ବାହାରିନ୍ରେ ବିଘ୍ନ ବିନାଶକଙ୍କ ଆରଧନା, କଟକଣାରେ ଗଣପତିଙ୍କ ପୂଜା ପାଳନ
1 min read
ବାହାରିନ: ବାହାରିନ୍ରେ କୋଭିଡ୍-୧୯ ସବୁଜ କ୍ଷେତ୍ର କଟକଣା ସହିତ ଗଣେଶ ପୂଜା ପାଳିତ ହୋଇଯାଇଛି । ବାହାରିନ୍ ଓଡ଼ିଆ ସମାଜର ପ୍ରତିଷ୍ଠାତା ଡକ୍ଟର ଅରୁଣ କୁମାର ପ୍ରହରାଜଙ୍କ ବାସଭବନରେ ଗଣେଶ ପୂଜା ପାଳନ କରାଯାଇଛି। ପୂଜା ସ୍ଥଳକୁ ପ୍ରବେଶ କରିବା ପୂର୍ବରୁ ସମସ୍ତ ଭକ୍ତଙ୍କର ତାପମାତ୍ରା ତଥା କୋଭିଡ ଟୀକାକରଣ ପ୍ରମାଣପତ୍ର ଯାଞ୍ଚ କରାଯାଇଥିଲା । ଏଥିସହ ସମସ୍ତେ ସାନିଟାଇଜର୍ ବ୍ୟବହାର କରିଥିଲେ । କୋଭିଡ୍ କଟକଣା ଯୋଗୁଁ ଅଳ୍ପସଂଖ୍ୟକ ଭକ୍ତ ପୂଜାରେ ଉପସ୍ଥିତ ଥିଲେ। ଅନ୍ୟମାନେ ଜୁମ୍ ଓ୍ଵେବିନାର୍ ମାଧ୍ୟମରେ ପୂଜାରେ ସାମିଲ ହୋଇଥିଲେ।
ଡକ୍ଟର ଅରୁଣ କୁମାର ପ୍ରହରାଜ କୋଭିଡ୍-୧୯ ନିୟମାବଳୀକୁ ଗୁରୁତ୍ଵ ଦେଇ କହିଛନ୍ତି ଯେ, ଆମେ କୋଭିଡ୍ ନିୟମାବଳୀ ସହିତ କୌଣସି ସାଲିସ୍ ନକରି ସୁରକ୍ଷା ନିୟମକୁ କଡ଼ାକଡ଼ି ଭାବେ ପାଳନ ପୂର୍ବକ ଆମର ସାଂସ୍କୃତିକ ମୂଲ୍ୟବୋଧକୁ ବଞ୍ଚାଇବାକୁ ଚେଷ୍ଟା କରିଛୁ । ଡକ୍ଟର ପ୍ରହରାଜ ଆହୁରି ମଧ୍ୟ କହିଛନ୍ତି, “ବାହାରିନ୍ ହେଉଛି ପ୍ରେମ, ଶାନ୍ତି ଓ ସମନ୍ଵୟର ଦେଶ । ବାହାରିନ୍ ପରି ଏକ ଆଧୁନିକ, ଅଭିନବ ତଥା ପ୍ରଗତିଶୀଳ ରାଷ୍ଟ୍ରରେ ସମସ୍ତ ଧର୍ମର ଲୋକେ ଧାର୍ମିକ ସ୍ଵାଧୀନତା ଉପଭୋଗ କରନ୍ତି । ଏହି ସ୍ଵାଧୀନତା ବାହାରିନ୍ ପାଇଁ ବେଶ୍ ସ୍ଵତନ୍ତ୍ର ଏବଂ ଏହି ସ୍ଵାଧୀନତା ଉପରେ ବାହାରିନ୍ ରାଜାଙ୍କ ଆନ୍ତରିକ ବିଶ୍ଵାସ ଓ ପ୍ରତିବଦ୍ଧତା ପାଇଁ ଆମେ କୃତଜ୍ଞ।”
ଏହି ଉତ୍ସବରେ ଭାରତୀୟ ଦୂତାବାସ ପ୍ରତିନିଧି ଭାବରେ ସଚିବ ଶ୍ରୀ ରବି ଶଙ୍କର ଶୁକ୍ଳା ଉପସ୍ଥିତ ହେବା ସହିତ ଏହି ଭାରତୀୟ ପର୍ବ ପାଳନରେ ବହାରିନ ଓଡ଼ିଆ ସମାଜର ଉଦ୍ୟମକୁ ଗଭୀର ପ୍ରଶଂସା କରିଥିଲେ । ଉତ୍ସବରେ ଗଣେଶ ବନ୍ଦନା ଓ ଭଜନରେ ଆକର୍ଷଣୀୟ ନୃତ୍ୟ ସଂଗୀତ ପରିବେଷିତ ହୋଇଥିଲା । ଏହି କାର୍ଯ୍ୟକ୍ରମ ରେ ନୃସିଂହ ଚରଣ ନାୟକ, ରମେଶ ପାଣିଗ୍ରାହୀ, ସ୍ନେହ ପାଣିଗ୍ରାହୀ, ଶୁଦ୍ଧେନ୍ଦୁ ଦାସ, ପ୍ରିୟା ଦାସ, ସୁବ୍ରତ ପଡ଼ପଣ୍ଡା, ତୃପ୍ତି ବଡ଼ପଣ୍ଡା, ସିଦ୍ଧାର୍ଥ, ଅଳକା, ଆନି, ହିମାଂଶୁ ଆଦି ସହଯୋଗ କରିଥିଲେ ।
