ବେଆଇନ ପ୍ରବାସୀଙ୍କୁ ପ୍ରେରଣକୁ ନେଇ ଆମେରିକା ସହିତ ବିିଭିନ୍ନ ଦେଶର ତିକ୍ତତା

ନନ୍ଦିଘୋଷ ବ୍ୟୁରୋ: ବେଆଇନ ପ୍ରବାସୀଙ୍କୁ ଜୋରଜବରଦସ୍ତ ସେମାନଙ୍କ ନିଜ ଦେଶକୁ ପଠାଇବାକୁ ନେଇ ଆମେରିକା ସହିତ ବିଭିନ୍ନ ଦେଶର ତିକ୍ତତା । ଯେପରି ଭାବେ ଲୋକଙ୍କୁ ଅମାନବୀୟ ଭାବେ ପ୍ରେରଣ କରାଯାଉଛି, ତାକୁ କଡ଼ା ସମାଲୋଚନା କରିଛି ବ୍ରାଜିଲ୍ । ପ୍ରାୟ ୯୦ ଜଣ ବ୍ରାଜିଲ ନାଗରିକଙ୍କୁ ହାତକଡ଼ି ପିନ୍ଧାଇ ପଠାଇଥିବାରୁ ଆମେରିକାକୁ କଡ଼ା ସମାଲୋଚନା କରିଛି ବ୍ରାଜିଲ୍ । ସେମାନଙ୍କୁ ପାଣି ବି ପିଇବାକୁ ଦିଆଯାଇନଥିଲା । ଅତି କମରେ ମଣିଷ ଭଳି ବ୍ୟବହାର କରିବାର ଥିଲା ବୋଲି କହିଛି ବ୍ରାଜିଲ। ଏହାକୁ ନେଇ ଆମେରିକାକୁ ଜବାବ ମଗାଯିବ ବୋଲି କହିଛନ୍ତି ବ୍ରାଜିଲର ବୈଦେଶିକ ମନ୍ତ୍ରୀ।

ସେହିପରି କଲମ୍ଵିଆ ସହିତ ମଧ୍ୟ ଆମେରିକାର ତିକ୍ତତା ହୋଇଛି। ପ୍ରଥମେ ନିଜ ନାଗରିକଙ୍କୁ ଗ୍ରହଣ କରିବାକୁ ମନା କରିଥିଲା କଲମ୍ଵିଆ। ଲୋକଙ୍କୁ ଛାଡ଼ିବାକୁ ଯାଇଥିବା ମିଲିଟାରି ବିମାନକୁ ଅବତରଣ ପାଇଁ ଅନୁମତି ଦିଆଯିବ ନାହିଁ ବୋଲି କହିଥିଲା କଲମ୍ଵିଆ। କିନ୍ତୁ ଚଢ଼ା ଟ୍ୟାକ୍ସ ଲଗାଇବାକୁ ଆମେରିକା ଧମକ ଦେବା ପରେ ନିଜ ନାଗରିକଙ୍କୁ ଗ୍ରହଣ ରାଜି ହୋଇଛି କଲମ୍ବିଆ। ରାଷ୍ଟ୍ରପତି ପ୍ରଥମେ କହିଥିଲେ, ଆମେରିକାର ସମ୍ମାନର ସହିତ ଲୋକଙ୍କୁ ଫେରାଉ। ସିଭିଲ ବିମାନରେ ଲୋକଙ୍କୁ ଆଣୁ। ଏପରିକି ଦୁଇଟି ମିଲିଟାରି ବିମାନକୁ କଲମ୍ଵିଆ ଫେରାଇ ଦେଇଥିଲା। ଏହା ପରେ ଆମେରିକା କ୍ଷୁବ୍ଧ ହୋଇ ଆର୍ଥିକ କଟକଣା ଲଗାଇବା ସହିତ ଚଢ଼ା ଦରର ବିଭିନ୍ନ ଟ୍ୟାକ୍ସ ଲଗାଇବାକୁ ଧମକ ଦେଇଥିଲା । ଏହା ପରେ କଲମ୍ବିଆ ନିଜ ନାଗରିକଙ୍କୁ ଗ୍ରହଣ କରିବାକୁ ରାଜି ହୋଇଛି ।