ ଦେଖିବାକୁ ପାଇଥିଲେ । ପିଲାଙ୍କୁ ଅନୁଶାସନ ଶିକ୍ଷାଇବାକୁ ଯାଇ ସ୍କୁଲରେ ହିଁ ଶିକ୍ଷକ କେଶ କାଟିଥିଲେ ।

ଏ ନେଇ ସ୍କୁଲ ପ୍ରଶାସନ କହିଛି ଯେ, ପିଲାଙ୍କୁ କେଶ କାଟି ଆସିବାକୁ ପୂର୍ବରୁ ଚେତାବନୀ ଦିଆଯାଇଥିଲା । ସେମାନଙ୍କ ବାପା ମାଆଙ୍କୁ ବି ପିଲାଙ୍କ କେଶ କଟେଇବା ପାଇଁ କୁହାଯାଇଥିଲା । କିନ୍ତୁ ସେମାନେ କାଟି ନଥିଲେ । କେବଳ ପିଲାଙ୍କୁ ଅନୁଶାସନ ଶିଖାଇବାକୁ ଯାଇ ଏପରି କରାଯାଇଛି । କେଶ କାଟିଥିବା ଶିକ୍ଷକ କହିଛନ୍ତି ଯେ, ସେ କେବଳ ସ୍କୁଲର ଉଚ୍ଚ ପଦସ୍ତ କର୍ମଚାରୀଙ୍କ ଆଦେଶ ପାଳନ କରିଥିଲେ । ଏହା ପରେ ଅଭିଭାବକ ମାନେ କହିଥିଲେ ଯେ, ପିଲାମାନେ କାନ୍ଦି କାନ୍ଦି ସେଦିନ ଘରକୁ ଆସିଥିଲେ ଏବଂ ସ୍କୁଲକୁ ଆସିବାକୁ ରାଜି ନ ହେଉଥିବା ଜଣାଇଥିଲେ । ପିଲାଙ୍କୁ ଅନୁଶାସନ ଶିଖାଇବାକୁ ଯାଇ କେଶ କାଟିବା ଠିକ୍ ହେଲେ ସବୁ ପିଲାଙ୍କ ଆଗରେ ଏହା କରିବା ଅପମାନଜନକ ।