ପୁଣି କଟକରେ ତାଜା ହେବ ପୁରୁଣା ସ୍ମୃତି

କଟକ: ମୁଁ ରିକ୍ସାବାଲା… ମୁଁ.. ରିକ୍ସାବାଲା.. ଆସ ବାବୁ, ଏସୋ ଦାଦା, ହୋ ଲାଲା, ମୋ ରିକ୍ସା ଆଛି ଖାଲି, କାହିଁ ଯିବ ଭଲା..ମୁଁ…ରିକ୍ସାବାଲା । ଅକ୍ଷୟ ମହାନ୍ତିଙ୍କ ଏହି ଅଭୁଲା ଗୀତ କେବଳ ବିଗତ ଦିନରେ ରିକ୍ସାର ଚାହିଦାକୁ ଦର୍ଶାଉ ନଥିଲା, ଗମନାଗମନର ଘୋର ଅଭାବ ଯୁଗରେ କଟକ ସହର ସହିତ ରିକ୍ସାର ସଂପର୍କକୁ ବି ବୁଝାଉଥିଲା । ଦିନ ଥିଲା, ସରକାରୀ ବଡ଼ ଅଫିସରଙ୍କଠୁ ନେଇ ,ସିନେମା ହିରୋ ହିରୋଇନ ବି ରିକ୍ସାରେ ବୁଲୁଥିଲେ । ଏକଦା ଖୁବ୍ ଲୋକପ୍ରିୟ ମାଧ୍ୟମ ଭାବେ ଗଣାଯାଉଥିବା ରିକ୍ସା କାଳକ୍ରମେ ଅଲୋଡ଼ା ହୋଇଛି । ଏବେ ଟାକ୍ସି ଓ ଅଟୋରିକ୍ସା ଯୁଗରେ ରିକ୍ସା ଆଉ ପୂର୍ବପରି ଖୋଜାପଡୁନି । ପୁଣିଥରେ ଲୋକଙ୍କ ମଧ୍ୟରେ ରିକ୍ସାକୁ ଆଦୃତ କରିବା ପ୍ରୟାସ ଆରମ୍ଭ କରିଛି କଟକ ଜିଲ୍ଲା ପ୍ରଶାସନ ।

ଏଥର କଟକ ସହରବାସୀଙ୍କ ସ୍ମୃତିରେ ତାଜା ହେବ ରିକ୍ସା । ଐତିହାସିକ ବାଲିଯାତ୍ରା ପଡ଼ିଆରେ ଗଡିବ ରିକ୍ସା । ରିକ୍ସାରେ ବୁଲି ବାଲିଯାତ୍ରାର ମଜା ନେବେ ଦର୍ଶକ। ହଜି ଯାଉଥିବା ରିକ୍ସାର ଚାହିଦା ବଢ଼ାଇବା ସହିତ ପ୍ରଦୂଷଣ ମୁକ୍ତ ବାଲିଯାତ୍ରା ପାଳନ କରିବା ଉଦ୍ଦେଶ୍ୟରେ କଟକ ପ୍ରଶାସନ ନେଇଛି ଏଭଳି ନିଷ୍ପତ୍ତି । ଯାହାକୁ ବିଭିନ୍ନ ମହଲରେ ସ୍ୱାଗତ କରାଯିବା ସହିତ ବେଶ ଖୁସି ହୋଇଛନ୍ତି ରିକ୍ସା ଚାଳକ। ।

ନଭେମ୍ବର ୧୨ରୁ ଆରମ୍ଭ ହେବ ଐତିହାସିକ ବାଲିଯାତ୍ରା। ଚଳିତ ବର୍ଷ ବାଲିଯାତ୍ରା ପଡ଼ିଆରେ ବୁଲିବ ରିକ୍ସା। ଗୋଟିଏ ନୁହେଁ କି ଦୁଇଟି ନୁହଁ। ୧ହଜାରରୁ ଊର୍ଦ୍ଧ୍ୱ ରିକ୍ସା ବ୍ୟବସ୍ଥା କରିଛି ଜିଲ୍ଲା ପ୍ରଶାସନ। ସହରର ବିଭିନ୍ନ ସ୍ଥାନରୁ ବାଲିଯାତ୍ରା ପଡ଼ିଆକୁ ଯିବା ସହିତ ବିଶାଳ ଯାତ୍ରା ପଡ଼ିଆକୁ ରିକ୍ସାରେ ବୁଲି ବାଲିଯାତ୍ରା ଉପଭୋଗ କରିବେ ଦର୍ଶକ। ବାଲିଯାତ୍ରାରେ ପ୍ରଦୂଷଣ କମ କରିବା ସହିତ ହଜି ଯାଉଥିବା ରିକ୍ସାର ଚାହିଦା ବୃଦ୍ଧି କରିବା ପାଇଁ ଏପରି ସ୍ୱତନ୍ତ୍ର ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ।

ପ୍ରଶାସନ ପକ୍ଷରୁ ବିଭିନ୍ନ ସଙ୍ଗଠନ ମାଧ୍ୟମରେ ରିକ୍ସା ଚୟନ ପ୍ରକ୍ରିୟା ଆରମ୍ଭ ହୋଇଛି। ରିକ୍ସା ଚାଳକମାନେ ନିଜର ପରିଚୟ ପତ୍ର ଓ ଦୁଇଟି ଫଟୋ ଦେଇ  ବାଲିଯାତ୍ରାରେ ନିଜର ରିକ୍ସା ଏଣ୍ଟ୍ରି କରାଇ ପାରିବେ। ଯାହାକୁ ନେଇ ରିକ୍ସା ଚାଳକମାନଙ୍କ ମଧ୍ୟରେ ବେଶ ଖୁସି ଦେଖିବାକୁ ମିଳିଛି।

ପୂର୍ବରୁ ବାଲିଯାତ୍ରା ପଡିଆକୁ ଯିବାକୁ ସୁଯୋଗ ମିଳୁ ନଥିବା ବେଳେ ଚଳିତ ବାଲିଯାତ୍ରାର ସେମାନଙ୍କୁ ପ୍ରବେଶ ସହିତ ବେଶ ଭଲ ଦି ପଇସା ରୋଜଗାର ଦେଇପାରିବ ବୋଲି ଆଶାବାଦୀ ଅଛନ୍ତି। ଚଳିତ ବାଲିଯାତ୍ରାରେ ରିକ୍ସା ସହିତ ବୋଟିଂ, ସ୍କେଟିଂ ସହିତ ପଥପ୍ରାନ୍ତ ଉତ୍ସବ ପରି ଅନେକ ନୂଆ ନୂଆ ଯୋଜନା ଜିଲା ପ୍ରଶାସନ ହାତକୁ ନେଇଥିବା ବେଳେ ଏହା ବାଲିଯାତ୍ରା ମଜାକୁ ଦ୍ୱିଗୁଣିତ କରିବ। ')}