ପାରାଦୀପ: କେବେ ଧରାହେବେ ଦଷ୍ମନ୍ତଙ୍କ ଦୁଶମନ୍ । କୁଜଙ୍ଗ ଥାନାରେ ଏତଲା ଦିଆଯିବା ପରେ ଦୁଷ୍ମନ୍ତଙ୍କୁ କିଏ ପ୍ରବର୍ତ୍ତାଇଥିଲା, ସେହି ଖଳନାୟକମାନଙ୍କୁ ଖୋଜୁଛି ପୋଲିସ। ଚାଲିପାରୁନଥିବା ଦୁଷ୍ମନ୍ତଙ୍କୁ କିଏ ବିଧାନସଭା ଆଗକୁ ନେଲା? ସେ ବିଷ କେଉଁଠୁ ପାଇଲେ ? ଘଟଣା ପଛରେ କିଏ, ସେମାନଙ୍କୁ ଧରି ଫାଶୀ ଦେଲେ ନ୍ୟାୟ ପାଇବେ ବୋଲି ଦୁଷ୍ମନ୍ତଙ୍କ ମାଆ କହିଛନ୍ତି । କଟକ ଏସସିବି ମେଡିକାଲରେ ପୁଅର ଚିକିତ୍ସା ଚାଲିଥିଲା, ଭଲ ହେବାକୁ ସମୟ ଲାଗିବ ଏବଂ ଫିଜିଓଥେରାପି କରିବାକୁ ଡାକ୍ତର ପରାମର୍ଶ ଦେଇଥିଲେ। ହେଲେ ତାଙ୍କୁ ଭୁବନେଶ୍ୱର ଡାକି ଆତ୍ମହତ୍ୟା ପାଇଁ ପ୍ରବର୍ତ୍ତାଇଥିବା ଯୁବକଙ୍କୁ ଧରିବାକୁ ଦୁଷ୍ମନ୍ତଙ୍କ ପରିବାର ଦାବି କରିଛନ୍ତି ।
ଦୁଇବର୍ଷ ତଳେ ଏକ ସଡ଼କ ଦୁର୍ଘଟଣାରେ ଗୁରୁତର ହୋଇ ପ୍ରଥମେ କୁଜଙ୍ଗ ଓ ପରେ କଟକରେ ଚିକିତ୍ସିତ ହୋଇଥିଲେ ଦୁଷ୍ମନ୍ତ । ସେଠାରେ ତାଙ୍କର ସମସ୍ତ ଚିକିତ୍ସା ବ୍ୟବସ୍ଥା କରାଯାଇଥିଲା। ପ୍ଲାଷ୍ଟିକ ସର୍ଜରୀ ବିଭାଗରେ ତାଙ୍କର ଅପରେସନ ମଧ୍ୟ କରାଯାଇଥିଲା। କିନ୍ତୁ ତାଙ୍କ ବାମ ଗୋଡ଼ରେ ଗଭୀର ଆଘାତ ଲାଗିଥିବାରୁ ଚିକିତ୍ସା ସମୟ ସାପେକ୍ଷ ଥିଲା। ସବୁ ସରକାରୀ ସାହାଯ୍ୟ ଯୋଗାଇ ଦିଆଯାଇଥିଲା। ତେବେ ତାଙ୍କ ମାନସିକତା ସହ ଖେଳି ଆତ୍ମହତ୍ୟା ପାଇଁ ପ୍ରବର୍ତ୍ତାଇ ଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ସମାଜସେବୀ। ଦୁଷ୍ମନ୍ତଙ୍କ ମାଆ ଏତଲା ଦେବା ପରେ କୁଜଙ୍ଗ ଥାନା ପକ୍ଷରୁ ମାମଲା ରୁଜୁ କରି ମଙ୍ଗଳାବାଗ ଥାନାକୁ ହସ୍ତାନ୍ତର କରାଯାଇଛି।
