ଓଟିଭିର ଜମି ଜବରଦଖଲ ଘଟଣା: ସାରୁଅ ବାସିନ୍ଦାଙ୍କୁ ପୋଖରୀ ମନା !

ଭୁବନେଶ୍ୱର: ଓଟିଭି ପାଇଁ ବଢିଲା ଅଡୁଆ । ଗ୍ରାମବାସୀଙ୍କ ଅଭିଯୋଗ ପରେ ଓଟିଭିର ବେଆଇନ୍ ଜମି ଜବର ଦଖଲ ମାମଲାରେ ସକ୍ରିୟ ହୋଇଛି ଖୋର୍ଦ୍ଧା ଜିଲ୍ଲା ପ୍ରଶାସନ । ଜିଲ୍ଲାପାଳଙ୍କ ନିର୍ଦ୍ଦେଶ ପରେ ଖୋର୍ଦ୍ଧା ଉପ-ଜିଲ୍ଲାପାଳ ଓ ବେଗୁନିଆ ତହସିଲଦାର ସାରୁଅ ଗାଁରେ ପହଞ୍ଚି ଗତକାଲିଠାରୁ ତଦନ୍ତ ଆରମ୍ଭ କରିଥିଲେ । ଆଜି ହେଉଛି ତଦନ୍ତର ଦ୍ୱିତୀୟ ଦିନ । ସାରୁଅର ନକ୍ସା ସହ ଓଟିଭି ଅକ୍ତିଆର କରିଥିବା ଜମିକୁ ଅନୁଧ୍ୟାନ କରିଛି ତଦନ୍ତକାରୀ ଟିମ ।

ଖୋର୍ଦ୍ଧା ସାରୁଅରେ ଓଟିଭି ମାଲିକାଣୀ ଜଗି ମଙ୍ଗତ ପଣ୍ଡା ଜମି ଜବରଦାଖଲ କରିଥିବା ଅଭିଯୋଗ ଉପରେ ପ୍ରଶାସନିକ ତଦନ୍ତ ଜାରି ରହିଛି । ଦୁଇ ଜଣ ପ୍ରଶାସନିକ ଅଧିକାରୀ ଆଜି ସାରୁଅ ମଲ୍ଲିକ ସାହିରେ ପହଞ୍ଚି ତଦନ୍ତ କରୁଛନ୍ତି । ସ୍ଥାନୀୟ ଲୋକମାନଙ୍କଠୁ ସେମାନଙ୍କ ସମସ୍ୟା ସମ୍ପର୍କରେ ପଚାରି ବୁଝୁଛନ୍ତି। ଲୋକମାନେ ପୋଖରୀ ଓ ଚାଷଜମି  ବ୍ୟବହାର କରିପାରୁ ନାହାନ୍ତି ବୋଲି ଅଧିକାରୀଙ୍କୁ ଜଣାଇଛନ୍ତି ।

ବେଗୁନିଆ ତହସିଲଦାର ବିବେକାନନ୍ଦ ପରିଡା ଏବଂ ଡେପୁଟି କଲେକ୍ଟର ତରୁଣ କାନ୍ତ ମହାପାତ୍ର ଆଜିର ତଦନ୍ତରେ ସାମିଲ ହୋଇଛନ୍ତି । ଓଟିଭି କେତେ ଜମି ହାତେଇଛି ତାର ସ୍ଥିତାବସ୍ଥା କଣ ? ସାରୁଅ ଗାଁରେ ସର୍‌ଜମିନ ଅନୁଧ୍ୟାନ କରୁଛି ପ୍ରଶାସନ । ନକ୍ସା ଦେଖି ଜମି ଅନୁଧ୍ୟାନ କରାଯାଉଛି । ୭ ଦିନ ମଧ୍ୟରେ ଜିଲ୍ଲାପାଳଙ୍କୁ ଉପଜିଲ୍ଲାପାଳ ରିପୋର୍ଟ ଦେବେ । ଜିଲ୍ଲାପାଳଙ୍କ ନିର୍ଦ୍ଦେଶ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଖୋର୍ଦ୍ଧା ଏଡିଏମ କହିଛନ୍ତି ।