ମୁମ୍ବାଇର ଅଷ୍ଟମ ପରାଜୟ ପରେ ଆଇପିଏଲରେ ପ୍ରଥମ ଦଳ ଭାବେ ପ୍ଲେ ଅଫରୁ ବାଦ୍
ମୁମ୍ବାଇ: ଏଥର ପୁଣି ଫେଲ । ମଇଦାନରେ କାମ କରୁନି ରୋହିତଙ୍କ ମନ୍ତ୍ର । ନିଜର ଖରାପ ପଦର୍ଶନ ପାଇଁ ପୁଣି ପରାଜୟର ସ୍ୱାଦ ଚାଖିଛି ମୁମ୍ବାଇ ଇଣ୍ଡିଆନସ । ପ୍ରଶଂସକକୁ ପୁଣି ନିରାଶ କରିଛି ଦଳ । ଚଳିତ ସିଜିନରେ ପ୍ରଥମ ବିଜୟ ହାସଲ କରିବା ମୁମ୍ବାଇ ପାଇଁ ସ୍ୱପ୍ନ ହୋଇଯାଇଛି । ନିଜ ଘରୋଇ ଗ୍ରାଉଣ୍ଡ ଓ୍ଵାଙ୍ଖଡେ ଷ୍ଟାଡିୟମରେ ରବିବାର ଖେଳାଯାଇଥିବା ମ୍ୟାଚରେ ମଧ୍ୟ ମୁମ୍ବାଇକୁ ପରାଜୟର ସ୍ଵାଦ ଚାଖିବାକୁ ପଡିଛି । ଏହି ପରାଜୟ ସହ ମୁମ୍ବାଇ ଚଳିତ ଆଇପିଏଲରେ ପ୍ରଥମ ଦଳ ଭାବେ ପ୍ଲେ ଅଫରୁ ବାଦ୍ ପଡିଛି ।
ଆଇପିଏଲର ୩୭ତମ ମ୍ୟାଚରେ ଲକ୍ଷ୍ନୌ ସୁପର ଜାଏଣ୍ଟସ ମୁମ୍ବାଇକୁ ୩୬ ରନରେ ହରାଇଛି । ଏବଂ ଏଥିସହ ଚଳିତ ସିଜିନରେ ଲକ୍ଷ୍ନୌ ମୁମ୍ବାଇ ବିପକ୍ଷରେ ନିଜର ଦ୍ଵିତୀୟ ବିଜୟ ହାସଲ କରିଛି । ପଞ୍ଚମ ବିଜୟ ସହ ଲକ୍ଷ୍ନୌ ପଏଣ୍ଟ ତାଲିକାର ଚତୁର୍ଥ ସ୍ଥାନକୁ ଉପରକୁ ଉଠିଛି । ପ୍ରଥମେ ଲକ୍ଷ୍ନୌ ସୁପର ଜାଏଣ୍ଟସର ଅଧିନାୟକ ଲୋକେଶ ରାହୁଲଙ୍କ ଅପରାଜିତ ଶତକୀୟ ଇନିଂସ ପରେ ଲକ୍ଷ୍ନୌ ଟୁର୍ଣ୍ଣାମେଣ୍ଟରେ ଅଷ୍ଟମ ମ୍ୟାଚରୁ ପଞ୍ଚମ ବିଜୟ ହାସଲ କରିଛି । ଅନ୍ୟପଟେ ମୁମ୍ବାଇ ଖେଳିଥିବା ସମସ୍ତ ଆଠଟି ମ୍ୟାଚରେ ପରାଜୟ ହୋଇଛି ।
ପ୍ରଥମେ ବ୍ୟାଟିଂ କରି ଲକ୍ଷ୍ନୌ ଅଧିନାୟକ ଲୋକେଶ ରାହୁଲଙ୍କ ଅପରାଜିତ ୧୦୩ ରନର ଇନିଂସ ବଳରେ ନିର୍ଦ୍ଧାରିତ ଓଭରରେ ୬ ଓ୍ଵିକେଟ୍ ହରାଇ ୧୬୮ ରନ କରିଥିଲା। ୧୬୯ ରନର ବିଜୟ ଲକ୍ଷ୍ୟ ପିଛା କରିଥିବା ମୁମ୍ବାଇକୁ ଏଥର ଦୁଇ ଓପନର ରୋହିତ ଶର୍ମା ଏବଂ ଇଶାନ କିଷନ ୭.୧ ଓଭରରେ ୪୯ ରନ କରି୦ଥିଲେ ।
ଏବଂ ମୁମ୍ବାଇ ଇଣ୍ଡିଆନ୍ସ ୨୦ ଓଭରରେ ୮ ଓ୍ଵିକେଟ୍ ହରାଇ ୧୩୬ ରନ କରିବାକୁ ସକ୍ଷମ ହୋଇଥିଲା। ରୋହିତ ଶର୍ମା(୩୯) ଏବଂ ତିଳକ ବର୍ମା(୩୮) କରିଥିଲେ ହେଁ ଦଳକୁ ପରାଜୟରୁ ବଞ୍ଚାଇ ପାରିନଥିଲେ । ଗୁଜରାଟ ପକ୍ଷରୁ କୃଣାଲ ପାଣ୍ଡ୍ୟା ୩ ସଫଳତା ପାଇଥିଲେ। ତାଙ୍କ ବ୍ୟତୀତ ପ୍ରାୟ ସମସ୍ତ ବୋଲର ମାପଚୁପ ବୋଲିଂ କରିଥିଲେ
