ସୁଏଜ କେନାଲରେ ସପ୍ତାହେ ଧରି ଅଟକି ରହିଥିବା ଜାହାଜର ନାଁ କ’ଣ?
କାଇରୋ: ସୋମବାର ଦିନ ଦୈତ୍ୟ ଜାହାଜ ଏଭର ଗିଭେନ୍ ସୁଏଜ କେନାଲରୁ ବାହାରିଛି । ପାଖାପାଖି ସପ୍ତାହେ ଧରି ସୁଏଜ କେନାଲରେ ଅଟକି ରହିବା ପରେ ଏହି ଜାହାଜ ନିଜ ଗନ୍ତବ୍ୟସ୍ଥଳୀ ଆଡକୁ ଅଗ୍ରସର ହୋଇଛି । ତେବେ ଏହି ଜାହାଜର ନାମକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । କିଛି ଏହାକୁ ଏଭର ଗ୍ରୀନ୍ ବୋଲି କହୁଛନ୍ତି କିଛି ଏହାକୁ ଏଭର ଗିଭେନ୍ ବୋଲି ରିପୋର୍ଟ କରୁଛନ୍ତି । ତେବେ ସତ କ’ଣ ? ଜାହାଜର ପ୍ରକୃତ ନାମ କ’ଣ ? ହୁଏତ ଏହି ପ୍ରଶ୍ନ ଆପଣଙ୍କ ମନକୁ ମଧ୍ୟ ଆସୁଥିବ । ଆପଣଙ୍କ ଭଳି ଅନେକ ଏହି ପ୍ରଶ୍ନର ଉତ୍ତର ଗୁଗଲରେ ଖୋଜୁଛନ୍ତି । ଆସନ୍ତୁ ଜାଣିବା ସତ କ’ଣ ।
ଅନେକ ନ୍ୟୁଜ୍ ୱେବସାଇଟ୍ ଓ ଚ୍ୟାନେଲ ଏହି ଜାହାଜର ନାମ ଏଭର ଗିଭେନ୍ ବୋଲି ରିପୋର୍ଟ କରୁଛନ୍ତି । ଯେତେବେଳେକି ଜାହଜରେ ବଡ ବଡ ଅକ୍ଷରରେ ଏଭର ଗ୍ରୀନ ବୋଲି ଲେଖା ହୋଇଛି । ଜାହାଜର କରରେ କ୍ୟାପିଟାଲ ଲେଟରରେ ଲେଖାଯାଇଥିବା ଏଭର ଗ୍ରୀନକୁ ଦେଖି ଅନେକ ପ୍ରଶ୍ନ କରୁଛନ୍ତି ଯେ, ଜାହାଜର ପ୍ରକୃତ ନାମ କ’ଣ ?
ଉତ୍ତର ହେଉଛି ଜାହଜର ଅଫିସିଆଲ ନାମ ହେଉଛି ଏଭର ଗିଭେନ୍ । କିନ୍ତୁ ଜାହଜକୁ ଅପରେଟ୍ କରୁଥିବା କମ୍ପାନୀର ନାମ ହେଉଛି ଏଭର ଗ୍ରୀନ୍ ମେରାଇନ୍ । ଯାହାକି ଏକ ତାଇୱାନ କମ୍ପାନୀ । ଏହି କମ୍ପାନୀ ବାହମସର ପଂଜିକୃତ । ଏଭର ଗ୍ରୀନ୍ ମେରାଇନ୍ ତାର ସବୁ ଜାହଜକୁ ‘ଏଭର’ ନାମରେ ଚଳାଇଥାଏ । ଅର୍ଥାତ ଏହାର ସବୁ ଜାହାଜର ନାମ ଆଗରେ ‘ଏଭର’ ଶବ୍ଦ ରହିଥାଏ । ଯେମିତିକି ‘ଏଭର ଗୁଡ୍ସ’,‘ଏଭର ଗ୍ଲୋରି’ ଓ ‘ଏଭର ଜେଣ୍ଟିଲ’ ।
ଇଏ ହେଉଛି ଏଭର ଗ୍ରୀନ ମେରାଇନର ଏଭର ଗୁଡ୍ସ କଣ୍ଟେନର ସିପ୍ । ଲାଇବେରିଆରେ ପଂଜିକୃତ ଏହି ଜାହାଜ ଏଭର ଗିଭେନ୍ ଭଳି ମାଲ ପରିବହନ କରିଥାଏ । ସେହିଭଳି ଏହି ଏହି ଜାହଜକୁ ଦେଖନ୍ତୁ । ଏହାର ନାମ ହେଉଛି ଏଭର ଗ୍ଲୋରି । ଜାହାଜରେ ବଡ଼ ବଡ଼ ଅକ୍ଷରରେ କମ୍ପାନୀର ନାମ ଏଭର ଗ୍ରୀନ୍ ଲେଖା ହୋଇଛି କିନ୍ତୁ ଗୋଟିଏ ପାଖରେ ଜାହାଜର ନାମ ଲେଖା ଯାଇଛି ଏଭର ଗ୍ଲୋରି ।
ଇଣ୍ଡିଆନ୍ ରେଲୱେ କହିଲେ ଯେମିତି ଭାରତୀୟ ରେଳବାଇକୁ ବୁଝାଏ କିନ୍ତୁ ରେଳବାଇ ଚଳାଉ ଥିବା ସବୁ ଟ୍ରେନର ନାମ ଅଲଗା ଥାଏ । ଯେମିତି କୋଣାର୍କ ଏକ୍ସପ୍ରେସ କିମ୍ବା ରାଜଧାନୀ ଏକ୍ସପ୍ରେସ । ଭାରତୀୟ ରେଳବାଇ ଚଳାଉଥିବା ସବୁ ଟ୍ରେନର ଭାରତୀୟ ରେଳବାଇ ବୋଲି ଲେଖା ଯାଇଥାଏ । ତା’ର ଅର୍ଥ ନୁହେଁ ଯେ, ସବୁ ଟ୍ରେନର ନାମ ଇଣ୍ଡିଆନ୍ ରେଲୱେ ନୁହେଁ ।
ସୂଚନାଯୋଗ୍ୟ ଯେ, ପାଖାପାଖି ୪୦୦ ମିଟର ଲମ୍ବ ଏଭର ଗିଭେନ୍ ଜାହାଜ ସୁଏଜ କେନାଲରେ ଅଟକି ରହିଥିଲା । ଫଳରେ ସୁଏଜ କେନାଲରେ ଟ୍ରାଫିକ୍ ଜାମ୍ ଲାଗି ରହିଥିଲା। ପାଖାପାଖି ୩୬୭ ରୁ ଅଧିକ ଜାହାଜ ସୁଏଜ କେନାଲରେ ଅଟକି ରହିଥିଲେ। ବିଶ୍ୱ ସାମୁଦ୍ରିକ ବାଣିଜ୍ୟର ୧୨ ପ୍ରତିଶତ ଏହି ଚ୍ୟାନେଲ ଦେଇ ହୋଇଥାଏ । ଯଦି ଜାମ୍ ଅଧିକ ଦିନ ଲାଗି ରହିଥାନ୍ତା ତେବେ ଏସିଆରୁ ୟୁରୋପ ପହଂଚିବାକୁ ମାଲବାହକ ଜାହଜଙ୍କୁ ଆଫ୍ରିକା ଦେଇ ବୁଲି ଯିବାକୁ ପଡିଥାନ୍ତା । ଫଳରେ ଏସିଆ ଓ ୟୁରୋପ ମଧ୍ୟରେ ଦୂରତା ଅଧିକ ୫ ହଜାର କିଲୋମିଟର ହୋଇଥାନ୍ତା ।
