କାହାଣୀ ୨୧: ବାଏ ବାଏ ଟ୍ରମ୍ଫ , ହ୍ୱାଇଟ ହାଉସରେ ବାଇଡେନ

ନନ୍ଦିଘୋଷ ବ୍ୟୁରୋ: ୨୦୨୧ରେ ଅନେକ ରାଜନୈତିକ ଘଟଣା ଦେଖିବାକୁ ମିଳିଥିଲା । ଦେଶଠାରୁ ଆରମ୍ଭ କରି ବିଶ୍ୱରେ ଦେଖିବାକୁ ମିଳିଥିଲା ରାଜନୈତିକ ପରିର୍ବତ୍ତନ । ୨୦୨୧ରେ ସବୁଠାରୁ ବଡ଼ ରାଜନୈତିକ ପରିର୍ତ୍ତନ ଦେଖିବାକୁ ମିଳିଥିଲା ଆମେରିକାରେ । ଡୋନାଲ୍ଡ ଟ୍ରମ୍ପଙ୍କୁ ଆମେରିକା ଶାସନ ଗାଦିରୁ ହଟାଇ ଆମେରିକା ଶାସନ ଭାର ସମ୍ଭାଳିଥିଲେ ଜୋ ବାଇଡେନ । ଏଥି ସହ ଆମେରିକା ରାଜନୀତିରେ ଆରମ୍ଭ ହୋଇଥିଲା ବାଇଡେନ ଯୁଗ ।

କିନ୍ତୁ ବାଇଡେନଙ୍କ ବିଜୟକୁ ଗ୍ରହଣ କରିପାରିନଥିଲେ ଡୋନାଲ୍ଡ ଟ୍ରମ୍ଫ । ଯାହା ଫଳରେ ଏହି ନିର୍ବାଚନ ଫଳାଫଳକୁ ନେଇ ଆମେରିକାରେ ହୋଇଥିଲା ବଡ଼ ଧରଣର ଦଙ୍ଗା । ଟ୍ରମ୍ପଙ୍କ ସମର୍ଥକମାନେ ଏହି ହିଂସା କରିଥିବା ଜଣାପଡ଼ିଥିଲା । ଏହି ହିଂସାରେ ୪ ଜଣଙ୍କର ମୃତ୍ୟୁ ଘଟିଥିଲା ଓ ଅନେକ ଲୋକ ଆହତ ହୋଇଥିଲେ । କେବଳ ଏତିକି ନୁହେଁ ୱାଶିଂଟନ୍ ଡି.ସିରେ କର୍ଫ୍ୟୁ ଲାଗୁ କରାଯାଇଥିଲା । କ୍ୟାପିଟୋଲ ବିଲ୍ଡିଂ ପରିସରରେ ଯେଉଁଭଳି ହିଂସା ଦେଖିବାକୁ ମିଳିଲା ତାହା ଆମେରିକା ଇତିହାସ ପୃଷ୍ଠାରେ ଯୋଡ଼ିଲା କଳାଦାଗ । ଏହି ଘଟଣାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବହୁ ବିଶ୍ବ ନେତା ନିନ୍ଦା କରିଥିଲେ ।

ଆମେରିକାର ୪୬ ତମ ରାଷ୍ଟ୍ରପତି ଭାବରେ ଜୋ ବାଇଡେନ ୨୦ ଜାନୁଆରୀ ୨୦୨୧ରେ ଶପଥ ଗ୍ରହଣ କରିଥିଲେ । ସେ ଚଳିତ ନିର୍ବାଚନରେ ରେକର୍ଡ ସଂଖ୍ୟକ ୮୧.୨୮ ନିୟୁତ ଭୋଟ ପାଇ ନିର୍ବାଚନ ଜିତିଥିଲେ । ବାଇଡେନଙ୍କ ବିଜୟ ସହ ଆମେରିକାରେ ପରିସମାପ୍ତି ହୋଇଥିଲା ଟ୍ରମ୍ଫ ଯୁଗ ଏବଂ ଆରମ୍ଭ ହୋଇଥିଲା ବାଇଡେନ ଯୁଗ । ବାଇଡେନ ରାଷ୍ଟ୍ରପତି ହେବା ସହ ଭାରତୀୟ ବଂଶୋଭବ କମଳା ହାରିସ ପ୍ରଥମ ମହିଳା ଉପ ରାଷ୍ଟ୍ରପତି ଭାବରେ ମଧ୍ୟ ଶପଥ ନେଇଥିଲେ । ବାଇଡେନ ଓ ହାରିସଙ୍କ ଶପଥ ଗ୍ରହଣ ଆମେରିକା ଇତିହାସରେ ସବୁଠାରୁ ଭିନ୍ନ ଥିଲା । କଡ଼ା ସୁରକ୍ଷା ମଧ୍ୟରେ ଶପଥ ଗ୍ରହଣ କରିଥିଲେ ବାଇଡେନ ଓ ହାରିସ । କରୋନା ମହାମାରୀ ପାଇଁ ଖୁବ୍ କମ୍ ସଂଖ୍ୟକ ଅତିଥିଙ୍କ ଗହଣରେ ହୋଇଥିଲା ଏହି ଶପଥଗ୍ରହଣ କାର୍ଯ୍ୟକ୍ରମ । ଏହି ଶପଥ ଗ୍ରହଣ କାର୍ଯ୍ୟକ୍ରମରେ କିନ୍ତୁ ଯୋଗ ଦେଇନଥିଲେ ଟ୍ରମ୍ଫ । ୧୮୬୯ରେ ଆଣ୍ଡ୍ରୁ ଜନସନଙ୍କ ପରେ ପ୍ରଥମ ଥର ପାଇଁ ଟ୍ରମ୍ଫ ତାଙ୍କ ଉତ୍ତରାଧିକାରୀଙ୍କ ଶପଥ ଗ୍ରହଣ ଉତ୍ସବରେ ଯୋଗ ଦେଇନଥିଲେ ।

ଆମରେିକାର ୪୬ ତମ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବାର ଗୋଟିଏ ଦିନ ପରେ ହିଁ ବଦଳାଇଥିଲେ ଟ୍ରମ୍ଫଙ୍କ ନୀତି । କାର୍ଯ୍ୟଭାର ଗ୍ରହଣ କରିବାର ଗୋଟିଏ ଦିନ ପରେ ହିଁ ୧୫ଟି ଗୁରୁତ୍ୱପୂର୍ଣ୍ଣ ନିର୍ଦ୍ଦେଶନାମାରେ ସ୍ୱାକ୍ଷର କରିଥିଲେ ବାଇଡେନ । ଯେଉଁଥିରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କ କିଛି ବିଦେଶ ନୀତି ମଧ୍ୟ ସାମିଲ ଥିଲା । ଯାହା କୂଟନୈତିକ ମହଲରେ ବେଶ୍ ଚର୍ଚ୍ଚାର ବିଷୟ ପାଲଟିଥିଲା ।

ବାଇଡେନ ରାଷ୍ଟ୍ରପତି ଭାବରେ ନିର୍ବାଚତି ହେବା ପରେ ବାଇଡେନ ସରକାର ପାଇଁ ଅନେକ ଚ୍ୟାଲେଞ୍ଜ ରହିଥିଲା । ଆଉ ଏହି ସବୁ ଜଟିଳ ଗଣିତକୁ ସମାଧାନ କରିବେ ଭାରତୀୟ ବଂଶୋଦ୍ଭବ। ଯାହାକି ଆମେରିକା ସହ ଭାରତର ସମ୍ପର୍କକୁ ଆହୁରି ନିବିଡ଼ କରାଇବା ବୋଲି ବିଶ୍ୱାସ ରହିଛି। ଜୋ ବାଇଡେନ୍ ମୋଟ୍ ୨୦ ଭାରତୀୟ ବଂଶୋଦ୍ଭବ ମନୋନୀତ କରିଛନ୍ତି। ଏମାନଙ୍କ ମଧ୍ୟରେ ୧୩ ଜଣ ମହିଳା ରହିଥିଲେ ।