ବଜେଟ୍ ଅଧିବେଶନ ପାଇଁ ବସିଲା ସର୍ବଦଳୀୟ ବୈଠକ

ନୂଆଦିଲ୍ଲୀ: ବଜେଟ୍ ଅଧିବେଶନକୁ ଭଲରେ ଚଲାଇବା ପାଇଁ ବସିଲା ସର୍ବଦଳୀୟ ବୈଠକ। ଭିସିରେ ସବୁ ଦଳର ନେତା ସାମିଲ ହୋଇଛନ୍ତି। ବଜେଟ୍ ଅଧିବେଶନକୁ ସୁରୁଖୁରୁରେ ଚଳାଇବା ପାଇଁ ବୈଠକରେ ଆଲୋଚନା କରାଯାଉଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ସଂସଦୀୟ ମନ୍ତ୍ରୀ ଅର୍ଜୁନ ମେଘୱାଲ ପ୍ରମୁଖ ବୈଠକରେ ସାମିଲ ହୋଇଛନ୍ତି।

ଗତକାଲି ରାଷ୍ଟ୍ରପତିଙ୍କ ଅଭିଭାଷଣକୁ ବିରୋଧୀ ଦଳ ବର୍ଜନ କରିଥିଲେ। ତେବେ ବଜେଟ୍ ଅଧିବେଶନକୁ ସୁଚାରୁ ରୂପେ ଅଚଲାଇବା ପାଇଁ ବୈଠକରେ ଆଲୋଚନା ଚାଲିଛି।  ବୈଠକରେ ସବୁ ବିରୋଧୀ ଦଳର ନେତା ସାମିଲ ଅଛନ୍ତି। ନୂଆ କୃଷି ଆଇନକୁ ନେଇ ବିରୋଧୀଙ୍କ ସହ ଆଲୋଚନା କରାଯିବ ବୋଲି କେନ୍ଦ୍ର ସରକାର  ଆଶ୍ୱାସନା ଦେଇଛନ୍ତି। ସରକାର ସବୁ ବିଷୟ ଉପରେ ଆଲୋଚନା କରିବାକୁ ରାଜି ଥିବା କୁହାଯାଇଛି।

ଅନ୍ୟପଟେ ରାଷ୍ଟ୍ରୀୟ ଲୋକତାନ୍ତ୍ରିକ ଦଳ ନେତା ହନୁମାନ ବେନିୱାଲ ସର୍ବଦଳୀୟ ବୈଠକରେ ସାମିଲ ହୋଇନାହାନ୍ତି। କୃଷି ଆନ୍ଦୋଳନକୁ ସମର୍ଥନ ଦେବା ନେଇ ସେ  ଏହି ବୈଠକରେ ସାମିଲ ହେବନାହିଁ ବୋଲି ପୂର୍ବରୁ ସ୍ପଷ୍ଟ କରିଦେଇଥିଲେ। ଅନ୍ୟପଟେ ଏଲଜେପି ନେତା ଚିରାଗ ପାଶ୍ୱାନ ମଧ୍ୟ ଅସୁସ୍ଥାତା କାରଣରୁ ବୈଠକରେ ସାମିଲ ହୋଇନାହାଁନ୍ତି ।