କୋଭିଡ଼-19 ଟିକା ପ୍ରମାଣପତ୍ରରେ ଆପଣଙ୍କର ନାମ, ଜନ୍ମ ତାରିଖରେ କିଛି ଭୁଲ ରହିଛ କି ? ଜାଣନ୍ତୁ କେମିତ ସୁଧାରିବେ

ନୂଆଦିଲ୍ଲୀ: କରୋନା ଟିକା ନେଇସାରିଥିବା ବ୍ୟକ୍ତି ନିଜର କୋଭିଡ଼-19 ଟିକା ପ୍ରମାଣପତ୍ରରେ ଥିବା ତ୍ରୁଟି ସୁଧାରି ପାରିବେ । କୋଭିନ ପୋର୍ଟାଲରେ ନିଜେ ତ୍ରୁଟିଗୁଡ଼ିକୁ ସଂଶୋଧନ କରିପାରିବେ ଟିକା ନେଇଥିବା ବ୍ୟକ୍ତି । ସରକାର ଏକ ନୂଆ ଅପଡେଟର ଘୋଷଣା କରିଛନ୍ତି ଯାହା ମାଧ୍ୟମରେ ଆବେଦନକାରୀଙ୍କ ଦ୍ୱାରା ହୋଇଥିବା ଭୁଲଗୁଡ଼ିକ ଯେମିତି କି ନାମ, ଜନ୍ମ ତାରିଖ ଏବଂ ଲିଙ୍ଗରେ ଥିବା ଭୁଲକୁ ସଂଶୋଧନ କରିବାର ଅନୁମତି ଦେବ। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଅତିରିକ୍ତ ସଚିବ ବିକାଶ ଶିଲ ବୁଧବାର କହିଛନ୍ତି ଯେ, ଉପଭୋକ୍ତାମାନେ କୋଭିନ ୱେବସାଇଟ ମାଧ୍ୟମରେ ଏହି ସଂଶୋଧନ କରିପାରିବେ।

କୋଭିନ୍ ୱେବସାଇଟରେ ସମସ୍ୟା ବିଷୟରେ ଜଣାଇପାରିବେ

ଆରୋଗ୍ୟ ସେତୁ ଆପର ଅଫିସିଆଲ୍ ହ୍ୟାଣ୍ଡେଲରେ ଏକ ଟୁଇଟ୍ କରାଯାଇଥିଲା । ଯେଉଁଥିରେ ଲେଖାଯାଇଥିଲା ଯେ, “ଯଦି ଟୀକାକରଣ ପ୍ରମାଣପତ୍ରରେ ଅଜାଣତରେ ଆପଣଙ୍କ ନାମରେ, ଜନ୍ମ ତାରିଖ ଏବଂ ଲିଙ୍ଗରେ କୌଣସି ଭୁଲ ହୋଇଛି, ତେବେ ଆପଣ ସେଗୁଡ଼ିକୁ ସଂଶୋଧନ କରିପାରିବେ। କୋଭିନଙ୍କ ୱେବସାଇଟକୁ ଯାଆନ୍ତୁ ଏବଂ ସମସ୍ୟା ବିଷୟରେ ଜଣାନ୍ତୁ ।

ବ୍ଲୁ ଟିକରୁ ଜଣାପଡ଼ିବ ଟିକାର କେତେ ଡୋଜ ନେଇଛନ୍ତି

ଏହାପୂର୍ବରୁ ସରକାର ଟୀକାକରଣ କରିଥିବା ଲୋକଙ୍କୁ ସ୍ୱ-ମୂଲ୍ୟାଙ୍କନ ପ୍ରକ୍ରିୟା ମାଧ୍ୟମରେ ଆରୋଗ୍ୟ ସେତୁ ଆପରେ ନିଜର ସ୍ଥିତି ସ୍ୱେଚ୍ଛାକୃତ ଅପଡେଟ କରିବାର ଅନୁମତି ଦେଇଥିଲେ। ଟୀକାକରଣର ଗୋଟିଏ ମାତ୍ର ଡୋଜ ନେଇଥିବା ଲୋକମାନେ ନିଜ ହୋମ ସ୍କ୍ରିନରେ ଟୀକାକରଣ ସ୍ଥିତି ପାଖରେ ଏକ ବ୍ଲୁ ଟିକ୍ ଦେଖିବେ ଏବଂ ଯେଉଁମାନେ ଉଭୟ ଡୋଜ ନେଇଛନ୍ତି ସେମାନେ ୧୪ଦିନ ପରେ ଆପରେ ଦୁଇଟି ବ୍ଲୁ ଟିକ୍ ଦେଖିପାରିବେ ।

ଏହି ଦୁଇଟି ଟିକ୍ କୋଭିନ୍ ପୋର୍ଟାଲରୁ ଟୀକାକରଣ ସ୍ଥିତି ଯାଞ୍ଚ ପରେ ନଜର ଆସିବ । କୋଭିନରେ ପଞ୍ଜୀକରଣ ପାଇଁ ବ୍ୟବହୃତ ମୋବାଇଲ୍ ନମ୍ବର ମାଧ୍ୟମରେ ଟୀକାକରଣ ସ୍ଥିତିକୁ ଅପଡେଟ କରାଯାଇପାରିବ । ଦେଶବ୍ୟାପୀ ଟୀକାକରଣ ଅଭିଯାନ ଅଧୀନରେ ଏପର୍ଯ୍ୟନ୍ତ କୋଭିଡ -19ର ମୋଟ ୨୩,୯୦,୫୮,୩୬୦ ଡୋଜ ଦିଆଯାଇଛି।