ପାକିସ୍ତାନୀ ସାଂସଦଙ୍କ ଭାଇରାଲ ବକ୍ତବ୍ୟ ‘ମୋଦି ନିଶ୍ଚୟ ଆକ୍ରମଣ କରିବେ, ମୁଁ ଲଣ୍ଡନ ପଳେଇବି’

ନନ୍ଦିଘୋଷ ବ୍ୟୁରୋ : ପାକିସ୍ତାନ ଜାତୀୟ ସଭାର ସଦସ୍ୟ ଶେର ଅଫଜଲ ଖାନ ମାରୱାଟ ଗୋଟିଏ ସାକ୍ଷାତକାରରେ କହିଛନ୍ତି ଯେ ଯଦି ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ଆରମ୍ଭ ହୁଏ, ତେବେ ସେ ଇଂଲଣ୍ଡ ଚାଲିଯିବେ। ଏହି ବୟାନ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି, ଅନେକ ଉପଭୋକ୍ତା ପାକିସ୍ତାନୀ ନେତୃତ୍ୱର ପ୍ରତିବଦ୍ଧତା ଓ ସେନା ପ୍ରସ୍ତୁତି ଉପରେ ପ୍ରଶ୍ନ ଉଠାଇଛନ୍ତି। ଭାଇରାଲ ହେଉଥିବା ଭିଡିଓରେ ମାରୱାଟଙ୍କୁ ସାମ୍ବାଦିକ ପଚାରିଥିଲେ ଯେ, ଯଦି ଯୁଦ୍ଧ ତୀବ୍ର ହୁଏ, ତେବେ ଆପଣ ବନ୍ଧୁକ ଧରି ସୀମାରେ ଲଢ଼ିବେ କି? ଏହାର ଉତ୍ତରରେ ମାରୱାଟ କହିଥିଲେ, ଯଦି ଯୁଦ୍ଧ ବଢ଼େ, ତେବେ ମୁଁ ଇଂଲଣ୍ଡ ଚାଲିଯିବି ।

ଏହା ବ୍ୟତୀତ, ଅନ୍ୟ ଏକ ପ୍ରଶ୍ନରେ ଯେତେବେଳେ ତାଙ୍କୁ ପଚାରାଗଲା ଯେ ପରିସ୍ଥିତି ଶାନ୍ତ  କରିବା ପାଇଁ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପଛକୁ ହଟିବାକୁ କୁହାଯିବା ଉଚିତ କି, ସେ ଉତ୍ତର ଦେଇଥିଲେ, ମୋଦୀ କ’ଣ ମୋ ପିଉସୀ ପୁଅ ଯେ ମୋ କଥାରେ ପଛକୁ ହଟିବେ?

ମାରୱାଟ ଜଣେ ବରିଷ୍ଠ ପାକିସ୍ତାନୀ ରାଜନେତା ଏବଂ ପୂର୍ବତନ  ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାକିସ୍ତାନ ତେହରୀକ-ଏ-ଇନସାଫ (ପିଟିଆଇ) ଦଳ ସହ ଜଡ଼ିତ। ତେବେ, ଅତୀତରେ ସେ ଦଳ ଓ ଏହାର ନେତାମାନଙ୍କୁ ଅନେକ ଥର ସମାଲୋଚନା କରିଛନ୍ତି, ଯେଉଁଥିପାଇଁ ଇମ୍ରାନ ଖାନ ତାଙ୍କୁ ଦଳର ପ୍ରମୁଖ ପଦବୀରୁ ହଟାଇ ଦେଇଥିଲେ। ଏହି ବୟାନ ଏପ୍ରିଲ ୨୨, ୨୦୨୫ରେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ହମଲା ପରେ ଭାରତ-ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ଉତ୍ତେଜନା ମଧ୍ୟରେ ଆସିଛି, ଯେଉଁଥିରେ ୨୬ ଜଣ ପର୍ଯ୍ୟଟକଙ୍କର ମୃତ୍ୟୁ ହୋଇଥିଲା । ଏହି ଘଟଣା ପରେ ଭାରତ ସିନ୍ଧୁ ଜଳ ଚୁକ୍ତି ନିଲମ୍ବନ କରିଛି, ପାକିସ୍ତାନରୁ ଆମଦାନୀ ଉପରେ ରୋକ ଲଗାଇଛି ଏବଂ ପାକିସ୍ତାନୀ ପତାକା ବିଶିଷ୍ଟ ଜାହାଜମାନଙ୍କୁ ଭାରତୀୟ ବନ୍ଦରରେ ପ୍ରବେଶ ଉପରେ କଟକଣା ଲଗାଇଛି।

ଏହି ପରିପ୍ରେକ୍ଷୀରେ ମାରୱାଟଙ୍କ ବୟାନକୁ ଅନେକେ ପାକିସ୍ତାନୀ ନେତୃତ୍ୱର ନୈତିକ ଦୃଢ଼ତା ଓ ଆତ୍ମବିଶ୍ୱାସର ଅଭାବ ବୋଲି ଦେଖୁଛନ୍ତି। ସୋସିଆଲ ମିଡିଆରେ ଏହା ଉପରେ ବ୍ୟାପକ ଆଲୋଚନା ହେଉଛି, ଯେଉଁଥିରେ କେତେକ ଏହାକୁ ମଜାଳିଆ ଭାବେ ଗ୍ରହଣ କରୁଛନ୍ତି ଏବଂ ଅନ୍ୟମାନେ ଏହାକୁ ଗମ୍ଭୀର ରାଜନୈତିକ ମନୋବଳର ଅଭାବ ବୋଲି ସମାଲୋଚନା କରୁଛନ୍ତି ।