ନେପାଳ ସଂସଦରେ ରାଜନୈତିକ ନକ୍ସା ପାସ୍,କାଠମାଣ୍ଡୁରେ ନେପାଳୀ ନାଗରିକଙ୍କ ବିରୋଧ
କାଠମାଣ୍ଡୁ: ଶନିବାର ଦିନ ନେପାଳ ସଂସଦର ନିମ୍ନକକ୍ଷ ଦେଶର ରାଜନୈତିକ ନକ୍ସାକୁ ପାସ୍ କରିଛି । ଏହା ସହିତ ଭାରତ ସହିତ ଚାଲିଥିବା ସୀମା ବିବାଦର ରାଜନୈତିକ ସମାଧାନର ରାସ୍ତାକୁ ନେପାଳ ପ୍ରାୟତଃ ବନ୍ଦ କରିଦେଇଛି । ଏବେ ଭାରତର ଆଗାମୀ ପଦକ୍ଷେପ କ’ଣ ହେବ ତାହା ଦେଖିବାର କଥା । ଉଲ୍ଲେଖନୀୟ ଯେ, ନେପାଳ ବିବାଦୀୟ ନକ୍ସାରେ ଭାରତୀୟ ସୀମାର ଥିବା ଲିପୁଲେଖ,କାଲାପାନି ଓ ଲିପିୟାଧୁରା ଭଳି ସ୍ଥାନକୁ ସାମିଲ କରିଛି ।
ନେପାଳ ସଂସଦର ନିମ୍ନକକ୍ଷରେ ପାସ ହେବା ପରେ ଏବେ ଏହି ବିଧେୟକ ନ୍ୟାସନାଲ ଆସେମ୍ଲିଂକୁ ଯିବ । ସେଠାରେ ଏହି ବିଲକୁ ପୁଣିଥରେ ସମାନ ପ୍ରକ୍ରିୟା ଦେଇ ପାସ ହେବାକୁ ପଡିବ । ନ୍ୟାସନାଲ ଆସେମ୍ଲିରେ ଏହି ବିଧେୟକ ପାସ ହେବା ପରେ ଏହାକୁ ରାଷ୍ଟ୍ରପତିଙ୍କ ଅନୁମୋଦନ ପାଇଁ ପଠାଯିବ । ରାଷ୍ଟ୍ରପତିଙ୍କ ମଂଜୁରୀ ପରେ ଏହା ସମ୍ବିଧାନରେ ସାମିଲ ହେବ ।
ନେପାଳରେ ବିରୋଧ
ଶନିବାର ଦିନ ନେପାଳ ସଂସଦ ପ୍ରସ୍ତାବକୁ ପାସ କରିଛି ସତ କିନ୍ତୁ ଏହାକୁ ତାହାରି ନାଗରିକ ବିରୋଧ କରିବା ଆରମ୍ଭ କରିଛନ୍ତି । ରାଜଧାନୀ କାଠମାଣ୍ଡୁରେ ଶନିବାର ସକାଳେ ସଡକ ଉପରେ ବିକ୍ଷୋଭକାରୀଙ୍କୁ ଦେଖିବାକୁ ମିଳିଥିଲା । ଏହାପୂର୍ବରୁ ଶୁକ୍ରବାର ମଧ୍ୟ ଏହି ବିଲକୁ ବିରୋଧ କରି ସାଧାରଣ ଲୋକ ରାସ୍ତା ଉପରକୁ ଓହ୍ଲାଇଥିଲେ । ଦେଶବ୍ୟାପି ହେଉଥିବା ବିରୋଧ ଉପରେ ପ୍ରତିକ୍ରିୟା ପ୍ରକାଶ କରି ନେପାଳ ବୈଦେଶିକ ମନ୍ତ୍ରୀ ପ୍ରଦୀପ ଗ୍ୟାବଲୀ ମିଡିଆ ମାଧ୍ୟମରେ ଲୋକଙ୍କୁ ବିକ୍ଷୋଭ ନକରିବାକୁ ଆହ୍ୱାନ କରିଥିଲେ । ତେବେ ଶନିବାରର ବିକ୍ଷୋଭରୁ ଜଣା ପଡୁଛି ଯେ, ମନ୍ତ୍ରୀଙ୍କ ଅପିଲର କୌଣସି ପ୍ରଭାବ ସାଧାରଣ ଲୋକଙ୍କ ଉପରେ ପଡିନଥିଲା । ପୋଲିସ ବିକ୍ଷୋଭକାରୀଙ୍କୁ ଗିରଫ କରୁଥିବା ଦେଖାଯାଇଥିଲା
ସଡକ ନିର୍ମାଣରୁ ଆରମ୍ଭ ହୋଇଥିଲା ବିବାଦ
ଉତ୍ତରାଖଣ୍ଡର ଲିପୁଲେଖ ଘାଟିକୁ ଧାରଚୁଲା ସହ ଯୋଡୁଥିବା ୮୦ କିମି ଲମ୍ବ ରାସ୍ତା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କରିବା ପରେ ବିବାଦ ଆରମ୍ଭ ହୋଇଥିଲା । ନେପାଳ ଏହି ଅଂଚଳକୁ ନିଜର ବୋଲି ଦାବି କରି ଆସୁଛି । ଚୀନ ପ୍ରରୋଚନାରେ ନେପାଳ ଭାରତ ବିରୋଧୀ ଆଭିମୁଖ୍ୟ ଦେଖାଉଛି ବୋଲି ରାଜନୈତିକ ବିଶ୍ଲେଷକଙ୍କ ମତ
