ରାଜ୍ୟ ସରକାରଙ୍କ ଫୋକସରେ ଗ୍ରାମୀଣ ଅର୍ଥନୀତି
ଭୁବନେଶ୍ୱର:(ଚିନ୍ମୟ ମହାପାତ୍ର) ଗ୍ରାମୀଣ ଅର୍ଥନୀତିକୁ ସୁଦୃଢ କରିବା ପାଇଁ ଅଣ୍ଟା ଭିଡିଲେ ରାଜ୍ୟ ସରକାର । କରୋନା ମହାମାରୀରେ ଭୁଶୁଡ଼ି ପଡିଛି ରାଜ୍ୟର ଅର୍ଥନୀତି । ଏହାକୁ ସଜାଡ଼ିବାକୁ ରାଜ୍ୟ ସରକାର ସ୍ୱତନ୍ତ୍ର ପ୍ୟାକେଜ ବ୍ୟବସ୍ଥା କରିଛନ୍ତି । ପଂଚାୟତରାଜ ବିଭାଗର ବିଭିନ୍ନି ଯୋଜନାକୁ ମିଶାଇ କୋଭିଡ ୧୯ ସହାୟକ ପ୍ୟାକେଜ ପ୍ରସ୍ତୁତ କରାଯାଇଛି। ରାଜ୍ୟକୁ ଫେରିଥିବା ପ୍ରବାସୀ ଓଡ଼ିଆଙ୍କୁ ଏହା ରୋଜଗାର ଦେବ ବୋଲି ଆଶା କରାଯାଉଛି ।
ରାଜ୍ୟ ସରକାରଙ୍କ ଫୋକ୍ସରେ ଗାଁର ବିଗିଡ଼ା ଅର୍ଥନୀତି । ବିଭିନ୍ନ ଫ୍ଳାଗସିପ୍ ପ୍ରୋଗ୍ରାମକୁ ପଂଚାୟତରାଜ ବିଭାଗ ଆଣିଛି କୋଭିଡ ୧୯ ସହାୟକ ପ୍ୟାକେଜ। ଟାର୍ଗେଟରେ କାମଧନ୍ଦା ହରାଇ ରାଜ୍ୟକୁ ଫେରିଥିବା ପ୍ରବାସୀ ଓଡ଼ିଆ । ଏହି ପ୍ୟାକେଜକୁ ୪ ଭାଗରେ ବିଭକ୍ତ କରାଯାଇଛି । ମିଶନ୍ ଶକ୍ତି, ଓଡ଼ିଶା ଜୀବିକା ମିଶନ, ଜିଲ୍ଲା ଖଣିଜ ପାଣ୍ଠି ଓ ବିଭିନ୍ନ ଉନ୍ନୟନମୂଳକ ଯୋଜନା । ପ୍ରଥମ ପ୍ୟାକେଜରେ ଦର୍ଜି , ଚା’ ଦୋକାନୀ, ଛୋଟଛୋଟ ଫାର୍ମ, ପରିବା ବ୍ୟବସାୟୀ ଓ ମୋବାଇଲ ମରାମତି ଦୋକାନୀ ।
ପ୍ୟାକେଜର ଗାଇଡଲାଇନ୍ ଅନୁସାରେ ଏମାନଙ୍କୁ ୫୦ହଜାର ଟଙ୍କା ପର୍ଯ୍ୟନ୍ତ ଆର୍ଥକ ସହାୟତା ଯୋଗାଇ ଦିଆଯିବ । ସେହିପରି ଦ୍ୱିତୀୟ ପ୍ୟାକେଜରେ ଆର୍ଥକ ସହାୟତା ଦେଢ ଲକ୍ଷ ପର୍ଯ୍ୟନ୍ତ ଯୋଗାଇ ଦିଆଯିବ । ଛୋଟଛୋଟ ସଂସ୍ଥା, ପ୍ରଡକ୍ସନ ଗ୍ରୁପ୍ ଏହି କ୍ୟାଟେଗୋରୀରେ ଆସିବେ । ତୃତୀୟ ପ୍ୟାକେଜରେ ବିଭିନ୍ନ ଶିଳ୍ପସଂସ୍ଥା, ଛେଳି ଓ କୁକୁଡ଼ା ଫାର୍ମ, ଭିନ୍ନକ୍ଷମ ଓ ତୃତୀୟ ଲିଙ୍ଗିଙ୍କୁ ସହାୟତା ଯୋଗାଇ ଦିଆଯିବ । ସେହିପରି କୁଶଳୀ ଓ ଅର୍ଦ୍ଧ କୁଶଳୀ ପ୍ରବାସୀମାନଙ୍କୁ ୧ଲକ୍ଷ ପର୍ଯ୍ୟନ୍ତ ଆର୍ଥିକ ସହାୟତା ଯୋଗାଇବାକୁ ବ୍ୟବସ୍ଥା କରାଯାଇଛି ।
ଯୋଗ୍ୟ ବ୍ୟକ୍ତିଙ୍କୁ ଚିହ୍ନଟ କରି ସହାୟତା ଯୋଗାଇ ଦେବାକୁ ବ୍ଲକ ଅଫିସରଙ୍କୁ ଦାୟିତ୍ୱ ଦିଆଯାଇଛି । ଗାଁର ଯୁବକ ଗାଁରେ ରହିବେ । ରୋଜଗାର ପାଇଁ ଆଉ ବାହାର ରାଜ୍ୟକୁ ଯିବେନି । ଫଳରେ ଗୋଟିଏ ଗୁଳିରେ ହେବ ଦୁଇଟି ଶୀକାର । ଗାଁ ଯୁବକ କାମ ପାଇବେ ଓ ଟ୍ରାକ୍କୁ ଫେରିବ ଗ୍ରାମୀଣ ଅର୍ଥନୀତି ।
