ଭୁବନେଶ୍ବର: ସ୍ବିଗି ବୟଙ୍କୁ ସାହା ହେଲା ଓଡ଼ିଶା ମୋ ପରିବାର । ଦୁର୍ଘଟଣାଗ୍ରସ୍ତ ଯୁବକଙ୍କୁ ଉଦ୍ଧାର କରି କରାଇଲା ଚିକିତ୍ସା । ଜଗତସିଂହପୁର ପାଟେଣି ଗାଁର ୨୪ ବର୍ଷୀୟ ବୈକୁଣ୍ଠ ସାହୁ ବେଙ୍ଗାଲୁରୁରେ ରହି ସ୍ବିଗି କମ୍ପାନୀରେ କାମ କରୁଥିଲା । ଗତ ୨୧ ତାରିଖରେ ଖାଦ୍ୟ ନେଇ ଯାଉଥିବା ବେଳେ ଏକ ଗାଡି ତାଙ୍କୁ ଧକ୍କା ଦେଇଥିଲା । ସେ ଗଭୀର ଭାବେ ଆହତ ହୋଇଥିଲେ । କିଛି ଲୋକ ତାଙ୍କୁ ଉଦ୍ଧାର କରି ତାଙ୍କ ଘର ଲୋକଙ୍କ ସହ ଯୋଗାଯୋଗ କରିଥିଲେ । ପରିବାର ଲୋକେ ସାହାଯ୍ୟ ପାଇଁ ଓଡ଼ିଶା ମୋ ପରିବାର ଏନଆରଓ ଉପଦେଷ୍ଟା ସୁରେନ୍ଦ୍ରନାଥ ମହାପାତ୍ରଙ୍କୁ ଅନୁରୋଧ କରିଥିଲେ । ସେ ଓଡିଶା ମୋ ପରିବାର ଆବାହକଙ୍କୁ ଜଣାଇବା ପରେ ବେଙ୍ଗଲୁରୁ ନୋଡାଲ ଅଫିସର ତଥା ବରିଷ୍ଠ ସମାଜସେବୀ ପ୍ରଣବ ପାଣିଙ୍କ ସାହାଯ୍ୟରେ ବୈକୁଣ୍ଠଙ୍କୁ ନିକଟସ୍ଥ ସେଣ୍ଟ ଜୋନ୍ ହସ୍ପିଟାଲରେ ଭର୍ତ୍ତି କରାଯାଇଥିଲା ।
ତାଙ୍କ ସ୍ବାସ୍ଥ୍ୟରେ ପରିବର୍ତ୍ତନ ଆସିବା ପରେ ଘରକୁ ଫେରାଇ ଆଣିବାକୁ ପରିବାର ଲୋକ ଓଡ଼ିଶା ମୋ ପରିବାରକୁ ଅନୁରୋଧ କରିଥିଲେ । ଓଡ଼ିଶା ମୋ ପରିବାର ପକ୍ଷରୁ କମ୍ପାନୀ ମାଲିକଙ୍କ ସହ ଯୋଗାଯୋଗ କରାଯାଇ ବୈକୁଣ୍ଠଙ୍କୁ ଭୁବନେଶ୍ବର ଅଣାଯାଇଥିଲା । ସେ ଭୁବନେଶ୍ବର ପହଞ୍ଚିବା ପରେ ଓଡ଼ିଶା ମୋ ପରିବାରର ଯୁଗ୍ମ ସମ୍ପାଦକ ରୁଦ୍ର ନାରାୟଣ ସାମନ୍ତ ରାୟଙ୍କ ସମେତ, ଏନଆରଓ ଉପଦେଷ୍ଟା ସୁରେନ୍ଦ୍ରନାଥ ଏବଂ ଓଡ଼ିଶା ମୋ ପରିବାରର ଟିମ୍ ରେଳ ଷ୍ଟେସନରୁ ତାଙ୍କୁ ଘରକୁ ଫେରାଇବା ପାଇଁ ସମସ୍ତ ସହାୟତା ଯୋଗାଇ ଦେଇଥିଲେ । ଏନେଇ ଓଡ଼ିଶା ମୋ ପରିବାରକୁ ଧନ୍ୟବାଦ ଜଣାଇଛନ୍ତି ବୈକୁଣ୍ଠଙ୍କ ପରିବାର ।
