ଇତିହାସ ରଚିଲେ ସାମି, ୫୫ ମ୍ୟାଚରେ ହାସଲ କଲେ ୨୦୦ ଓ୍ୱିକେଟ

ସେଞ୍ଚୁରିୟନ: ଡିସେମ୍ବର ୨୬ରୁ ଆରମ୍ଭ ହୋଇଛି ଭାରତ-ଦକ୍ଷିଣ ଆଫ୍ରିକା ପ୍ରଥମ ଟେଷ୍ଟ । ଏହି ମ୍ୟାଚରେ ଇତିହାସ ରଚିଛନ୍ତି ଭାରତୀୟ ଦ୍ରୁତ ବୋଲର ମହମ୍ମଦ ସାମି । ସେଞ୍ଚୁରିୟନ ଟେଷ୍ଟରେ ଭାରତୀୟ ମଧ୍ୟକ୍ରମ ବ୍ୟାଟ୍ସମ୍ୟାନଙ୍କ ବିଫଳତା ପରେ ଭାରତୀୟ ବୋଲର ଦମଦାର ବୋଲିଂ କରିଥିଲେ । ଯାହା ଫଳରେ ମାତ୍ର ୧୯୭ ରନରେ ଅଲଆଉଟ ହୋଇଥିଲା ଦକ୍ଷିଣ ଆଫ୍ରିକା । ବିଶେଷ କରି ସାମିଙ୍କ ବୋଲିଂର ସାମ୍ନା କରିପାରିନଥିଲେ ଦକ୍ଷିଣ ଆଫ୍ରିକା ବ୍ୟାଟ୍ସମ୍ୟାନ । ସାମି ପ୍ରଥମ ଇନିଂସରେ ୫ ଓ୍ୱିକେଟ ହାସଲ କରିଥିଲେ । ପ୍ରଥମ ଇନିଂସରେ ୫ ଓ୍ୱିକେଟ ହାସଲ ସହ ଟେଷ୍ଟରେ ୨୦୦ ଓ୍ୱିକେଟ ହାସଲ କରିଛନ୍ତି ସାମି ।

Milestone Alert 🚨 – 200 Test wickets for @MdShami11 👏👏#SAvIND pic.twitter.com/YXyZlNRkQ1

— BCCI (@BCCI) December 28, 2021

ଭାରତୀୟ ଟିମ୍ ପାଇଁ ୨୦୦ ଓ୍ୱିକେଟ ନେବାରେ ମହମ୍ମଦ ସାମି ୧୧ତମ ବୋଲର ହୋଇଛନ୍ତି । ୨୦୧୩ରେ ଓ୍ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ଡେବ୍ୟୁ କରିଥିଲେ ମହମ୍ମଦ ସାମି । ସାମି ୫୫ ଟେଷ୍ଟ ମ୍ୟାଚ ଖେଳି ଏହି ରେକର୍ଡ ସୃଷ୍ଟି କରିଛନ୍ତି । ସାମିଙ୍କ ପୂର୍ବରୁ କପିଲ ଦେବ ୫୦ ଟେଷ୍ଟରେ ଏହି ରେକର୍ଡ ନିଜ ନାମରେ କରିଛନ୍ତି ।

ଏହି ରେକର୍ଡ ବ୍ୟତୀତ ଆଉ ଏକ ବଡ଼ ରେକର୍ଡ କରିଛନ୍ତି ମହମ୍ମଦ ସାମି । ସାମି ସବୁଠାରୁ କମ୍ ବଲରେ ହାସଲ କରିଛନ୍ତି ୨୦୦ ଓ୍ୱିକେଟ । ସାମି ରବିଚନ୍ଦ୍ରନ ଅଶ୍ୱିନୀଙ୍କଠାରୁ କମ୍ ବଲରେ ୨୦୦ ଓ୍ୱିକେଟ ହାସଲ କରିଛନ୍ତି । ମାତ୍ର ୯ ହଜାର ୮୯୬ ବଲ ବୋଲିଂ ୨୦୦ ଓ୍ୱିକେଟ ଅକ୍ତିଆର କରିଛନ୍ତି ସାମି । ଯଦି ଅଶ୍ୱିନୀଙ୍କ କଥା କହିବା ତାହାଲ ଅଶ୍ୱିନୀ ୧୦ ହଜାର ୨୪୮ ବଲ ବୋଲିଂ କରି ୨୦୦ ଓ୍ୱିକେଟ ନିଜ ନାମରେ କରିଥିଲେ ।