ନନ୍ଦିଘୋଷ ବ୍ୟୁରୋ ; ହରିଆଣାରେ ବର୍ଷା ତାଣ୍ଡବ। ଅଧିକାଂଶ ଅଞ୍ଚଳ ଜଳବନ୍ଦୀ। ସେପଟେ ଝାଜର ଜିଲ୍ଲା ଅନ୍ତର୍ଗତ ବାହାଦୂରଗଡ଼ରେ ଭରି ରହିଛି ପାଣି। ବାହାଦୂରଗଡ଼ରେ ପାଣି ଜମି ରହିଥିବାବେଳେ ଶିଳ୍ପାଞ୍ଚଳ ସ୍ଥିତି ସଂଗୀନ ହୋଇଛି। ଏଠାରେ ଥିବା ମାରୁତି ଗୋଦାମରେ ପାଣି ପଶିଯିବାରୁ ୩ଶହରୁ ଅଧିକ କାର୍ ବୁଡ଼ିଯାଇଛି। ସେଠାରେ ଜଳ ପରିମାଣ ବଢ଼ିବା ପରିଲକ୍ଷିତ ହୋଇଥିବା ସତ୍ତ୍ବେ ଏତେ ସଂଖ୍ୟକ କାରକୁ ପଦାକୁ ଅଣାଯାଇପାରି ନଥିଲେ। କାରଗୁଡିକ ମଧ୍ୟରେ ରହିଛି ଅଲଟୋ, ୱାଗନର, ଭିତାରା, ବ୍ରିଜା, ଇନଭିକ୍ଟୋ ଆଦି କାର। ଘାଗର ନଦୀର ଜଳପତ୍ତନ ବୃଦ୍ଧି ପାଉଥିବାରୁ ନଦୀ ପ୍ରବାହିତ ଅଞ୍ଚଳ ଜଳମଗ୍ନ ହୋଇଛି। ଲଗାତାର ପ୍ରବଳ ବର୍ଷା ଯୋଗୁ ଜନଜୀବନ ଗୁରୁତର ପ୍ରଭାବିତ ହୋଇଛି। ହାଥନିକୁଣ୍ଡ ବ୍ୟାରେଜରୁ ଜଳ ନିଷ୍କାସନ କରାଯାଉଥିବାରୁ ଏହାର ପ୍ରଭାବ ଗୁରୁଗ୍ରାମରେ ପଡିଛି। ବିଭିନ୍ନ ତଳିଆ ଅଞ୍ଚଳ ଲାଗି ଆଲର୍ଟ ଜାରି କରାଯାଇଛି। ଲୋହାପୁଲ ଅଞ୍ଚଳରେ ଯମୁନା ନଦୀର ଜଳସ୍ତର ବୃଦ୍ଧି ପାଇବା ହେତୁ ଗୁରୁଗ୍ରାମର ଅନେକ ତଳିଆ ଅଞ୍ଚଳ ଜଳବନ୍ଦୀ ହୋଇଛି।
