ନନ୍ଦିଘୋଷ ବ୍ୟୁରୋ : ରାସନ ପାଇଁ ଲମ୍ବା ଧାଡ଼ି । ଘଣ୍ଟା ଘଣ୍ଟା ଠିଆହେଲେ ବି ମିଳୁନି ଚାଉଳ । କାମ କରୁନି ଚାଉଳ ଏଟିଏମ । ପ୍ରତିଦିନ ବ୍ୟାଗ ଓ ପଥର ଥୋଇ ଜଗି ରହୁଛନ୍ତି ହିତାଧିକାରୀ । ଅପେକ୍ଷା କରି କରି ଖାଲି ହାତରେ ଫେରୁଛନ୍ତି ଅନେକ । ଭୁବନେଶ୍ୱର ସହରରେ ରାସନ୍ ହିତାଧିକାରୀଙ୍କୁ ସୁବିଧାରେ ସାମଗ୍ରୀ ଯୋଗାଇଦେବାକୁ ରାଜ୍ୟ ଯୋଗାଣ ବିଭାଗ ପକ୍ଷରୁ ଆରମ୍ଭ ହୋଇଥିଲା ଚାଉଳ ଏଟିଏମ୍ । ଅନ୍ନପୂର୍ତ୍ତି ଯୋଜନାରେ ୨୦୨୪ ଅଗଷ୍ଟ ୮ ରେ ଯୋଗାଣ ମନ୍ତ୍ରୀ ଏହାର ଶୁଭାରମ୍ଭ କରିଥିଲେ । ଦେଶର ପ୍ରଥମ ଚାଉଳ ଏଟିଏମ୍ ଭୁବନେଶ୍ବରର ମଞ୍ଚେଶ୍ଵର ଠାରେ ପରୀକ୍ଷାମୂଳକ ଭାବେ ଆରମ୍ଭ କରାଯାଇଥିଲା । କିନ୍ତୁ ସରକାରଙ୍କ ଏହି ମିଶନ୍ ଏବେ ବିଫଳ ହୋଇଥିବା ଅଭିଯୋଗ ହୋଇଛି । ଏଟିଏମ୍ ରେ ସର୍ଭର ସମସ୍ୟା ଯୋଗୁଁ ବାୟୋମେଟ୍ରକି୍ ଦେବା ପରେ ମଧ୍ୟ ଚାଉଳ ବାହାରିବାରେ ଅଧଘଣ୍ଟାରୁ ଅଧିକ ସମୟ ଲାଗୁଛି । ଫଳରେ ପ୍ରତିଦିନ ଏଟିଏମ ଆଗରେ ହିତାଧିକାରୀ ଲମ୍ବା ଧାଡ଼ି ଦେଖିବାକୁ ମିଳୁଛି ।
ଅନ୍ୟପଟେ ବିଭାଗ ପକ୍ଷରୁ ଜାରି ହୋଇଥିବା ହେଲ୍ପ ଲାଇନ୍ ନମ୍ବର ମଧ୍ୟ କାମ କରୁ ନଥିବା ହିତାଧିକାରୀ ଅଭିଯୋଗ କରିଛନ୍ତି । ହେଲ୍ପ ଲାଇନ ନମ୍ବରରେ କଲ୍ କରିବା ପରେ କୌଣସି ଉତ୍ତର ମିଳୁନାହିଁ । ଫଳରେ ଭୁବନେଶ୍ୱରରେ ରହୁଥିବା ପ୍ରବାସୀ ହିତାଧିକାରୀ ଚାଉଳ ପାଇଁ ହନ୍ତସନ୍ତ ହେଉଛନ୍ତି । ସରକାର ତୁରନ୍ତ ଏନେଇ ପଦକ୍ଷେପ ନେବାକୁ ଅନୁରୋଧ କରିଛନ୍ତି ପ୍ରବାସୀ ହିତାଧିକାରୀ ।
ସମସ୍ୟା ସଂପର୍କରେ ଯୋଗାଣ ନିଗମ ସହ ସମ୍ପର୍କ କରାଯାଇଥିଲେ ମଧ୍ୟ କୌଣସି ଉତ୍ତର ମିଳିନାହିଁ ।…….
